ആർ.ടി.പി.സി.ആർ ഇളവ്: യു.എ.ഇയെ ഉൾപ്പെടുത്തണമെന്ന് കെ.എം.സി.സി

ദുബൈ: വിദേശരാജ്യങ്ങളിൽനിന്ന്​ ഇന്ത്യയിൽ എത്തുന്നവർക്ക്​ യാത്ര ഇളവ്​ നൽകിയവരുടെ പട്ടികയിൽ യു.എ.ഇയെയും ഉൾപ്പെടുത്തണമെന്ന്​ യു.എ.ഇ കെ.എം.സി.സി. പട്ടികയിൽനിന്ന്​ യു.എ.ഇയെ ഒഴിവാക്കിയ കേന്ദ്രസർക്കാർ നിലപാട്​ പ്രതിഷേധാർഹമാണ്​.

82 രാജ്യങ്ങളിൽനിന്നുള്ളവർ എയർപോർട്ടിൽ ആർ.ടി.പി.സി.ആർ ഹാജരാക്കേണ്ടതില്ലെന്ന പുതുക്കിയ നിയമം യു.എ.ഇക്കുകൂടി ബാധകമാക്കണം. ഇതു സംബന്ധിച്ച് പ്രസിഡന്‍റ്​ പുത്തൂർ റഹ്മാൻ ഇന്ത്യൻ വിദേശകാര്യ മന്ത്രി എസ്‌. ജയ്​ശങ്കറിനും സഹമന്ത്രി വി. മുരളീധരനും ആരോഗ്യ മന്ത്രി മൻസുഖ് മാണ്ഡവ്യക്കും കത്തയച്ചു.

യു.എ.ഇയിലെ ഭൂരിഭാഗം താമസക്കാരും വാക്സിൻ സ്വീകരിക്കുകയും കോവിഡ് വ്യാപനം നിയന്ത്രണവിധേയമാവുകയും ചെയ്ത സാഹചര്യത്തിൽ യു‌.എ.ഇയെ ഗ്രീൻ പട്ടികയിൽപെടുത്താത്തത്​ പ്രവാസികളോടുള്ള വിവേചനമാണെന്നും കത്തിൽ ചൂണ്ടിക്കാണിച്ചു.