ഖത്തർ ലോകകപ്പ്​ അറബ്​ ചരിത്രത്തിലെ നാഴികക്കല്ല്​ -ശൈഖ്​ മുഹമ്മദ്​​

ദുബൈ: ഖത്തർ ലോകകപ്പിന്​ ആശംസയുമായി യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം. അറബ്​ ചരിത്രത്തിലെ നാഴികക്കല്ലായിരിക്കും ലോകകകപ്പെന്നാണ്​ ശൈഖ്​ മുഹമ്മദ്​ വിശേഷിപ്പിച്ചത്​.

ഖത്തറിന്‍റെ നേട്ടം എന്നതിനൊപ്പം ഗൾഫിനൊന്നടങ്കം അഭിമാനിക്കാവുന്ന നിമിഷമാണിത്​​. ലോകകപ്പിന്‍റെ വിജയത്തിനായി മേഖലയിലെ എല്ലാ രാജ്യങ്ങളും പിന്തുണ നൽകണം. ഖത്തർ ജനതക്കും അമീറിനും ആശംസകൾ അർപിക്കുന്നുവെന്നും ശൈഖ്​ മുഹമ്മദ്​ പറഞ്ഞു.

ലോകകപ്പിനെ വരവേൽക്കാൻ ദുബൈ വൻ സന്നാഹമാണ്​ ഒരുക്കിയിരിക്കുന്നത്​. ഖത്തറിലെത്തുന്നവരിൽ നല്ലൊരു ശതമാനവും ദുബൈയിലെത്തുമെന്ന്​ പ്രതീക്ഷിക്കുന്നതിനാൽ മെട്രോ, ബസ്​, ടാക്സി സർവീസുകൾ വർധിപ്പിച്ചിട്ടുണ്ട്​. ഫിഫയുടെ ഫാൻ ഫെസ്റ്റ്​ നടക്കുന്ന ആറ്​ നഗരങ്ങളിൽ ഒന്ന്​ ദുബൈയാണ്​. ദിവസവും നൂറിലേറെ വിമാനസർവീസാണ്​ യു.എ.ഇയിൽ നിന്ന്​ ഖത്തറിലേക്ക്​ നടക്കുന്നത്​. അർജന്‍റീന, ജപ്പാൻ ടീമുകളുടെ പരിശീലന മത്സരത്തിന്​ വേദിയൊരുക്കിയതും യു.എ.ഇയാണ്​.