ഫ്ലാറ്റിൽ യുവാക്കളെ മർദിച്ചശേഷം 15,000 റിയാലുമായി കടന്നു

ജുബൈൽ (സൗദി): ആയുധങ്ങളുമായി എത്തിയ രണ്ടംഗ സംഘം ബാച്​ലർ ഫ്ലാറ്റിൽ യുവാക്കളെ മർദിച്ചശേഷം 15,000 റിയാലുമായി കടന്നു. കഴിഞ്ഞ ദിവസം പുലർച്ച 5.30നായിരുന്നു സംഭവം. കർണാടക സ്വദേശി മുഷ്താഖും സുഹൃത്തുക്കളും താമസിക്കുന്ന ഫ്ലാറ്റിൽനിന്നാണ് പണം കവർന്നത്. നെസ്‌റ്റോക്ക് എതിർവശത്ത് തമീമിക്ക് സമീപം താമസ സ്ഥലത്തെ വാതിലിൽ മുട്ടുകേട്ട് തുറന്നു നോക്കിയതാണ് കാരണമായത്. ​ൈകയിൽ ചാക്കും തോക്കും ആയുധങ്ങളുമായി രണ്ടു പേർ മുറിക്കുള്ളിലേക്ക് കയറി. ഭീഷണിപ്പെടുത്തുകയും മർദിക്കുകയും ചെയ്തശേഷം പണം തട്ടിയെടുക്കുകയായിരുന്നു.

ഇവരുമായുള്ള പിടിവലിയിൽ യുവാക്കൾക്ക് നേരിയ പരിക്കേറ്റു. യുവാക്കൾ പൊലീസിൽ പരാതി നൽകി. മോഷ്​ടാക്കൾ പുറത്തുനിൽകുന്ന ഫോട്ടോയും മുഷ്താഖി​​െൻറ വോയിസ് ക്ലിപ്പും സമൂഹമാധ്യമങ്ങളിൽ പ്രചരിക്കുന്നുണ്ട്. ഏതാനും ദിവസം മുമ്പ് ജുബൈൽ മഷ്ഹൂർ സ്ട്രീറ്റിൽ അബ്​ദുൽ കരീം കാസിമിയുടെ ഉടമസ്ഥതയിലുള്ള ഓഫിസ് മേറ്റ് സ്​റ്റേഷനറി എന്ന സ്ഥാപനം കുത്തിത്തുറന്ന് 5000 റിയാലി​​െൻറ സാധനങ്ങൾ കവർച്ച ചെയ്തിരുന്നു. മോഷ്​ടിച്ച സ്കൂട്ടറിൽ എത്തിയ മൂന്നംഗ സംഘമാണ് മോഷണം നടത്തിയത്. സംഘം ഉപേക്ഷിച്ചുപോയ കട്ടറും പൊലീസ് കണ്ടെടുത്തിരുന്നു. സി.സി ടി.വി പരിശോധിച്ചുള്ള അന്വേഷണവും നടന്നു. എന്നാൽ, മോഷ്​ടാക്കളെ ഇനിയും കണ്ടെത്തിയിട്ടില്ലെന്ന്​ സ്ഥാപന ഉടമ അറിയിച്ചു.