ദുബൈയിൽ എലിക്കെണിയും  ഇനി ഹൈടെക്​ 

ദുബൈ: എലിയെപ്പിടിക്കാൻ സ്​മാർട്ട്​ കെണിയൊരുക്കി ദുബൈ മുനിസിപ്പാലിറ്റി. ഒരേ സമയം 20 എലികളെ വരെ പിടികൂടാൻ സൗകര്യമുള്ള ഹൈടെക്​ കെണിയാണ്​ നഗരസഭയുടെ പെസ്​റ്റ്​ കൺട്രോൾ വിഭാഗം ഒരുക്കിയിരിക്കുന്നത്​. കെണിവെച്ച സ്​ഥലത്ത്​ എലിയോ പെരുച്ചാഴിയോ മറ്റു ക്ഷുദ്രജീവികളോ വന്നാലുടൻ പെസ്​റ്റ്​ കൺട്രോൾ വിഭാഗത്തിലേക്ക്​ സന്ദേശമെത്തുമെന്ന്​ വിഭാഗം മേധാവി ഹിഷാം അബ്​ദുൽ റഹ്​മാൻ പറഞ്ഞു. ഏതു കെണിയിലാണ്​ ജീവികൾ പ്രവേശിച്ചതെന്നും എത്രയെണ്ണം കുടുങ്ങിയെന്നും ഇതിൽ നിന്ന്​ വ്യക്​തമാവും.  ചത്ത എലികളെ യഥാസമയം  നീക്കം ചെയ്യുന്നതിനും ഇതുമൂലം കഴിയും.വൈദ്യുതി ആഘാതത്തിലാണ്​ ഇവയെ കൊല്ലുക. 

സ്​മാർട്ട്​ സംവിധാനം ഏർപ്പെടുത്തുന്നതോടെ എലി നശീകരണത്തിന്​ ചെലവും സമയവും കുറച്ച്​ മതിയാവും.   പരിസ്​ഥിതിയും വിളയും സംരക്ഷിക്കാനും വ്യവസായ^വാണിജ്യ വിനോദ സഞ്ചാര മേഖലകളെ ക്ഷുദ്രജീവി സാന്നിധ്യത്തിൽ നിന്ന്​ മുക്​തമാക്കാനും ഇതു വഴി കഴിയുമെന്നാണ്​ പ്രതീക്ഷിക്കുന്നത്​. മുഹമ്മദ്​ ബിൻ റാശിദ്​ ബൊലിവാർഡ്​, ദുബൈ മാൾ മേഖലകളിലാണ്​ ആദ്യഘട്ടത്തിൽ ഇതു സ്​ഥാപിക്കുക. ​തങ്ങളുടെ പ്രദേശങ്ങളിൽ പ്രാണി^ക്ഷുദ്രജീവി ശല്യം ശ്രദ്ധയിൽപ്പെട്ടാൽ 800900 നമ്പറിൽ അറിയിക്കണമെന്നും നഗരസഭ ജനങ്ങളെ ഉണർത്തുന്നു.