സേവന പാതയില്‍ കര്‍മനിരതരായി സമദർശിനി ഷാർജ 

ഷാർജ: കോവിഡ് 19​​െൻറ ഭാഗമായി ഇന്ത്യൻ അസോസിയേഷൻ ഷാർജ നടത്തുന്ന ജീവകാരുണ്യ പ്രവർത്തനങ്ങൾക്ക് പിന്തുണയറിയിച്ച്​ സമദർശിനി ഷാർജ ഭക്ഷ്യവസ്തുക്കൾ  കൈമാറി. നാല്​ ടൺ അരി, രണ്ട്​ ടൺ പഞ്ചസാര, ഒരുടൺ പരിപ്പ്​ എന്നിവയടങ്ങിയ ഭക്ഷ്യ സാധനങ്ങളാണ് സമദർശിനി ഷാർജ പ്രസിഡൻറ്​ സി.എ.  ബാബു, സെക്രട്ടറി വി.ടി. അബൂബക്കർ, ട്രഷറർ സേവ്യർ, വനിതാവേദി പ്രസിഡൻറ്​ ലതാ വാരിയർ, സെക്രട്ടറി കവിത വിനോദ്,  ട്രഷറർ രാജി ജേക്കബ്‌ എന്നിവർ ചേർന്ന് ഇന്ത്യൻ അസോസിയേഷൻ പ്രസിഡൻറ്​ ഇ.പി. ജോൺസൻ, സെക്രട്ടറി അബ്​ദുല്ല മല്ലിച്ചേരി, വൈസ് പ്രസിഡൻറ്​ അഡ്വ. വൈ.എ. റഹീം എന്നിവർക്കു കൈമാറിയത്. 

മൂന്നുപതിറ്റാണ്ടോളമായി യു.എ.ഇയിലെ കലാ സാംസ്‌കാരിക, ജീവകാരുണ്യ മേഖലകളിൽ  പ്രവർത്തിക്കുന്ന സമദർശിനിയുടെ പ്രവർത്തനങ്ങൾ മാതൃകാപരമാണെന്ന്​  അസോസിയേഷൻ ഭാരവാഹികൾ പറഞ്ഞു. സമദർശിനി മാനേജിങ് കമ്മറ്റി അംഗങ്ങളായ ജേക്കബ്‌, അബ്​ദുൽ സലാം, അനിൽ വാരിയർ, പോൾസൺ, സാദിക്ക് അലി,  മുബാറക് ഇമ്പാറക്, വിനോദ് രാമചന്ദ്രൻ, അരവിന്ദൻ, ഭദ്രൻ, ശിഹാബ് എന്നിവർ നേതൃത്വം നൽകി. ലോ‌ക്‌ഡൗണ്‍ അവസാനിക്കുന്നത് വരെ സേവന പ്രവര്‍ത്തനങ്ങളുമായി മുന്നോട്ട് പോകുമെന്നും സമദർശിനി ഷാർജ  ഭാരവാഹികൾ അറിയിച്ചു.