റമദാനിൽ സമഗ്ര മാലിന്യ  സംസ്​കരണത്തിനൊരുങ്ങി നഗരസഭ

ദുബൈ: റമദാൻ മാസത്തിൽ​ നഗരം വൃത്തിയും സുന്ദരവുമായി നിലനിർത്താനും സമ​ഗ്രമായ മാലിന്യ സംസ്​കരണത്തിനും വിശദ പദ്ധതിയുമായ ദുബൈ നഗരസഭ. ഭക്ഷണ അവശിഷ്​ടങ്ങളുടെ അളവ്​ താരതമ്യേന കൂടുതലാകയാൽ അവ നിക്ഷേപിക്കുന്നതിന്​ പള്ളികൾ, ഇഫ്​താർ ട​െൻറുകൾ എന്നിവക്കടുത്തായി കൂടുതൽ കുട്ടകളും നീക്കം ചെയ്യാൻ കൂടുതൽ ജീവനക്കാരെയും ഒരുക്കിയിട്ടുണ്ട്. അടിയന്തിര സാഹചര്യം നേരിടാൻ കൂടുതൽ വാഹനങ്ങളും ജീവനക്കാരും സജ്ജമാണ്​. ജനങ്ങളിൽ നിന്ന്​ പരാതിയോ നിർദേശങ്ങളോ ലഭിച്ചാൽ അവിടെയെത്തി ഇവ കൈകാര്യം ചെയ്യുന്നതിന്​ 70 തൊഴിലാളികളുൾക്കൊള്ളുന്ന11 മുതൽ അഞ്ചു മണി വരെ നീളുന്ന പ്രത്യേക ഷിഫ്​റ്റും തയ്യാറാക്കിയിട്ടുണ്ട്​.

റോഡ്​ ശുചീകരണം, ബോട്ട്​ ശുചീകരണം,  ജല ഗതാഗത മാർഗങ്ങളുടെ ശുചീകരണം എന്നിവയും  ഫീൽഡ്​ സന്ദർ​ശനവും പൊതുജനങ്ങൾക്കായി കൂടുതൽ ബോധവത്​കരണ പരിപാടികളും സംഘടിപ്പിക്കുമെന്ന്​ മാലിന്യ നിർമാർജന വിഭാഗം മേധാവി അബ്​ദുൽ മജീദ്​ സിഫാഇ വ്യക്​തമാക്കി. 
മികച്ച ഷോപ്പിങ്​ രീതികൾ സംബന്ധിച്ച്​ ഉപഭോക്​താക്കൾക്ക്​ അവബോധം പകരലാണ്​ മറ്റൊരു പദ്ധതി. വീടുകളിൽ മാലിന്യം വർധിക്കുന്നതു തടയാനും പരിസ്​ഥിതി സൗഹൃദ ബാഗുകൾ ഉപ​േയാഗിക്കാനും ജനങ്ങളെ പ്രേരിപ്പിക്കും. 

ഖിസൈസിലെ മാലിന്യം തള്ളൽ കേന്ദ്രം 24 മണിക്കൂറും പ്രവർത്തിക്കും. നിർമാണ സൈറ്റുകളിലെ അവശിഷ്​ടങ്ങൾ നിക്ഷേപിക്കാനുള്ള ബയാദ കേന്ദ്രം പുലർച്ചെ അഞ്ചു മുതൽ വൈകീട്ട്​ അഞ്ചു മണിവരെയും രാത്രി ഒമ്പതു മുതൽ പുലർച്ചെ മൂന്നു മണി വരെയും  പ്രവർത്തിക്കും. ഹബ്ബാബ്​, വർസാൻ മാലിന്യ സംഭരണ കേന്ദ്രങ്ങൾ പുലർച്ചെ അഞ്ചു മുതൽ 11 വരെ തുറന്നിടും. ജബൽ അലിയിലെ മാലിന്യ സംസ്​കരണ പ്ലാൻറ്​ രാവിലെ ഏഴു മുതൽ 12 മണി വരെയും 12 മുതൽ അഞ്ചു മണി വരെയും രണ്ടു ഷിഫ്​റ്റുകളായി പ്രവർത്തിക്കും.