സ്​കൂൾ തുറന്നു; മാസ്​കണിഞ്ഞ്​ കുട്ടികളെത്തി

ദുബൈ: പഴയ സ്​കൂൾ കാലത്തിലേക്കുള്ള തിരിച്ചുപോക്കി​െൻറ സൂചനകൾ നൽകി യു.എ.ഇയിൽ സ്​കൂളുകൾ തുറന്നു.

കഴിഞ്ഞ അധ്യയനവർഷത്തെ അപേക്ഷിച്ച്​ കൂടുതൽ കുട്ടികൾ ക്ലാസ്​ മുറികളിലേക്ക്​ നേരി​ട്ടെത്തിയതോടെ ചെറിയരീതിയിൽ പ്രവേശനോത്സവം നടത്തിയാണ്​ കുട്ടികളെ അധ്യാപകരും സ്​കൂൾ ജീവനക്കാരും സ്വീകരിച്ചത്​. മാസ്​ക്​ ധരിച്ചെത്തിയ കുട്ടികൾക്ക്​ 1.5 മീറ്റർ അകലത്തിലാണ്​ സീറ്റൊരുക്കിയിരുന്നത്​. നാളുകൾക്ക്​ ശേഷം തമ്മിൽകാണുന്ന കുട്ടികൾ കൂട്ടംചേരുന്നത്​ ഒഴിവാക്കാൻ ആദ്യദിനം മുതൽക്കെ അധ്യാപകർ നന്നേ പാടുപെട്ടു. അടുത്ത ദിവസങ്ങളിൽ കൂടുതൽ കുട്ടികൾ ക്ലാസ്​ മുറികളിലേക്കെത്തുമെന്നാണ്​ അധികൃതരുടെ കണക്കുകൂട്ടൽ. ദുബൈയിൽ അടുത്ത മാസം ആദ്യം മുതൽ ക്ലാസ്​ മുറി പഠനം മാത്രമായിരിക്കും ആശ്രയം.

അതേസമയം, ചില സ്​കൂളുകൾ തിങ്കൾ, ചൊവ്വ ദിവസങ്ങളിലാണ്​ തുറക്കുന്നത്​. അറബിക്​ കരിക്കുലം ഉൾപ്പെടെയുള്ള സ്​കൂളുകളിൽ പുതിയ അധ്യയനവർഷമാണ്​ തുടങ്ങിയത്​.

മലയാളി കുട്ടികൾ ഏറെയുള്ള ഏഷ്യൻ കരിക്കുലം സ്​കൂളുകളിൽ രണ്ടാം ടേമാണിത്​.അബൂദബിയിലും അജ്​മാനിലും ഷാർജയിലും കോവിഡ്​ പരിശോധനക്ക്​ ശേഷമാണ്​ കുട്ടികൾ ക്ലാസിലെത്തിയത്​. 96 മണിക്കൂറിനുള്ളിലെട​ുത്ത പി.സി.ആർ പരിശോധനഫലം ഹാജരാക്കണമെന്ന്​ നിബന്ധനയുള്ളതിനാൽ കഴിഞ്ഞ ദിവസങ്ങളിൽ പരിശോധന കേന്ദ്രങ്ങളിൽ വൻതിരക്കായിരുന്നു. ചില കുട്ടികളുടെ പരിശോധനഫലം ഇന്നലെ ലഭിച്ചിരുന്നില്ല. ഇവർ ഇന്ന്​ മുതലേ ക്ലാസുകളിൽ എത്തൂ. അധികൃതരുടെ നിർദേശപ്രകാരം സ്​കൂളിനോട്​ ചേർന്ന്​ ഐസൊലേഷൻ റൂമുകളും തയാറാക്കിയിട്ടുണ്ട്​. സ്​കൂളുകളുടെ പ്രവേശന കവാടത്തിൽ താപനില പരിശോധിക്കാൻ സൗകര്യം ഏർപ്പെടുത്തിയിരുന്നു. അബൂദബിയിലെയും അജ്​മാനിലെയും കുട്ടികൾ 14 ദിവസത്തിന്​ ശേഷം വീണ്ടും കോവിഡ്​ പരിശോധന നടത്തേണ്ടിവരും. 28ാം ദിവസം അടുത്ത പരിശോധനയും നടത്തണം. അടുത്തമാസം മുതൽ 12 വയസ്സിന്​ മുകളിലുള്ള വാക്​സിനെടുക്കാത്ത കുട്ടികൾ ഓരോ ആഴ്​ചയും പരിശോധന നടത്തണം. വാക്​സിനെടുത്തവർ മാസത്തിൽ ഒരുതവണ ടെസ്​റ്റ്​ ചെയ്യണം. 12 വയസ്സിൽ താഴെയുള്ളവർ വാക്​സിനെടുത്താലു​ം ഇല്ലെങ്കിലും ഓരോ മാസവും പരിശോധന നടത്തണം.

നഴ്​സറി, ഡേ കെയർ സെൻറർ, സ്വകാര്യ സ്​കൂൾ, ​സർക്കാർ സ്​കൂൾ, ഉന്നത വിദ്യാഭ്യാസ കേന്ദ്രങ്ങൾ, പരിശീലന കേന്ദ്രങ്ങൾ, ഇൻസ്​റ്റിറ്റ്യൂട്ടുകൾ എന്നിവക്ക്​ ഇത്​ ബാധകമാണ്​. ദുബൈ വിദ്യാഭ്യാസ അതോറിറ്റിയുടെ കീഴിൽ വരുന്ന സ്​കൂളുകളിലെ കുട്ടികൾക്ക്​ കോവിഡ്​ പരിശോധന നിർബന്ധമില്ല.

ഷാർജയിലും കോവിഡ്​ പരിശോധനക്ക്​ ശേഷമാണ്​ കുട്ടികൾ എത്തിയത്​. 12 വയസ്സിൽ താഴെയുള്ള കുട്ടികൾക്ക്​ പരിശോധന വേണ്ട.