താമസക്കാരുടെ വിവരങ്ങൾ: രജിസ്റ്റർ ചെയ്യുന്നത്​ എങ്ങിനെ ?

ദുബൈയിലെ താമസക്കാർ ഒപ്പം താമസിക്കുന്നവരുടെ വിവരങ്ങൾ അറിയിക്കണമെന്ന്​ സർക്കാർ നിർദേശിച്ചിരിക്കുകയാണ്​. രണ്ടാഴ്ചയാണ്​ ഇതിന്​ സമയം അനുവദിച്ചിരിക്കുന്നത്​. കൂടെ താമസിക്കുന്ന എല്ലാവരുടെയും ​വിവരങ്ങൾ ഉൾപെടുത്തണമെന്നാണ്​ നിർദേശം. ഇതുമായി ബന്ധപ്പെട്ട സംശയങ്ങൾക്കുള്ള മറുപടികൾ:

ആരൊക്കെ രജിസ്റ്റർ ചെയ്യണം

താമസ സ്ഥലങ്ങൾ സ്വന്തമായി വാങ്ങിയവരും വാടകക്കെടുത്തവരും പ്രോപ്പർട്ടി മാനേജ്​മെന്‍റ്​ കമ്പനികളും ഡെവലപ്പർമാരും രജിസ്റ്റർ ചെയ്യണം. ആരുടെ പേരിലാണോ വാടക കരാർ എഴുതിയിരിക്കുന്നത്​ അവരാണ്​ രജിസ്റ്റർ ചെയ്യേണ്ടത്​. ദുബൈ ലാൻഡ്​ ഡിപാർട്ട്​മെന്‍റാണ്​ നിർദേശം പുറപ്പെടുവിച്ചിരിക്കുന്നത്​. അതിനാൽ, ദുബൈ എമിറേറ്റിലെ താമസക്കാർക്ക്​ മാത്രമാണ്​ നിർദേശം ബാധകം.

​ആരെയൊക്കെ ഉൾപെടുത്തണം:

കൂടെ താമസിക്കുന്ന എല്ലാവരുടെയും ​വിവരങ്ങൾ ഉൾപെടുത്തണം. കുടുംബാംഗങ്ങളോടൊപ്പമാണ്​ താമസമെങ്കിൽ അവരുടെ പേരും വേണം. ഒരിക്കൽ രജിസ്റ്റർ ചെയ്ത പേരുകൾ ഇതിൽ നിന്ന് ഒഴിവാക്കാനും കൂട്ടിചേർക്കനും സൗകര്യമുണ്ടാകും.

എന്തൊക്കെ വിവരങ്ങൾ നൽകണം:

കൂടെ താമസിക്കുന്നവരുടെ പേര്​, എമിറേറ്റ്​സ്​ ഐ.ഡി, ​ജനന തീയതി എന്നിവ ഉൾപെടുത്തണം. ഒപ്പം താമസിക്കുന്നവരുടെ വിവരങ്ങൾ സഹിതമാകും ഇനി മുതൽ വാടകകരാറുകൾ തയാറാക്കുക.

എങ്ങിനെയാണ്​ രജിസ്റ്റർ ചെയ്യേണ്ടത്​:

ദുബൈ റസ്റ്റ്​ (Dubai REST) എന്ന ആപ്പ്​ ഡൗ​ൺലോഡ്​ ചെയ്യണം.

ആദ്യമായി ആപ്പ്​ ഉപയോഗിക്കുന്നവരാണെങ്കിൽ രജിസ്റ്റർ ചെയ്യണം. അല്ലാത്തവർക്ക്​ നേരിട്ട്​ ലോഗിൻ ചെയ്യാം

യു.എ.ഇ പാസ്​ ഉപയോഗിച്ചും ലോഗിൻ ചെയ്യാം

ഇൻഡിവിജുവൽ എന്ന ഭാഗമാണ്​ തെരഞ്ഞെടുക്കേണ്ടത്​

യു.എ.ഇ പാസ്​ വഴി ഓതന്‍റിക്കേഷൻ ഉറപ്പാക്കണം

ഡാഷ്​ബോർഡിൽ നിങ്ങളുടെ താമസ സ്ഥലം എവിടെയാണെന്ന്​ തെരഞ്ഞെടുക്കണം

മാനേജ്​ കോ-ഒക്യുപന്‍റ്​സ്​ എന്ന ഭാഗം തെരഞ്ഞെടുക്കണം

ആഡ്​ മോർ എന്ന ഭാഗത്ത്​ സഹതാമസക്കാരുടെ വിവരങ്ങൾ നൽകണം

എമിറേറ്റ്​സ്​ ഐ.ഡിയും ജനന തീയതിയും നൽകിയ ശേഷം 'വേരിഫൈ' കൊടുക്കണം

എല്ലാവരുടെയും പേര്​ വിവരങ്ങൾ ചേർക്കണം

പേര്​ ചേർത്ത ആരെ​യെങ്കിലും ഒഴിവാക്കണമെങ്കിൽ 'ഡിലീറ്റ്​' ഓപ്​ഷനുമുണ്ട്​