'ഇവ ശൈഖ് മുഹമ്മദിന്‍റെ കുതിരകളാണോ..'

ദുബൈ: അന്തരിച്ച എലിസബത്ത് രാജ്ഞിയുടെ യു.എ.ഇയുമായുള്ള ബന്ധം വെളിപ്പെടുത്തുന്ന ഒരു സംഭവം കഴിഞ്ഞ ദിവസം ദുബൈ പൊലീസ് ഉദ്യോഗസ്ഥൻ വെളിപ്പെടുത്തുകയുണ്ടായി. 2019ൽ യു.കെയിലെ ഏറ്റവും വലിയ കുതിര പ്രദർശനമായ റോയൽ ബ്രിട്ടീഷ് വിൻഡ്‌സർ ഷോയിൽ ദുബൈ പൊലീസിന്‍റെ ഒരു വിങ് പങ്കെടുത്തിരുന്നു. കുതിരസവാരി വിഭാഗം രാജ്ഞിയെ ആകർഷിക്കുക മാത്രമല്ല ഇവയെ സന്ദർശിക്കാൻ അവർ നേരിട്ടെത്തുകയും ചെയ്തു. ദുബൈ പൊലീസിലെ ഊർജസ്വലരായ കുതിരകളെ കണ്ടപ്പോൾ ഉദ്യോഗസ്ഥനോട് രാജ്ഞിയുടെ ആദ്യ ചോദ്യം, 'ഇതൊക്കെ ശൈഖ് മുഹമ്മദിന്‍റെ കുതിരകളാണോ..' എന്നായിരുന്നു. കുതിരയോട്ടത്തിന് ഉപയോഗിച്ചിരുന്ന കുതിരകളാണെന്ന് മറുപടി നൽകിയപ്പോൾ അവർ ബ്രിട്ടീഷ് ഉദ്യോഗസ്ഥനോട് ഇതുസംബന്ധിച്ച് സംസാരിക്കുകയും ചെയ്തു. ഡ്രമ്മിന്‍റെയും മറ്റും ശബ്ദഘോഷങ്ങൾക്കിടയിൽ ശാന്തരായി നിൽക്കുന്ന ദുബൈ പൊലീസിന്‍റെ കുതിരകൾ രാജ്ഞിയെ അത്ഭുതപ്പെടുത്തിയതായും മൗണ്ടഡ് പൊലീസ് സ്റ്റേഷൻ ഡയറക്ടർ മേജർ ജനറൽ മുഹമ്മദ് ഇസ അൽ അദാബ് ഓർമിക്കുന്നു.