'സ്വപ്​നങ്ങളുടെ തടാക'ത്തിലേക്ക്​ റാശിദ്​ റോവർ അടുത്ത വർഷം കുതിക്കും

ദുബൈ: അറബ്​ ലോകത്തെ ആദ്യ ചാന്ദ്രദൗത്യമായ യു.എ.ഇയുടെ 'റാശിദ്​ റോവർ' അടുത്ത വർഷം വിക്ഷേപിക്കും.

സ്വപ്​നതടാകം എന്നർഥമുള്ള 'ലാകസ്​ സോംനിയോറം' എന്ന ഭാഗത്തായിരിക്കും ചന്ദ്രനിൽ റാശിദ്​ ഇറങ്ങുക​യെന്ന്​ എമിറേറ്റ്​സ്​ ലൂണാർ മിഷൻ പദ്ധതി മാനേജർ ഡോ. ഹമദ്​ അൽ മർസൂഖി അറിയിച്ചു. 2022 ആഗസ്​റ്റിനും നവംബറിനുമിടയിലാണ്​ വിക്ഷേപണം ലക്ഷ്യമിടുന്നത്​. 'സ്വപ്​നതടാകം' പ്രാഥമിക ലാൻഡിങ്​ സൈറ്റാണ്. മറ്റു മൂന്നുസ്ഥലങ്ങൾ അടിയന്തരഘട്ടത്തിൽ ഉപയോഗിക്കാനായി ​െതരഞ്ഞെടുത്തിട്ടുണ്ട്​ -അദ്ദേഹം പറഞ്ഞു.

റാശിദ്​ റോവർ നിലവിൽ മുഹമ്മദ് ബിൻ റാഷിദ് ബഹിരാകാശകേന്ദ്രത്തിനു കീഴിൽ പരീക്ഷണത്തിന്​ വിധേയമാക്കുകയാണ്​. യു.എ.ഇ, ഫ്രാൻസ്​, ജപ്പാൻ തുടങ്ങിയ സ്ഥലങ്ങളിലാണ്​ പരീക്ഷണം പുരോഗമിക്കുന്നത്​. റാഷിദ് റോവറി​െൻറ ആദ്യ പ്രോട്ടോടൈപ്പ് പരീക്ഷണം വിജയകരമായി അവസാനിച്ചതായി കഴിഞ്ഞമാസം ബഹിരാകാശ കേന്ദ്രം അറിയിച്ചിരുന്നു. അടുത്ത ഘട്ടത്തിൽ റോവറി​െൻറ കൃത്യത പരിശോധിക്കുന്ന പരീക്ഷണമാണ്​ നടക്കുക.

യു.എ.ഇ നിർമിത റാശിദ്​ റോവർ അടുത്ത വർഷം സ്പേസ് എക്​സ്​ ഫാൽക്കൺ-ഒമ്പത്​ റോക്കറ്റിൽ അമേരിക്കയിലെ ഫ്ലോറിഡയിലെ കെന്നഡി ബഹിരാകാശ കേന്ദ്രത്തിൽനിന്ന് വിക്ഷേപിക്കാനാണ്​ തീരുമാനിച്ചത്​. ജാപ്പനീസ് കമ്പനിയായ ഐ സ്​പേസ്​ വികസിപ്പിച്ച ഹകുതോ-ആർ എന്ന ലാൻഡറാണ്​ ഇതിന്​ ഉപയോഗിക്കുക.

ഭൂമിയിൽനിന്ന് ചന്ദ്രോപരിതലത്തിലേക്ക്​ എത്തിച്ചേരാൻ മൂന്ന് മാസമെടുക്കുമെന്നാണ്​ കണക്കുകൂട്ടുന്നത്​. വിജയകരമായാൽ അറബ്​ ലോകത്തെ ആദ്യ ചാന്ദ്രദൗത്യമായിത്തീരുമിത്​. അമേരിക്ക, സേവിയറ്റ്​ യൂനിയൻ, ചൈന എന്നിവക്ക്​ ശേഷം ചാന്ദ്രദൗത്യം വിജയിപ്പിക്കുന്ന രാജ്യമായി യു.എ.ഇയും ജപ്പാനും മാറുകയും ​ചെയ്യും. അന്തരിച്ച യു.എ.ഇ വൈസ്​ പ്രസിഡൻറും ദുബൈ ഭരണാധികാരിയുമായ ശൈഖ്​ റാശിദ്​ ബിൻ സഈദ്​ ആൽ മക്​തൂമി​െൻറ നാമധേയത്തിലാണ്​ പദ്ധതി അറിയപ്പെടുന്നത്​.

ചന്ദ്രനിലെ 'സ്വപ്​നങ്ങളുടെ തടാകം'

ലാകസ്​ സോംനിയോറം എന്ന ചന്ദ്രനിലെ 'സ്വപ്​നങ്ങളുടെ തടാകം' ഗ്രഹത്തി​െൻറ വടക്കുകിഴക്കൻ ഭാഗത്ത്​ ഭൂമിയോട്​ ഏറ്റവും അടുത്ത ഭാഗത്തെ സമതലപ്രദേശമാണ്​​.

കുറഞ്ഞ ഗർത്തങ്ങളുള്ള സുഗമമായ ഉപരിതലമാണിതെങ്കിലും ഇവിടത്തെ സാഹചര്യം പ്രവചനാതീതമാണ്. 16ാം നൂറ്റാണ്ടിലെ ഇറ്റാലിയൻ ജ്യോതിശാസ്ത്രജ്ഞനും കത്തോലിക്കാ പുരോഹിതനുമായ ജിയോവന്നി റിക്കിയോലിയാണ്​ ഇതിന്​ 'ലാകസ്​ സോംനിയോറം' എന്ന പേരിട്ടത്​.