ഉപേക്ഷിക്കപ്പെട്ട റാക്​ ഗ്രാമം വിനോദസഞ്ചാര കേന്ദ്രമാകുന്നു

അബൂദബി: ഉപേക്ഷിക്കപ്പെട്ട പൈതൃക ഗ്രാമം ജസീറത്​ അൽ ഹംറ വിനോദസഞ്ചാര കേന്ദ്രമാക്കാനുള്ള പ്രവർത്തനങ്ങൾ സജീവം. ഇതിനായുള്ള പ്രവൃത്തികൾ റാസൽഖൈമയിലെ ഇൗ ഗ്രാമത്തിൽ നടന്നുവരികയാണ്​. ജൂൺ ആദ്യത്തോടെ 20 പൈതൃക ഭവനങ്ങളുടെ പുനരുദ്ധാരണം പൂർത്തിയാകും. ആറ്​ മാസത്തിനകം വിവരങ്ങൾ നൽകാനുള്ള ബോർഡുകൾ, കാർ പാർക്കിങ്​ സംവിധാനങ്ങൾ, ശുചിമുറി ഉൾപ്പെടെയുള്ള അടിസ്​ഥാന സൗകര്യങ്ങൾ എന്നിവ ഒരുക്കും. 2023ഒാടെ ഹോട്ടലും ഷോപ്പുകളും ആരംഭിക്കും.അൽ​െഎനിൽ നടക്കുന്ന ആർക്കിയോളജി-18 സമ്മേളനത്തിൽ പ​െങ്കടുക്കുന്ന പുരാവസ്​തു ശാസ്​ത്രജ്ഞരാണ്​ ഇതു സംബന്ധിച്ച വിവരങ്ങൾ വെളിപ്പെടുത്തിയത്​. 

ഒരിക്കൽ ഇൗ ഗ്രാമം പ്രധാന വാണിജ്യ-മത്സ്യബന്ധന-പവിഴ ശേഖരണ പ്രദേശമായിരുന്നുവെന്ന്​ ഗ്രാമത്തി​​​െൻറ പുനരുദ്ധാരണ പദ്ധതി മാനേജറും റാക്​ പുരാവസ്​തു വകുപ്പ്​ ഡയറക്​ടറുമായ അഹ്​മദ്​ ഹിലാൽ പറഞ്ഞു. 54 ഹെക്​ടറുകളിലായി വ്യാപിച്ചുകിടക്കുന്ന ഗ്രാമത്തിൽ ഒരു കോട്ടയും 11 പള്ളികളും ഒരു സൂഖും ഉണ്ട്​. പൈതൃക സമ്പുഷ്​ടമാണ്​ അവിടുത്തെ കെട്ടിടങ്ങളെന്നും അദ്ദേഹം അഭിപ്രായപ്പെട്ടു. ഗ്രാമത്തെ വിനോദസഞ്ചാര കേന്ദ്രമാക്കി മാറ്റുമെന്ന്​ അഹ്​മദ്​ ഹിലാൽ വ്യക്​തമാക്കി. 2023ഒാടെ മ്യൂസിയം, വസ്​ത്രശാല, ചന്ത, ഹോട്ടൽ എന്നിവ തുറക്കും. പരമ്പരാഗത ഭക്ഷണം ലഭിക്കുന്ന റെസ്​റ്റോറൻറുകളും ആരംഭിക്കും. തദ്ദേശീയ സ്​കൂളുകളിൽനിന്നുള്ള കുട്ടികൾ നിലവിൽ ഇവിടെ സന്ദർശനം നടത്തുന്നതായും ഭാവിയിൽ അവിടെ പൊതു പരിപാടികൾ സംഘടിപ്പിക്കുമെന്നും അദ്ദേഹം പറഞ്ഞു. 

2000ത്തിലാണ്​ ഗ്രാമം പുനരുദ്ധരിക്കാനുള്ള പ്രവർത്തനങ്ങൾ ആരംഭിച്ചത്​. 2015ൽ റാസൽഖൈമയുടെയും അബൂദബിയുടെയും സഹകരണത്തോടെ പദ്ധതി തുടങ്ങി. ഏഴ്​ പുരാവസ്​തു ശാസ്​ത്രജ്ഞർ ഉൾപ്പെടെ 135 പേർ എല്ലാ ദിവസവും അവിടെ ജോലി ചെയ്​ത്​ വരുന്നു. പ്രദേശത്ത്​ നടത്തിയ ഖനനത്തിൽ 35,000 മൺപാത്രങ്ങൾ കണ്ടെടുത്തു. ഗ്രാമത്തിലെ കെട്ടിടങ്ങൾ നിർമിച്ചിരിക്കുന്നത്​ പവിഴപ്പുറ്റ്​, കല്ല്, കോൺ​ക്രീറ്റ്​, സ്​റ്റീൽ എന്നിവ കൊണ്ടാണ്​. ഇവയിൽ മിക്കവയും തകരാനായതിനാൽ അതീവ ശ്രദ്ധയോടെ വേണം പുനരുദ്ധാരണമെന്ന്​ അഹ്​മദ്​ ഹിലാൽ പറഞ്ഞു.സആബി ഗോത്രമായിരുന്നു ജസീറത്​ അൽ ഹംറ ഗ്രാമത്തിലെ താമസക്കാരിൽ ഭൂരിപക്ഷവും. 1960കളിൽ ഇവർ ഗ്രാമം ഉപേക്ഷിച്ച്​ പോവുകയായിരുന്നു. വസ്​തുവകകൾ അന്ന്​ ജീവിച്ചിരുന്ന കുടുംബങ്ങളുടെ ഉടമസ്​ഥതയിൽ തന്നെയാണ്​ ഇപ്പോഴും. അവർക്ക്​ വേണ്ടി ഇൗ വീടുകൾ തങ്ങൾ പരിപാലിച്ച്​ വരികയ​ാണെന്നും വസ്​തുവകകൾ ഗ്രാമത്തിൽ വസിച്ചിരുന്നവരുടേതായി തുടരുമെന്ന്​ റാക്​ സർക്കാർ വ്യക്​തമാക്കിയിട്ടുണ്ടെന്നും അഹ്​മദ്​ ഹിലാൽ അറിയിച്ചു.