പെരുന്നാളിന്​ 1907 തടവുകാർക്ക്​ മോചനം

ദുബൈ: രാജ്യത്തെ വിവിധ ജയിലുകളിൽ ശിക്ഷ അനുഭവിച്ചു വന്ന  1907 തടവുകാർക്ക്​ ബലി പെരുന്നാൾ പ്രമാണിച്ച്​ മോചനം. യു.എ.ഇ പ്രസിഡൻറ്​ ശൈഖ്​ ഖലീഫ ബിൻ സായിദ്​ ആൽ നഹ്​യാൻ അബൂദബി എമിറേറ്റിലെ ജയിലുകളിൽ കഴിയുന്ന 803 തടവുകാര്‍ക്ക് മോചനം പ്രഖ്യാപിച്ചിരുന്നു. യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം   543 തടവുകാർക്ക്​  മോചനം പ്രഖ്യാപിച്ചു.  മാപ്പു നൽകാനുള്ള ശൈഖ്​ മുഹമ്മദി​​െൻറ തീരുമാനം തടവുകാർക്ക്​ പുതു ജീവിതം ആരംഭിക്കാനും കുടുംബങ്ങൾക്ക്​ സന്തോഷം പകരാനും ഉപകരിക്കുമെന്ന്​ ദുബൈ അറ്റോണി ജനറൽ ഇസ്സാം ഇസ്സ അൽ ഹുമൈദാൻ പറഞ്ഞു. സമൂഹത്തിൽ ഗുണകരമായി ഇടപഴകാനും അവർക്ക്​ കഴിയും.
ഉത്തരവ്​ നടപ്പാക്കാൻ ആവശ്യമായ നിയമനടപടികൾ പബ്ലിക്​ പ്രോസിക്യുഷൻ ആരംഭിച്ചതായും അൽ ഹുമദാൻ അറിയിച്ചു.  
അജ്​മാനിൽ 92 തടവുകാർക്ക്​ മോചനം നൽകാനാണ്​ സുപ്രീം കൗൺസിൽ അംഗവും അജ്മാൻ ഭരണാധികാരിയുമായ ശൈഖ് ഹുമൈദ് ബിൻ റാഷിദ് അൽ നുഐമി ഉത്തരവിട്ടത്​. ശിക്ഷാ കാലയളവില്‍  കാഴ്ച്ചവെച്ച നല്ല പെരുമാറ്റം കണക്കിലെടുത്താണ് ഇളവ് നല്‍കുന്നത്.  അവര്‍ക്ക് പുതിയ ജീവിതം കെട്ടിപ്പടുക്കാനും സമൂഹത്തില്‍ നല്ല ഇടപെടലുകള്‍ക്കും ഇത്  അവസരം നല്‍കും.   തീരുമാനം സമൂഹത്തില്‍ ഗുണകരമായ സ്വാധീനം ചെലുത്തുമെന്ന് ശൈഖ്​ ഹുമൈദ് ബിൻ റാഷിദ് അൽ നുഐമി പറഞ്ഞു. തടവുകാർക്ക് മാപ്പു നൽകാനുള്ള   ശൈഖ്  ഹുമൈദ് ബിൻ റാഷിദ് അൽ നുഐമിയുടെ തീരുമാനത്തിനു അജ്മാൻ പൊലീസിലെ കമാൻഡർ ഇൻ ചീഫ് ബ്രിഗേഡിയര്‍  ജനറൽ അഹമദ് അബ്​ദുല്ല അല്‍ ഹമ്രാനി  നന്ദി പറഞ്ഞു.
 ഷാർജയിൽ ബലിപെരുന്നാള്‍ പ്രമാണിച്ച് 117 തടവുകാര്‍ക്ക് മോചനം നല്‍കാന്‍ സുപ്രീം കൗണ്‍സില്‍ അംഗവും ഷാര്‍ജ ഭരണാധികാരിയുമായ ശൈഖ് ഡോ. സുല്‍ത്താന്‍ ബിന്‍ മുഹമ്മദ് ആല്‍ ഖാസിമി ഉത്തരവിട്ടു. ക്രിമിനല്‍ കുറ്റങ്ങളില്‍പ്പെടാത്ത വിവിധ രാജ്യക്കാരായ തടവുകാർക്കാണ്​  മോചനം ലഭിക്കുക. ജയില്‍വാസ കാലത്തെ പെരുമാറ്റവും മറ്റും പരിഗണിച്ചാണ് വിട്ടയക്കുന്നവരുടെ പട്ടിക തയ്യാറാക്കിയതെന്ന് ഷാർജ പൊലീസ് അധികൃതർ പറഞ്ഞു. ശിഷ്ടകാലം കുടുംബത്തോടൊപ്പം നല്ല നിലയില്‍ ജീവിക്കാന്‍ ഭരണാധികാരി ആശംസിച്ചു. 
സുപ്രിം കൗൺസിൽ അംഗവും ഫു​ൈജറ ഭരണാധികാരിയുമായ ശൈഖ്​ ഹമദ്​ ബിൻ മുഹമ്മദ്​ അൽ ശർഖി 47 തടവുകാർക്ക്​ മോചനം നൽകാൻ ഉത്തരവിട്ടു. 
 മോചനം ലഭിക്കുന്നവർക്ക്​ മികച്ച പുതുജീവിതം സാധ്യമാക്കുമെന്ന്​ ​ഫുജൈറ പൊലീസ്​ മേധാവി മേജർ ജനറൽ മുഹമ്മദ്​ അഹ്​മദ്​ ബിൻ ഘാനം പറഞ്ഞു. 
റാസൽ ഖൈമ ഭരണാധികാരിയും സുപ്രിം കൗൺസിൽ അംഗവുമായ ശൈഖ്​ സൗദ്​ ബിൻ സഖർ അൽ ഖാസിമി 305 തടവുകാരെ മോചിപ്പിക്കാൻ തീരുമാനിച്ചു. തടവുകാലത്ത്​ നല്ല ജീവിതശീലങ്ങൾ പുലർത്തിയവർക്കാണ്​ മോചനം.  
സുപ്രിം കൗൺസിൽ അംഗവും ഉമ്മുൽഖുവൈൻ ഭരണാധികാരിയുമായ ശൈഖ്​ സഉൗദ്​ ബിൻ റാശിദ്​ അൽ മുഅല്ലയും എമിറേറ്റിലെ ജയിലുകളിൽ നിന്ന്​  തടവുകാരെ മോചിപ്പിക്കാൻ തീരുമാനിച്ചിട്ടുണ്ട്​. ഉമ്മുൽഖുവൈനിൽ നിന്ന്​ മോചനം ലഭിക്കുന്നവരുടെ എണ്ണം വ്യക്​തമായിട്ടില്ല.