ദുബൈയുടെ മനംകവർന്ന് ‘അൽ സർമാദി’ ശിൽപം

ദുബൈ: നഗരത്തിൽ സ്ഥാപിച്ച പുതിയ ശിൽപം സന്ദർശകർക്കും നിവാസികൾക്കും കൗതുകമാകുന്നു. ദുബൈ നഗരത്തിലെ നാദൽ ശിബ റൗണ്ട് എബൗട്ടിലാണ്​ അൽ സർമാദി എന്ന പേരിൽ ശിൽപം നിർമിച്ചിരിക്കുന്നത്​. ഇമറാത്തി കലാകാരിയും ആർ.ടി.എയും ചേർന്നാണ് ഈ മനോഹര ശിൽപം പണിതീർത്തിരിക്കുന്നത്. മരുഭൂമിയിൽ മണൽ പറത്തി പായുന്ന കുതിരകൾ, അവ കൂട്ടത്തോടെ വൃത്താകൃതിയിൽ കുളമ്പടിച്ച് കുതിക്കുമ്പോൾ അന്തരീക്ഷത്തിലേക്ക് ഉയരുന്ന പൊടിയും മണലും സൃഷ്ടിക്കുന്ന ചൂഴി.

അൽ സർമാദി എന്ന ഈ ശിൽപം എന്തുകൊണ്ടും മനോഹരമായ കാഴ്ചയാണ്. വിശ്രമിക്കാതെ ഭാവിയിലേക്ക് കുതിക്കുന്ന ദുബൈ നഗരത്തിന്‍റെ പ്രതീകമാണ് ഈ ശിൽപമെന്ന് ദുബൈ റോഡ് ട്രാൻസ്പോർട്ട് അതോറിറ്റി പറയുന്നു. ഇമറാത്തി കലാകാരി ലത്തീഫ സഈദിന്‍റെ ആശയമാണ് ഈ ശിൽപം.

കുതിരകളോടും കുതിരയോട്ടത്തോടുമുള്ള ഇമറാത്തികളുടെ പ്രണയം കൂടി പങ്കുവെക്കുന്നുണ്ട് ഈ നിർമിതി. രാത്രിയും പകലും നാദൽ ശിബ റൗണ്ട് എബൗട്ടിലൂടെ കടന്നുപോകുന്നവർക്ക് അൽ സർമാദി കലാസ്വാദനത്തിന്‍റെ പുതിയ അനുഭവം കൂടി സമ്മാനിക്കുമെന്ന് തീർച്ചയാണ്.