‘ശക്​തി’ക്ക്​ പിന്നാലെ യു.എ.ഇയിൽ ചില ഭാഗങ്ങളിൽ മഴ

ദുബൈ: അറബികടലിൽ രൂപംകൊണ്ട ‘ശക്തി’ ചുഴലിക്കാറ്റിന്​ പിന്നാലെ യു.എ.ഇയിലെ ചില ഭാഗങ്ങളിൽ ഞായറാഴ്ച ശക്​തമായ മഴ ലഭിച്ചു. മലയോര പ്രദേശമായ മസാഫിയിലാണ്​ ശക്​തമായ മഴ രേഖപ്പെടുത്തിയത്​. മഴയുടെ സാഹചര്യത്തിൽ ചില ഭാഗങ്ങളിൽ കാലാവസ്ഥ നിരീക്ഷണകേന്ദ്രം ഓറഞ്ച്​, യെല്ലോ അലർട്ടുകൾ പ്രഖ്യാപിച്ചിരുന്നു. അസ്ഥിര കാലാവസ്ഥയുടെ പശ്​ചാത്തലത്തിൽ ഖോർഫക്കാൻ അടക്കമുള്ള സ്ഥലങ്ങളിൽ കടൽക്ഷേഭവുമുണ്ടായി.

യു.എ.ഇയുടെ കിഴക്കൻ തീര മേഖലയിലാണ്​ കടൽ പ്രക്ഷുബ്​ദമായത്​. തീര മേഖലയിലെ റോഡുകളിലേക്ക്​ വെള്ളം അടിച്ചുകയറിയതും കല്ലുകൾ ഒഴുകിയെത്തിയതുമായ ദൃശ്യങ്ങൾ കാലാവസ്ഥ കേന്ദ്രം എക്സ്​ അക്കൗണ്ടിൽ പങ്കുവെച്ചിട്ടുണ്ട്​. മസാഫിയിൽ മഴയിൽ റോഡുകളിൽ വെള്ളം നിറഞ്ഞ്​ ഒഴുകുന്ന ദൃശ്യങ്ങളും സാമൂഹിക മാധ്യമങ്ങളിൽ പങ്കുവെച്ചിട്ടുണ്ട്​.

‘ശക്തി’ ചുഴലിക്കാറ്റ് ക്രമേണ ദുർബലമാകുമെന്ന് ഒമാനിലെ നാഷണൽ മൾട്ടി ഹസാർഡ് ഏർലി വാണിങ് സെന്റർ അറിയിച്ചിട്ടുണ്ട്​. ഞായറാഴ്ച രാത്രിയും തിങ്കളാഴ്ച രാവിലെയോടെയും ചുഴലിക്കാറ്റ് കിഴക്കോട്ട് തിരിഞ്ഞ് മധ്യ അറേബ്യൻ കടലിലേക്ക്​ അകന്നുപോകുമെന്നാണ്​ പ്രവചികപ്പെടുന്നത്​. അതേസമയം ചുഴലിക്കാറ്റിനെ തുടർന്ന്​ വിവിധ ഭാഗങ്ങളിൽ മഴ സാധ്യത പ്രവചിക്കപ്പെടുന്നുണ്ട്​.