സലാലയിലെ അപകടം: ഞെട്ടൽ വിട്ടുമാറാതെ ദൃക്സാക്ഷികൾ

ദുബൈ: പെരുന്നാൾ അവധിയാഘോഷിക്കാൻ ദുബൈയിൽ നിന്ന്​ സലാലയിലേക്ക്​ പോയി ഇന്ത്യക്കാർ മരിച്ച സംഭവത്തിൽ ഞെട്ടൽ മാറാതെ ദൃക്സാക്ഷികൾ. ഞായറാഴ്ച​യാണ്​ ഉത്തരേന്ത്യക്കാരെന്ന്​ സംശയിക്കുന്ന അഞ്ചുപേരെ ടൂറിസ്റ്റ് കേന്ദ്രമായ മുഗ്സെയിൽ ബീച്ചിൽ കാണാതായത്​​. കടൽ പ്രക്ഷുബ്​ദമായത്​ പരിഗണിക്കാതെ ബാരിക്കേഡ്​ മറികടന്നവരാണ്​ അപകടത്തിൽ പെട്ടെതെന്ന്​ സംഭവ സമയത്ത്​ സ്ഥലത്തുണ്ടായിരുന്ന ദുബൈയിൽ പ്രവാസിയായ തമിഴ്​നാട്​ സ്വദേശി രാജു 'ഗൾഫ്​ മാധ്യമ'ത്തോട്​ പറഞ്ഞു.

സ്ത്രീകളുടെയും കുട്ടികളുടെയും കരച്ചിൽ കേട്ട്​ ആളുകൾ ഓടിക്കൂടുന്നതാണ്​ ആദ്യം കണ്ടത്​. ആ സമയത്ത്​ കടലിൽ നോക്കിയപ്പോൾ ഒരാൾ ഒഴുകിപ്പോകുന്നത്​ കണ്ടു. നീന്തലറിയുന്നവർക്കോ മറ്റോ രക്ഷപ്പെടുത്താൻ കഴിയുമായിരുന്നില്ല. മഴയും കാറ്റും കാരണമായി കടൽ ഇളകിമറിയുകായായിരുന്നു -രാജു പറഞ്ഞു. ദുബൈയിൽ നിന്ന്​ സുഹൃത്തുക്കളോടൊപ്പമാണ്​ ഇദ്ദേഹം ഖരീഫ്​ സീസൺ ആസ്വദിക്കുന്നതിനായി സലാലയിലെത്തിയത്​. ബാരിക്കേഡ്​ മറികടന്ന്​ നൂറുക്കണക്കിന്​ ആളുകൾ തീരത്തേക്ക്​ ഇറങ്ങിയിരുന്നെന്നും എന്നാൽ അപകടത്തിലായത്​ കൂടുതൽ കടലിന്‍റെ ഉള്ളിലേക്ക്​ പ്രവേശിച്ചവരാണെന്നും അദ്ദേഹം കൂട്ടിച്ചേർത്തു. വലിയ സംഘമായെത്തിയവരിൽ കുറച്ചു പേരാണ്​ അപകടത്തിൽ പെട്ടത്​. ഇവർ ഹിന്ദിയിലാണ്​ സംസാരിച്ചത്. പതപോലെ കാണുന്ന തിരമാല ഒറ്റനോട്ടത്തിൽ അപകടകാരിയല്ലെന്ന്​ തോന്നിയതിനാലാവാം കടലിൽ ഇറങ്ങിയതെന്നും അദ്ദേഹം പറഞ്ഞു.

അപകടം നടന്നയുടൻ പൊലീസും രക്ഷാപ്രവർത്തകരും ആംബുലൻസും മറ്റു സന്നാഹങ്ങളുമായി എത്തി. സുരക്ഷാ ഉദ്യോഗസ്ഥർക്കും അതിവേഗത്തിൽ രക്ഷാപ്രവർത്തനം നടത്താൻ കഴിയുമായിരുന്നില്ല. പാറക്കെട്ടുകൾ നിറഞ്ഞ സ്ഥലമായിരുന്നു. പൊലീസ്​ സ്ഥലത്തെത്തി ആൾകൂട്ടത്തെ മാറ്റിയാണ്​ രക്ഷാപ്രവർത്തനം നടത്തിയത് ​-രാജു പറഞ്ഞു. അപകടത്തിന്‍റെ ഞെട്ടലിൽ സംഭവദിവസം തന്നെ യാത്ര മതിയാക്കി ദുബൈയിലേക്ക്​ മടങ്ങിയെന്നും അദ്ദേഹം കൂട്ടിച്ചേർത്തു.