റമദാൻ രാത്രി മാർക്കറ്റിൽ ഒമ്പത്​ ഗിന്നസ്​ റെക്കോർഡുകളൊരുങ്ങും

ദുബൈ: ജുൺ ഒന്നു മുതൽ 10 വരെ ദുബൈ വേൾഡ്​ ട്രേഡ്​ സ​​െൻററിൽ നടത്തുന്ന ഇൗ വർഷത്തെ റമദാൻ രാത്രി മാർക്കറ്റിൽ ഒമ്പതു ലോക റെക്കോർഡുകൾ സ്​ഥാപിക്കാൻ അരങ്ങൊരുക്കം.  
കുട്ടികൾക്കും മുതിർന്നവർക്കും ഒരുപോലെ ആനന്ദകരമായി പങ്കുചേരാവുന്ന പരിപാടികൾക്കിടയിലാണ്​ റെക്കോർഡുകൾക്ക്​ ശ്രമം നടത്തുക. ഇതിനായി മൂന്ന്​ വിഭാഗമായി തിരിച്ച്​ മൂന്നു ദിവസങ്ങളിലായി വൈവിധ്യമാർന്ന പ്രകടനങ്ങൾ സംഘടിപ്പിക്കും. 
ജൂൺ എട്ടിന്​ ഒരു മിനിറ്റു കൊണ്ട്​ ഏറ്റവുമധികം കൈമുദ്രകൾ പതിപ്പിച്ചും കടലാസ്​ വിമാനങ്ങൾ തയ്യാറാക്കിയും പെൻസിലുകൾ നിരയായി നിർത്തിയുമാണ്​ റെക്കോർഡുകൾ സ്​ഥാപിക്കാൻ ശ്രമിക്കുക. ജൂൺ ഒമ്പതിന്​​ ഭക്ഷണമാണ്​ പ്രമേയം. അറേബ്യൻ കാപ്പി കപ്പുകൾ കൊണ്ട്​ ഏറ്റവും വേഗത്തിൽ പിരമിഡുകൾ നിർമിച്ചും, ഒരു മിനിറ്റു കൊണ്ട്​ ഏറ്റവുമധികം ഹോട്ട്​ഡോഗുകൾ നിർമിച്ചും കണ്ണുകെട്ടി ഏറ്റവും എളുപ്പത്തിൽ പത്തു പഴ വർഗങ്ങൾ തിരിച്ചറിഞ്ഞും ഗിന്നസ്​ പ്രവേശന ശ്രമം നടത്തും. പത്തിന്​ സംഗീത രാത്രിയാണ്​. ഒരു മിനിറ്റു കൊണ്ട്​ ഏറ്റവും ദൈർഘ്യമുള്ള പാട്ടുപാടിയും കൂടുതൽ താളം പിടിച്ചും കൂടുതൽ സംഗീത ഉപകരണങ്ങളുടെ ചിത്രങ്ങൾ കണ്ടെത്തിയും മത്സരം നടക്കും. 
പത്തു ദിവസവും രാത്രി എട്ടു മുതൽ പുലർച്ചെ രണ്ടു മണി വരെയാണ്​ മാർക്കറ്റ്​ പ്രവർത്തിക്കുക. അഞ്ച്​ ദിർഹമാണ്​ ടിക്കറ്റ്​ നിരക്ക്​.