ഷാർജ ബീച്ചുകളിൽ സുരക്ഷ മാനദണ്ഡങ്ങൾ കർശനമാക്കുന്നു

ഷാർജ: ബീച്ചുകളിൽ നിരീക്ഷണവും ബോധവത്​കരണവും വർധിപ്പിക്കുമെന്നും പൊതുജനങ്ങൾക്ക് സുരക്ഷ കൂട്ടാൻ നടപടികൾ ത്വരിതഗതിയിലാക്കുമെന്നും അധികൃതർ അറിയിച്ചു.ബീച്ചുകളിൽ നീന്തുന്നതിനിടെ മുങ്ങിമരിക്കുന്ന സംഭവങ്ങൾ ഈ വർഷം ഇതുവരെ റിപ്പോർട്ട്​ ചെയ്യപ്പെട്ടിട്ടില്ലെന്ന്​ ഷാർജ മുനിസിപ്പാലിറ്റി അസിസ്​റ്റൻറ്​ ഡയറക്​ടർ ജനറൽ ഖാലിദ് ബിൻ ഫലാഹ് അൽ സുവൈദി പറഞ്ഞു.

നീന്താനായി വേർതിരിച്ച ഭാഗങ്ങളിൽ ലൈഫ് ഗാർഡുകളുടെ സേവനം ഏർപ്പെടുത്തിയതും സുരക്ഷ കാമ്പയിൻ ശക്തമാക്കിയതുമാണ് അപകട നിരക്ക് കുറച്ചത്. 17ലധികം റെസ്ക്യൂ പ്ലാറ്റ്ഫോമുകൾ ബീച്ചുകളിൽ നൽകിയിട്ടുണ്ടെന്നും മറ്റ് എ​ട്ടെണ്ണം സ്ഥാപിക്കാൻ പ്രവർത്തനങ്ങൾ നടന്നുവരുകയാണെന്നും അദ്ദേഹം പറഞ്ഞു. ലൈഫ് ഗാർഡുകൾക്ക് അവരുടെ ജോലികൾ എളുപ്പത്തിൽ നിർവഹിക്കാനും കടൽതീരത്ത് ഉണ്ടാകാവുന്ന അടിയന്തര സാഹചര്യം നേരിടാനും ആവശ്യമായ എല്ലാ ഉപകരണങ്ങളും നൽകിയിട്ടുണ്ടെന്നും അധികൃതർ അറിയിച്ചു.