ഏഴ്​ വർഷത്തിന്​ ശേഷം സാദിഖ്​ അലിക്ക്​ അപ്രതീക്ഷിത ഗ്രാറ്റുവിറ്റി

അൽഐൻ: ജോലിയിൽനിന്ന്​ പിരിഞ്ഞ്​ ഏഴ്​ വർഷത്തിന്​ ശേഷം ഒാർക്കാപുറത്ത്​ ഗ്രാറ്റുവിറ്റി ലഭിച്ച സന്തോഷത്തിലാണ്​ മലപ്പുറം ജില്ലയിലെ കോട്ടക്കൽ ഇന്ത്യനൂർ സ്വദേശി തച്ചപറമ്പൻ സാദിഖ്​ അലി. അൽ​െഎൻ നഗരസഭയുടെ വിശാലമനസ്​കതയിൽ ഇദ്ദേഹത്തിന്​ ഗ്രാറ്റുവിറ്റിയായി ലഭിച്ചത്​ ആറര ലക്ഷം ഇന്ത്യൻ രൂപ (38000 ദിർഹം)​. പ്രതീക്ഷിക്കാതെ വന്നെത്തിയ സാമ്പത്തികനേട്ടത്തിൽ നഗരസഭ അധികൃതരോട്​ നന്ദി പറയുകയാണ് സാദിഖ് അലി.

നഗരസഭയിലെ ഉദ്യാന വിഭാഗത്തിൽ 14 വർഷം ഡ്രൈവറായി ജോലി ചെയ്തിരുന്നു സാദിഖ് അലി. 1997ൽ ഉദ്യാന വിഭാഗത്തിലെ ജോലിക്കാരെ നഗരസഭ കമ്പനിക്ക് കീഴിലാക്കിയപ്പോൾ അതുവരെയുള്ള സർവീസിന്​ ലഭിക്കേണ്ട എല്ലാ ആനുകൂല്യങ്ങളും നൽകിയിരുന്നു. തുടർന്ന് കമ്പനിക്ക് കീഴിൽ മൂന്ന് വർഷം ജോലി ചെയ്തു. ശമ്പളമല്ലാതെ മറ്റൊരു ആനുകൂല്യവും ഉണ്ടാകില്ല എന്നായിരുന്നു കമ്പനിയുടെ വ്യവസ്​ഥ.  

2010ൽ ജോലി അവസാനിപ്പിച്ച് നാട്ടിലേക്ക് പോകുകയും ചെയ്തു. പിന്നീട്​ ഒമ്പത് വർഷം നാട്ടിലായിരുന്നു സാദിഖ് അലി. നേരെത്തെ തനിക്കൊപ്പം കമ്പനിയിൽ ജോലി ചെയ്തിരുന്ന ചിലർക്ക് കരാർ ജോലിയുടെ ഭാഗമായും ഗ്രാറ്റുവിറ്റി ആനുകൂല്യം  ലഭിച്ചിട്ടുണ്ട് എന്നറിഞ്ഞ്  സന്ദർശക വിസയിൽ അൽഐനിൽ വരികയായിരുന്നു ഇദ്ദേഹം. തുടർന്ന്​ സാധാരണ നടപടിക്രമങ്ങളിലൂടെ നഗരസഭയിൽനിന്ന് ബാങ്ക് വഴി 38000 ദിർഹം കൈപ്പറ്റുകയും ചെയ്തു. ഏതാനും ദിവസങ്ങൾക്ക്​ ശേഷം ഇദ്ദേഹം നാട്ടിലേക്ക്​ മടങ്ങും.