സമുദ്രനിരപ്പ്​ ഉയരുന്നു: 2100 ഒാടെ യു.എ.ഇയിൽ നാല്​ കിലോമീറ്റർ വരെ തീരം നഷ്​ടമാകുമെന്ന്​ പഠനം

അബൂദബി: സമുദ്രനിരപ്പ്​ ഉയരുന്നതിനാൽ 2100ഒാടെ യു.എ.ഇയിൽ 2.26 കിലോമീറ്റർ മുതൽ 3.81 കിലോമീറ്റർ വരെ തീരം വെള്ളത്തിനടിയിലാകുമെന്ന്​ പഠനം. എന്നാൽ, ​കെട്ടിടങ്ങൾ നിർമിച്ചപ്പോൾ തറനിരപ്പ്​ ഉയർത്തി നിർമിച്ചതിനാൽ മിക്ക എമിറേറ്റുകളിലും ഇത്​ വെള്ളപ്പൊക്കത്തിന്​ കാരണമാകില്ലെന്നും ഇങ്ങനെ ചെയ്യാത്ത തീരപ്രദേശങ്ങളെ ബാധിക്കുമെന്നും പഠനം വ്യക്​തമാക്കുന്നു. 

പ്രതീക്ഷിക്കുന്നതിലും കൂടുതലാണ്​ തീരം കടലെടുത്തുപോകുന്നതെന്ന്​ പഠനം പ്രസിദ്ധീകരിച്ച ഗവഷേകരിലൊരാളും അബൂദബി പെട്രോളിയം ഇൻസ്​റ്റിറ്റ്യൂട്ട്​ അസോസിയേറ്റ്​ പ്രഫസറുമായ ഡോ. സ്​റ്റീഫൻ ലോകിയർ വ്യക്​തമാക്കുന്നു. ലോകത്താകമാനം പ്രതിവർഷം സമുദ്രനിരപ്പ്​ 3.2 മില്ലീമീറ്റർ ഉയരുകയാണ്​. ഇത്​ വഴി വർഷത്തിൽ 2.5 മീറ്റർ കര ഇല്ലാതാകുന്നുവെനാാണ്​ കണക്ക്​. എന്നാൽ, യഥാർഥത്തിൽ 10 മുതൽ 29 മീറ്റർ വരെ കടലെടുക്കുന്നുണ്ടെന്ന്​ അദ്ദേഹം കൂട്ടിച്ചേർത്തു. ജിയോ മോർഫോളജി മാഗസിനിലാണ്​ ഇതു സംബന്ധിച്ച പഠനം പ്രസിദ്ധീകരിച്ചത്​.

സമുദ്രനിരപ്പ്​ ഉയരുന്നതിനെ കുറിച്ചും കാലാവസ്​ഥമാറ്റത്തെ കുറിച്ചും നിരവധി പഠനങ്ങൾ നടത്തിയിട്ടുള്ളതതായി അബൂദബി പരിസ്​ഥിതി ഏജൻസി വ്യക്​തമാക്കി. എന്നാൽ, ഗ്രീൻലാൻഡിലെയും അൻറാർട്ടിക്കയിലെയും ​മഞ്ഞുപാളികളുടെ ഉരുക്കത്തിൽ നിരവധി അനിശ്ചിതത്വങ്ങളുള്ളതിനാൽ സമുദ്രനിരപ്പ്​ ഉയരുന്നതിനെ കുറിച്ചുള്ള പ്രവചനത്തിന്​ നിരവധി പരിമിതികളുണ്ടെന്നും ഏജൻസി പറഞ്ഞു. 2100ൽ സമുദ്രനിരപ്പ്​ എത്ര ഉയരുമെന്ന്​ കൃത്യമായി പറയാൻ പ്രയാസമാണ്​. സമുദ്രനിരപ്പിലെ മാറ്റം അളക്കുന്നതിന്​ അബൂദബിയിലെ വിവിധ പ്രദേശങ്ങളിൽ തിരമാലമാപിനി സ്​ഥാപിച്ചിട്ടുണ്ടെന്നും ഏജൻസി വ്യക്​തമാക്കി.