അക്ഷര മഹോത്സവത്തിന്​ ഇന്ന്​ തുടക്കം

ഷാർജ: അക്ഷരലോകം അറബ്​ നാട്ടിലേക്കൊഴുക​ിയെത്തുന്ന ഷാർജ അന്താരാഷ്​ട്ര പുസ്​തകോത്സവത്തി​െൻറ 40ാം എഡിഷന്​ ഇന്ന്​ തുടക്കം. അൽതാവൂനിലെ വേൾഡ് എക്സ്പോ സെൻററിൽ രാവിലെ 10ന്​ സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അല്‍ ഖാസിമി ഉദ്ഘാടനം ചെയ്യും. 11 ദിവസം നീളുന്ന പുസ്​തകോത്സവത്തിൽ 150ലേറെ മലയാള പുസ്​തകങ്ങളും പ്രകാശനം ചെയ്യും. 'എല്ലായ്പ്പോഴും ഒരു ശരിയായ പുസ്തകം ഉണ്ട്' എന്ന പ്ര​മേയത്തിലാണ് ഈ വർഷത്തെ​ പുസ്​തകോത്സവം. സാഹിത്യ നൊബേൽ ജേതാവ്​ അബ്​ദുറസാഖ്​ ഗുർനാ, ജ്​ഞാനപീഠ ജേതാവും ഇന്ത്യൻ എഴുത്തുകാരനുമായ അമിതവ്​​ ഘോഷ്​, ചേതൻ ഭഗത്​, രവീന്ദർ സിങ്​, അർഫീൻ ഖാൻ, ജെയ്​ ഷെട്ടി, പ്രണയ്​ ലാൽ, വീർ സംഘ്​വി തുടങ്ങിയവർ അതിഥികളായെത്തും. കേരളത്തിൽനിന്ന്​ സന്തോഷ്​ ജോർജ്​ കുളങ്ങര, പി.എഫ്​. മാത്യൂസ്​, മനോജ്​ കുറൂർ, ദീപ നിശാന്ത്​ തുടങ്ങിയവരുമുണ്ടാകും. രമേശ്​ ചെന്നിത്തല, വി.ഡി. സതീശൻ, മജീഷ്യൻ മുതുകാട്​ അടക്കമുള്ളവർ പുസ്​തക പ്രകാശനത്തിനെത്തും.

83 രാജ്യങ്ങളിൽനിന്ന്​ 1576 പ്രസിദ്ധീകരണ സ്​ഥാപനങ്ങൾ പ​ങ്കെടുക്കും. ഇന്ത്യയിൽനിന്ന്​ 81 പ്രസാധകരുണ്ടാകും. 293 പ്രസാധകരുള്ള ഈജിപ്​താണ്​ ഒന്നാമത്​. 240 പ്രസാധകരുമായി യു.എ.ഇ രണ്ടാമതുണ്ട്​. 'മാധ്യമം ബുക്​സ്​' ആദ്യമായി ഷാർജ ബുക്​ഫെയറിൽ സാന്നിധ്യമാകും. ഒന്നര കോടിയിലേറെ പുസ്​തകങ്ങൾ എത്തുമെന്നാണ്​ കണക്കുകൂട്ടൽ. ലോകത്തിലെ ഏറ്റവും വലിയ മൂന്നാമത്തെ പുസ്​​തകോത്സവമാണ്​ ഷാർജയിലേത്​. അഭിമുഖങ്ങൾ, സംവാദം, പുസ്​തക പ്രകാശനം തുടങ്ങിയവയുണ്ടാകും. പ്രവേശനം സൗജന്യം.

പതിവു​പോലെ അറബ്​ പുസ്തകങ്ങളാണ്​ ഇക്കുറിയും കൂടുതൽ. വിവിധ രാജ്യങ്ങളിൽനിന്നുള്ള എഴുത്തുകാരും പ്രസാധകരുമെല്ലാം ഷാർജയിൽ എത്തിയിട്ടുണ്ട്​. യു.എ.ഇ എഴുത്തുകാരുടെ 50ലേറെ പുസ്തകങ്ങളാണ് പ്രകാശനം ചെയ്യുന്നത്. കഴിഞ്ഞ വർഷം കോവിഡ്​ മൂലം നിയന്ത്രണങ്ങളോടെയായിരുന്നു പ്രവേശനം. ഇത്തവണ എല്ലാവർക്കും മുൻകൂട്ടി ബുക്ക്​ ചെയ്​ത ശേഷം പുസ്​തകോത്സവ നഗരിയിൽ എത്താം. കഴിഞ്ഞ വർഷം ഒഴിവാക്കിയ റൈറ്റേഴ്​സ്​ ഫോറവും ഇക്കുറിയുണ്ടാകും. ഇവിടെയായിരിക്കും പുസ്​തകങ്ങൾ പ്രകാശനം ചെയ്യുക. കഴിഞ്ഞ വർഷം പവലിയനുകൾക്ക്​ മുൻപിലായിരുന്നു പ്രകാശനം. പുസ്​തകോത്സവത്തിന്​ മുന്നോടിയായി നടന്ന പ്രസാധക സമ്മേളനം​ സമാപിച്ചു. ലൈബ്രറി കോൺഫറൻസ്​ നവംബർ ഒമ്പത്​ മുതൽ 11 വരെ നടക്കും.