ദുബൈയിൽ ഡ്രൈവിങ്​ സ്കൂൾ വാഹനങ്ങൾ​ നിരീക്ഷണത്തിലാണ്​; നിയമലംഘനങ്ങൾ ഓട്ടോമാറ്റിക്കായി കണ്ടെത്തും

ദുബൈ: എമിറേറ്റിലെ റോഡ്​ ഗതാഗത അതോറിറ്റി(ആർ.ടി.എ) ഡ്രൈവിങ്​ സ്​കൂൾ വാഹനങ്ങളെ നിരീക്ഷിക്കുന്നതിന്​ സജ്ജീകരിച്ച സ്മാർട്​ സംവിധാനം വിജയകരം. പരിശീലകരുടെയും ​പരിശീലിക്കപ്പെടുന്നവരുടെയും ഇടപെടലുകാളാണ്​ എ.​ഐ സാ​ങ്കേതികവിദ്യ സംയോജിപ്പിച്ച സംവിധാനം വഴി നിരീക്ഷിക്കുന്നത്​. 17ലക്ഷത്തിലേറെ പരിശീലന സെഷനുകൾ കഴിഞ്ഞ ഏഴ്​ മാസങ്ങളിൽ സംവിധാനം വഴി നിരീക്ഷിച്ചതായി അധികൃതർ വെളിപ്പെടുത്തി. 2,45,764 ട്രെയ്​നികളുടെ സെഷനുകളാണ്​ ഇതിലൂടെ പരിശോധിച്ചിട്ടുള്ളത്​. കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച്​ സംവിധാനം 14ഇരട്ടി നിരീക്ഷണങ്ങൾ ഇത്തവണ നടത്തിയിട്ടുണ്ട്​.

ഡ്രൈവിങ്​ സ്​കൂൾ വാഹനങ്ങളിൽ സ്ഥാപിച്ച കാമറകൾ വഴിയാണ്​ നിരീക്ഷണം നടത്തുന്നത്​. ഈ കാമറകൾ നിർമ്മിത ബുദ്ധി സാ​ങ്കേതിക വിദ്യയുമായി സംയോജിപ്പിച്ചതാണ്​. പരിശീലകരോ പരിശീലിക്കപ്പെടുന്നവരോ മൊബൈൽ ഉപയോഗിക്കുക, സീറ്റ്​ ബെൽറ്റ്​ ധരിക്കാതിരിക്കുക, നിശ്​ചിത പരിശീലന സോണുകൾക്ക്​ പുറത്തുപോവുക, യൂനിഫോം ധരിക്കാതിരിക്കുക, ഡ്രൈവ്​ ചെയ്യുമ്പോൾ തിന്നുകയോ കുടിക്കുകയോ ഉറങ്ങുകയോ ചെയ്യുക തുടങ്ങിയ നിയമലംഘനങ്ങൾ സംവിധാനം ഓട്ടോമറ്റിക്കലായി കണ്ടെത്തും.

ആർ.ടി.എയു​ടെ നിരീക്ഷണ സംവിധാനങ്ങളിൽ ഏറ്റവും നൂതനമായ രീതികൾ ഉപയോഗപ്പെടുത്തുന്നതിന്‍റെയും ഡിജിറ്റൽ പരിവർത്തനത്തിന്‍റെയും പ്രതിബദ്ധതയാണ്​ നേട്ടം പ്രതിഫലിപ്പിക്കുന്നതെന്ന്​ അധികൃതർ പത്രക്കുറിപ്പിൽ പറഞ്ഞു. അതോറിറ്റിയുടെ ലൈസൻസിങ്​ ഇന്‍റലിജൻസ്​ ഓപറേഷൻസ്​ സെന്‍ററാണ്​ പുതിയ സംവിധാനം നടപ്പിലാക്കുന്നത്​. ഇൻസ്​പെക്ടർമാരുടെ സ്മാർട്​ ടാബ്​ലെറ്റുകൾ വഴിയുള്ള സംവിധാനം പരിശോധന സമയം 20മിനുറ്റിൽ നിന്ന്​ ഒരു മിനുറ്റിലേക്ക്​ ചുരുക്കിയിട്ടുണ്ട്​. പുതിയ സംവിധാനം വഴി റെക്കോർഡ്​ ചെയ്യപ്പെടുന്ന നിയമലംഘനങ്ങളുടെ എണ്ണം അഞ്ചിരട്ടിയായിട്ടുമുണ്ട്​. പരിശീലന സേവനത്തിന്‍റെ ഗുണനിലവാരം മെച്ചപ്പെടുത്താനും ഏറ്റവും ഉയർന്ന സുരക്ഷ പാലിക്കാനും സ്മാർട്​ നീരീക്ഷണ സംവിധാനം സഹായിച്ചിട്ടുമുണ്ട്​.

ഫീൽഡ്​ നിരീക്ഷണ സംവിധാനത്തിന്‍റെ പരമ്പരാഗത രീതികളിൽ വലിയ മാറ്റത്തിന്​ തുടക്കം കുറിച്ചാണ്​ സ്മാർട്​ മോണിറ്ററിങ്​ സിസ്റ്റം രൂപപ്പെടുത്തിയത്​. ഡ്രൈവർമാരെ ഏറ്റവും ഉയർന്ന നിലവാരത്തിൽ രൂപപ്പെടുത്തിയെടുക്കുന്ന പരിശീലന അന്തരീക്ഷം ഒരുക്കുകയും സുരക്ഷ ഉറപ്പാക്കുകയും ചെയ്യുകയാണിത്​. ദുബൈ സർക്കാറിന്‍റെ ഡിജിറ്റൽ പരിവർത്തന നയത്തിന്​ അനുസരിച്ചാണിത്​ നടപ്പിലാക്കിയിരിക്കുന്നത്​. ഈ വർഷം സംവിധാനത്തിൽ പുതിയ ചില സജ്ജീകരണങ്ങൾ കൂടി ഉൾപ്പെടുത്തിയിരുന്നു.