അബൂദബി ഏഷ്യൻ സ്​കൂളുകളിൽ  പുതിയ അധ്യയന വർഷം  എട്ടിന്​ തുടങ്ങും 

അബൂദബി: അബൂദബി വിദ്യാഭ്യാസ-വൈജ്ഞാനിക വകുപ്പിന്​ (അഡെക്​) കീഴിൽ ഏഷ്യൻ പാഠ്യപദ്ധതി പ്രകാരം ​പ്രവർത്തിക്കുന്ന സ്​കൂളുകളിൽ ഏപ്രിൽ എട്ടിന്​ പുതിയ അധ്യയന വർഷം ആരംഭിക്കും. കെ.ജി ക്ലാസുകളിലേക്ക്​ പുതിയ കുട്ടികളെ സ്വീകരിക്കാൻ സ്​കൂളുകൾ ഒരുങ്ങിയിട്ടുണ്ട്​. വാർഷിക പരീക്ഷ കഴിഞ്ഞ്​ മൂന്നാഴ്​ചത്തെ വസന്തകാല അവധിക്ക്​ ശേഷമാണ്​ സ്​കൂളുകൾ തുറക്കുന്നത്​.വസന്തകാല അവധി കഴിഞ്ഞ്​ സർക്കാർ സ്​കൂളുകൾ ഉൾപ്പെടെ മറ്റു വിദ്യാലയങ്ങളും തുറക്കുന്നത്​ ഏപ്രിൽ എട്ടിനാണ്​. എന്നാൽ, ഏഷ്യൻ സ്​കൂളുകൾ ഒഴികെ അഡെകിന്​ കീഴിലുള്ള സ്​കൂളുകളുടെ മൂന്നാം ടേം ആണ്​ ഏപ്രിൽ എട്ടിന്​ ആരംഭിക്കുന്നത്​. ഏഷ്യൻ സ്​കൂളുകൾക്ക്​ മാത്രമാണ്​ പുതിയ അധ്യയന വർഷം തുടങ്ങുന്നത്​. എന്നാൽ, ദുബൈ വൈജ്ഞാനിക-മാനവ വികസന അതോറിറ്റിക്ക്​ (കെ.എച്ച്​.ഡി.എ) കീഴിലുള്ള സ്വകാര്യ സ്​കൂളുകളിൽ ഏപ്രിൽ രണ്ടിന്​ തന്നെ പുതിയ അധ്യയന വർഷം ആരംഭിച്ചിട്ടുണ്ട്​. 

ജ​ൂലൈ ഒന്ന്​ മുതലാണ്​ കെ.എച്ച്​.ഡി.എക്ക്​ കീഴിലെ സ്​കൂളുകൾക്ക്​ മധ്യവേനൽ അവധി ആരംഭിക്കുന്നത്​. സെപ്​റ്റംബർ രണ്ടിന്​ മധ്യവേനൽ അവധി കഴിഞ്ഞ്​ സ്​കൂളുകൾ തുറക്കും. 2018 ഡിസംബർ 16 മുതൽ 2019 ജനുവരി അഞ്ചുവരെയാണ്​ ശൈത്യകാല അവധി. അഡെകിന്​ കീഴിലെ വിദ്യാലയങ്ങളുടെ 2017^2018 വർഷത്തെ അക്കാദമിക കലണ്ടർ പുറത്തിറക്കിയിട്ടുണ്ടെങ്കിലും 2018^2019 വർഷത്തേക്കുള്ളത്​ പ്രഖ്യാപിച്ചിട്ടില്ല. പുതിയ അധ്യയന വർഷത്തേക്കുള്ള സമ്പൂർണ കലണ്ടർ സർക്കാർ അംഗീകാരത്തിന്​ ശേഷം ഉടൻ പുറത്തിറക്കുമെന്ന്​ അഡെക്​ അറിയിച്ചിട്ടുണ്ട്​. ജൂൺ 29ന്​ മധ്യവേനൽ അവധി ആരംഭിക്കും എന്ന പ്രതീക്ഷയിലാണ്​ സ്​കൂൾ അധികൃതരും രക്ഷിതാക്കളും. പല രക്ഷിതാക്കളും മധ്യവേനലവധിക്ക്​ നാട്ടിൽ പോകാൻ ടിക്കറ്റ്​ ബുക്ക്​ ചെയ്​ത്​ തുടങ്ങിയിട്ടുണ്ട്​. പുതിയ അധ്യയന വർഷത്തിൽ 180 അധ്യയനദിനങ്ങൾ വേണമെന്നാണ്​ നിബന്ധന. മുൻ വർഷങ്ങളിൽ ഇത്​ 175 ആയിരുന്നു.