ആറ്​ മാസത്തിൽ കൂടുതൽ നാട്ടിൽ തങ്ങിയ യു.എ.ഇ വിസക്കാർക്ക്​​ റി എൻട്രി പെർമിറ്റ്​

ദുബൈ: ആറ്​ മാസത്തിൽ കൂടുതൽ യു.എ.ഇയുടെ പുറത്ത്​ തങ്ങിയ റസിഡന്‍റ്​ വിസക്കാർക്ക്​ റി എൻട്രി പെർമിറ്റ്​ അനുവദിച്ച്​ യു.എ.ഇ. ഇതോടെ, ആറ്​ മാസത്തിൽ കൂടുതൽ നാട്ടിൽ തങ്ങിയതിന്‍റെ പേരിൽ വിസ റദ്ദായവർക്ക്​ വീണ്ടും അതേ വിസയിൽ രാജ്യത്തെത്താൻ കഴിയും. ഇത്​ സംബന്ധിച്ച്​ ഫെഡറൽ അതോറിറ്റി ഫോർ ഐഡന്‍റിറ്റി, സിറ്റിസൺഷിപ്പ്​ (ഐ.സി.പി) നിർദേശം പുറത്തിറക്കി. https://smartservices.icp.gov.ae/echannels/web/client/guest/index.html#/dashboard എന്ന ലിങ്ക്​ വഴി റി എൻട്രിക്ക്​ അപേക്ഷിക്കാം.

യു.എ.ഇ റസിഡന്‍റ്​ വിസയുള്ളവർ ആറ്​ മാസത്തിനിടയിൽ രാജ്യത്ത്​ പ്രവേശിക്കണമെന്നാണ്​ നിയമം. അല്ലാത്തപക്ഷം വിസ റദ്ദാവും. ഇങ്ങനെ വിസ റദ്ദാവുന്നവർക്ക്​ ആശ്വാസമാണ്​ പുതിയ നിർദേശം. റി എൻട്രി അനുമതി ലഭിച്ച്​ 30 ദിവസത്തിനകം യു.എ.ഇയിൽ പ്രവേശിച്ചിരിക്കണം. യു.എ.ഇയുടെ പുറത്ത്​ നിന്നായിരിക്കണം അപേക്ഷ സമർപ്പിക്കേണ്ടത്.

പുറത്തുനിന്ന ഓരോ 30 ദിവസത്തിനും 100 ദിർഹം പിഴ നൽകണം. ഇതിന്​ പുറമെ ഐ.സി.പിയുടെ നിരക്കായ 150 ദിർഹമും ഫീസായി അടക്കണം. അപേക്ഷ നിരസിച്ചാൽ 800 ദിർഹം തിരികെ ലഭിക്കും. രാജ്യത്തിന്​ പുറത്ത്​ താമസിക്കാനിടയായതിന്‍റെ കാരണവും വ്യക്​തമാക്കണം.