മനാഫിന്‍റെ മൃതദേഹം ഏറ്റുവാങ്ങാൻ ബന്ധുക്കളെത്തി; നാട്ടിലേക്ക്​ കൊണ്ടു പോകും

ദുബൈ: രണ്ടാഴ്ചയായി റാസൽഖൈമ പൊലീസ്​ മോർച്ചറിയിൽ സൂക്ഷിച്ചിരുന്ന കൊല്ലം ചവറ സ്വദേശി മനാഫ്​ ഗഫൂറിന്‍റെ (57) മൃതദേഹം ഏറ്റുവാങ്ങാൻ ബന്ധുക്കളെത്തി. മനാഫിന്‍റെ സഹോദരന്‍റെ മകനും മറ്റൊരു ബന്ധുവുമാണ്​ ബുധനാഴ്ച മോർച്ചറിയിലെത്തി മൃതദേഹം തിരിച്ചറിഞ്ഞത്​. നടപടിക്രമങ്ങൾ പൂർത്തിയാക്കി മൃതദേഹം നാട്ടിലേക്ക്​ കൊണ്ടുപോകും.

ഈ മാസം ആറിനാണ്​ മനാഫിന്‍റെ മൃതദേഹം റാസൽഖൈമയിലെ ഒരു മരച്ചുവട്ടിൽ പൊലീസ്​ കണ്ടെത്തിയത്​. തുടർന്ന്​ യു.എ.ഇയിലെ മലയാളി സാമൂഹിക പ്രവർത്തകരുമായി ബന്ധപ്പെട്ട്​ മരിച്ചത്​ ആരാണെന്ന്​ തിരിച്ചറിയാനും ബന്ധുക്കളെ കണ്ടെത്താനുമുള്ള ശ്രമങ്ങൾ പൊലീസും ഇന്ത്യൻ കോൺസുലേറ്റും​ നടത്തി.

സഫ മൻസിൽ, മടപ്പള്ളി, മുകുന്ദപുരം പി.ഒ, ചവറ, കൊല്ലം എന്ന വിലാസം ലഭിച്ചെങ്കിലും കൃത്യമായ വിവരങ്ങൾ ക​ണ്ടെത്താനായില്ല. തുടർന്ന്​ മാധ്യമങ്ങളിലും സമൂഹ മാധ്യമങ്ങളിലും ചിത്രമടക്കം വാർത്ത നൽകിയതോടെ സഹോദരന്‍റെ മകനും ബന്ധുവും സാമൂഹിക പ്രവർത്തകൻ നസീർ വാടാനപ്പള്ളിയുമായി ബന്ധപ്പെടുകയും മോർച്ചറിയിലെത്തി മൃതദേഹം തിരിച്ചറിയുകയുമായിരുന്നു. പിതാവ്​: ഗഫൂർ, മാതാവ്​: റംലത്ത്​ ബീവി, ഭാര്യ: സുൽഫത്ത്​ ബീവി​.