ലോകകപ്പ്​: ആഘോഷം അതിരുവിടരുത്​, പൊതുസ്ഥലത്ത്​ മദ്യപാനം വേണ്ട; മുന്നറിയിപ്പുമായി ദുബൈ പൊലീസ്​

ദുബൈ: ലോകകപ്പിന്​ പന്തുരുളാൻ മണിക്കൂറുകൾ മാത്രം ബാക്കി നിൽക്കേ ദുബൈയിലെ ഫാൻസിനും സന്ദർശകർക്കും​ നിർദേശങ്ങളുമായി ദുബൈ ​പൊലീസ്​. പൊതു സ്ഥലങ്ങളിൽ മദ്യപാനം അനുവദിക്കില്ലെന്നും മറ്റുള്ളവരുടെ സ്വകാര്യത മാനിക്കണമെന്നും പൊലീസ്​ അറിയിച്ചു. ലോകകപ്പിന്​ ഖത്തർ കഴിഞ്ഞാൽ ഏറ്റവും കൂടുതൽ സന്ദർശകർ എത്തുന്ന നഗരമാണ്​ ദുബൈ. ഫിഫയുടെ ഔദ്യോഗിക ഫാൻ ഫെസ്റ്റ്​ നടക്കുന്ന ആറ്​ നഗരങ്ങളിൽ ഒന്നാണ്​ ദുബൈ.

എല്ലാ ഫുട്​ബാൾ ​​പ്രേമികളെയും സ്വാഗതം ചെയ്യുന്നുവെന്നും പ്രദേശിക നിയമങ്ങൾ പാലിക്കണമെന്ന്​ പൊലീസ്​ അറിയിച്ചു.

പൊലീസിന്‍റെ നി​ർദേശങ്ങൾ:

. പൊതുസ്ഥലങ്ങളിൽ മദ്യപാനം അനുവദിക്കില്ല.

. ചിത്രങ്ങളെടുക്കുമ്പോൾ മറ്റുള്ളവരുടെ സ്വകാര്യത മാനിക്കണം.

. പൊതുമുതൽ സംരക്ഷിക്കണം.

. തീപടരുന്ന വസ്തുക്കൾ ഉപയോഗിക്കരുത്​.

. രാജ്യത്തിന്‍റെ സംസ്കാരത്തെ ബഹുമാനിക്കണം.

. മറ്റ്​ മതങ്ങളെ അതിക്ഷേപിക്കരുത്​.

. രാഷ്​​ട്രീയ തർക്കങ്ങൾ, വിവേചനം പോലുള്ളവ അനുവദിക്കില്ല.

. മറ്റുള്ളവർക്ക്​ ശല്യമാകുന്ന തരത്തിലുള്ള ആഘോഷം പാടില്ല.

. സ്​പോർട്​സ്മാൻ സ്പിരിറ്റ്​ സൂക്ഷിക്കുക.

. ലഹരി വസ്തുക്കൾ വിതരണം ചെയ്യുന്നത്​ നിരോധിച്ചിരിക്കുന്നു.

. അനധികൃത മാസാജ്​ സെന്‍ററുകൾ, സംശയാസ്പദമായ പരസ്യങ്ങൾ എന്നിവയിൽ വീഴാതിരിക്കുക.

. അമിത വൈകാരിക പ്രകടനങ്ങൾ ഒഴിവാക്കുക.

. ആഘോഷ പരിപാടികൾ സംഘടിപ്പിക്കുന്നവർ മുൻകൂർ അനുമതി വാങ്ങിയിരിക്കണം.

. ലഗേജ്​ പൊതുസ്ഥലങ്ങളിൽ ഉപേക്ഷിക്കരുത്​.

. ടാക്​സിയിൽ സഞ്ചരിക്കുന്നവർ നമ്പർ കുറിച്ചുവെക്കുകയും ബിൽ വാങ്ങുകയും ചെയ്യണം. ടാക്സിയിൽ മറന്നുവെക്കുന്ന വസ്തുക്കൾ വീണ്ടെടുക്കാൻ ഇത്​ ഉപകരിക്കും.