കുടുംബ തർക്ക പരിഹാരത്തിന്​ പ്ലാറ്റ്​ഫോമുമായി ഷാർജ ഇന്ത്യൻ അസോസിയേഷൻ​; എല്ലാ ശനിയാഴ്ചയും സിറ്റിങ്​

ഷാർജ: പ്രവാസി കുടുംബങ്ങൾക്കിടയിൽ ആത്​മഹത്യക്കെതിരെ ബോധവത്​കരണം ശക്​തമാക്കുന്നതിന്‍റെ ഭാഗമായി കുടുംബ തർക്കങ്ങൾ പരിഹരിക്കുന്നതിന്​​ പ്രത്യേക സമിതിക്ക്​ രൂപം നൽകി ഷാർജ ഇന്ത്യൻ അസോസിയേഷൻ (​ഐ.എ.എസ്​). ആഗസ്റ്റ്​ രണ്ട്​ മുതൽ സമിതി പ്രവർത്തനം തുടങ്ങും.

എല്ലാ ശനിയാഴ്ചയും ഇന്ത്യൻ അസോസിയേഷൻ ഓഫിസ്​ പരിസരത്ത്​ സമിതി സിറ്റിങ്​ നടത്തുമെന്ന്​ അസോസിയേഷൻ പ്രസിഡന്‍റ്​ നിസാർ തളങ്കര അറിയിച്ചു. കുടുംബങ്ങളുമായി ബന്ധപ്പെട്ട തർക്കങ്ങൾ വ്യാപകമാവുന്ന സാഹചര്യത്തിലാണ്​ പുതിയ നീക്കം. ബുധനാഴ്ച ഐ.എ.എസ്​ ഓഫിസിൽ ചേർന്ന യോഗത്തിലാണ്​ ഇതു സംബന്ധിച്ച തീരുമാനമെടുത്തതെന്നും അദ്ദേഹം പറഞ്ഞു.

‘ആത്​മഹത്യ ഒന്നിനും പരിഹാരമല്ല’ എന്ന തലക്കെട്ടിൽ ആരംഭിക്കുന്ന സംരംഭത്തിലൂടെ കുടുംബങ്ങൾക്കിടയിൽ ബോധവത്​കരണം ഉൾപ്പെടെയുളള പരിപാടികളാണ്​ നടത്താൻ ഉദ്ദേശിക്കുന്നത്​. ഇതിനായി ഷാർജ പൊലീസി​ന്‍റെ സഹകരണവും തേടിയിട്ടുണ്ട്​. കഴിഞ്ഞ ദിവസം ഇതുസംബന്ധിച്ച്​ കമ്യൂണിറ്റി പ്രിവന്‍റീവ്​ ആൻഡ്​ പ്രിവൻഷൻ ഡിപാർട്ട്​മെന്‍റുമായി ഐ.എ.എസിലെ മുതിർന്ന അംഗങ്ങൾ കൂടിക്കാഴ്ച നടത്തിയിരുന്നു.

മേജർ നസീർ ബിൻ അഹമ്മദ്​, ക്യാപ്​റ്റൻ ഗാനിം ഇസ, ഇൻസ്​പെക്ടർ അവദ്​ മുഹമ്മദ്​ എന്നിവരാണ്​ ചർച്ചയിൽ പ​ങ്കെടുത്തത്​. ആത്​മഹത്യകൾ, കുടുംബ തർക്കങ്ങൾ, ഗാർഹിക പീഢനം തുടങ്ങിയ വിഷയങ്ങൾ പ്രവാസി കുടുംബങ്ങളിൽ വ്യാപകമാവുന്ന സാഹചര്യത്തിലാണ്​ അടിയന്തര ഇടപെടലിന്​ ഐ.എ.എസ്​ നീക്കം നടത്തുന്നത്​.