സ്​കൂളുകൾ ഇന്ന്​ അടക്കും; ആശയക്കുഴപ്പത്തിൽ രക്ഷിതാക്കൾ: നാട്ടിൽ പോകണോ, വേണ്ടയോ​?

അൽ ഐൻ: യു.എ.ഇയിലെ വിദ്യാലയങ്ങൾ മധ്യവേനൽ അവധിക്കായി വ്യാഴാഴ്​ച അടക്കും. ഇനി രണ്ടുമാസം അവധിക്കാലം.എന്നാൽ, യാത്രവിലക്ക്​ നിലനിൽക്കുന്നതിനാൽ കൃത്യ സമയത്ത്​ തിരികെയത്താൻ കഴിയുമോ എന്ന ആശയക്കുഴപ്പത്തിലാണ്​ രക്ഷിതാക്കൾ. അതിനാൽ പലരും യാത്ര മാറ്റിവെച്ചു. എന്നാൽ, ​യാത്രവിലക്ക്​ മൂലം കഴിഞ്ഞ വർഷത്തെ അവധിക്കും നാട്ടിൽ പോകാത്തവർ ഇക്കുറി രണ്ടും കൽപിച്ച്​ നാട്ടിലേക്ക്​ തിരിക്കുന്നുണ്ട്​.

സാധാരണ മധ്യവേനൽ അവധിയെത്തിയാൽ കടുത്ത ചൂടിൽ നിന്ന് രക്ഷതേടി കുടുംബസമേതം നാട്ടിൽ പോയി അടുത്ത ബന്ധുക്കളെ സന്ദർശിക്കുന്നതും ആവോളം മഴ ആസ്വദിക്കുന്നതും പതിവായിരുന്നു. കോവിഡാണ്​ ഇതിന്​ വിലങ്ങുതടിയാകുന്നത്​. വിമാന സർവിസ്​ എന്ന്​ തുടങ്ങും എന്ന്​ ഉറപ്പില്ലാത്തതിനാലാണ്​ പലരും നാട്ടിലേക്കുള്ള യാത്ര ഉപേക്ഷിച്ചത്​.

വിദ്യാർഥികൾക്ക്​ രണ്ട്​ മാസം അവധിയാണെങ്കിലും രക്ഷിതാക്കളിൽ പലർക്കും ഒരുമാസത്തെ അവധിയേ ഉണ്ടാവൂ. എന്നാൽ, കഴിഞ്ഞ വർഷം നാട്ടിൽ പോകാൻ കഴിയാതിരുന്ന വിവിധ എമിറേറ്റ്സുകളിലെ സ്കൂൾ ജീവനക്കാരിൽ നല്ലൊരു വിഭാഗവും ഈ അവധിക്ക് നാട്ടിൽ പോകുന്നുണ്ട്. വൈകാതെ ഇന്ത്യയിൽ നിന്നും യു.എ.ഇയിലേക്കുള്ള വിമാന സർവിസ് പുനരാരംഭിക്കുമെന്ന പ്രതീക്ഷയിലാണ് അവർ.

അറബ്​ കരിക്കുലം അടക്കമുള്ള സ്​കൂളുകളിൽ അധ്യയന വർഷം ഇന്ന്​ അവസാനിക്കും. മലയാളി കുട്ടികൾ ഏറെയുള്ള ഏഷ്യൻ കരിക്കുലം സ്​കൂളുകളുടെ ഒന്നാം ടേമാണ്​ ഇന്ന്​ അവസാനിക്കുന്നത്​. അവധി കഴിഞ്ഞ്​ ആഗസ്​റ്റ്​ 29ന്​ തിരിച്ചെത്തു​േമ്പാൾ രണ്ടാം ടേം തുടങ്ങും. അവധിക്കാലമാണെങ്കിലും വിദ്യാർഥികൾക്ക് വീട്ടിലിരുന്ന് ചെയ്യാൻ നിരവധി പ്രവർത്തനങ്ങൾ നൽകിയാണ്​ യാത്രയാക്കുന്നത്​. ഓൺലൈൻ പഠനമായതിനാൽ വിദ്യാർഥികൾക്ക്​ ക്ലാസുകൾ പലതും നഷ്​ടമായിരുന്നു.

അവധിക്കാലം മുതലെടുത്ത്​​ ഇത്​ ​പരിഹരിക്കാമെന്നാണ്​ പ്രതീക്ഷ. മധ്യവേനൽ അവധിക്ക് ശേഷം വിദ്യാലയങ്ങൾ തുറക്കുന്നതോടെ അബൂദബി എമിറേറ്റിലെ 70 കുട്ടികളും ക്ലാസ്​മുറികളിൽ എത്തുമെന്നാണ് പ്രതീക്ഷ. 80 ശതമാനം അധ്യാപകരും ഇതര ജീവനക്കാരും 12 വയസ്സുകഴിഞ്ഞ വിദ്യാർഥികളും കോവിഡ് വാക്‌സിനേഷൻ പൂർത്തിയാക്കി.

അതേസമയം, സി.ബി.എസ്.ഇ 10, 12 ക്ലാസുകളിലെ പരീക്ഷകൾ റദ്ദാക്കിയതും ഫലം വൈകുന്നതും രക്ഷിതാക്കളെയും വിദ്യാർഥികളെയും ഒരുപോലെ ആശങ്കയിലാക്കുന്നു.