ആറു മാസത്തിനിടെ 39.5 കോടി യാത്രക്കാർ; ദുബൈയിൽ ​പൊതുഗതാഗതത്തിന്​​ പ്രിയമേറുന്നു

ദുബൈ: എമിറേറ്റിൽ പൊതുഗതാഗത മാർഗങ്ങൾ ഉപയോഗിക്കുന്നവരുടെ എണ്ണം കൂടി. ദുബൈ റോഡ്​ ഗതാഗത അതോറിറ്റി (ആർ.ടി.എ)യുടെ ഏറ്റവും പുതിയ കണക്കുകൾ പ്രകാരം ഈ വർഷം ആദ്യ പകുതിയിൽ ദുബൈ മെ​ട്രോ, ട്രാം, ബസ്​, മറൈൻ ട്രാൻസ്​പോർട്ട്, ഷെയേർഡ്​ ടാക്സി, ബസ്​ ഓൺ ഡിമാന്‍റ്​, വാടക​​ കാറുകൾ തുടങ്ങിയ​ പൊതുഗതാഗത മാർഗങ്ങൾ ഉപയോഗിച്ചത്​ 39.5 കോടി യാത്രക്കാരാണ്​.

അതായത്​ പ്രതിദിനം 21.8 ലക്ഷത്തിലേറെ പേരാണ്​ പൊതുഗതാഗത മാർഗങ്ങൾ ഉപയോഗിച്ചത്​​. കഴിഞ്ഞവർഷം ഇതേ കാലയളവിൽ യാത്രക്കാരുടെ എണ്ണം 36.12 കോടിയായിരുന്നു. ഒമ്പത്​ ശതമാനം വർധനവാണ്​ ഈ വർഷം രേഖപ്പെടുത്തിയത്​. കഴിഞ്ഞ വർഷം ഇതേ കാലയളവിൽ പ്രതിദിന യാത്രക്കാരുടെ എണ്ണം 19.8 ലക്ഷം ആയിരുന്നു.

പൊതുഗതാഗത മാർഗങ്ങൾ ഉപയോഗിക്കുന്നവരുടെ എണ്ണം 2006ൽ ആറു ശതമാനമായിരുന്നു. 2024 ലെത്തുമ്പോൾ ഇത്​ 21.6 ശതമാനമായി വർധിച്ചിരിക്കുകയാണ്​. ദുബൈ മെട്രോ ബ്ലൂലൈനിന്‍റെ പ്രവൃത്തി അതിവേഗം പുരോഗമിക്കുകയാണ്​​. 30 കിലോമീറ്റർ നീളത്തിലാണ്​ പുതിയ ലൈനിന്‍റെ നിർമാണം. എമിറേറ്റിലെ വിവിധ ജില്ലകളെ ബന്ധിപ്പിക്കുന്ന 14 മെട്രോ സ്​റ്റേഷനുകൾ ബ്ലൂനൈലിൽ ഉണ്ടാകും. ഏതാണ്ട്​ 10 ലക്ഷം പേർക്ക്​ ഇത്​ സഹായകമാവുമെന്നാണ്​ പ്രതീക്ഷ. കാർബൺ ബഹിർഗമനം കുറഞ്ഞ യൂറോ 6 നിലവാരത്തിലുള്ള 637 ബസുകൾ വാങ്ങുന്നതിനായി ആർ.ടി.എ നേരത്തെ കരാറിൽ ഒപ്പുവെച്ചിരുന്നു. ഇതിൽ 40 എണ്ണം ഇലക്​ട്രിക്​ ബസുകളാണ്​. ഈ വർഷവും അടുത്ത വർഷവുമായി ബസുകൾ നിരത്തിലെത്തും. കൂടാതെ ഈ മാസം 16 ബസ്​ സ്​റ്റേഷനുകളുടെയും ആറ്​ ഡിപോകളുടെയും നിർമാണം പൂർത്തീകരിച്ചതായും അദ്ദേഹം വ്യക്​തമാക്കി.

ഈ വർഷം ആദ്യ പകുതിയിൽ ടാക്സി ഉപയോഗിച്ചവരുടെ എണ്ണത്തിൽ 36 ശതമാനവും മെട്രോ യാത്രക്കാരാണ്​. 26 ശതമാനം പേരാണ്​ ടാക്സി ഉപയോഗിച്ചത്​. മൊത്തം യാത്രക്കാരിൽ 24 ശതമാനം യാത്രക്കാരാണ്​ ബസ്​ ഉപയോഗിച്ചത്​. മെട്രോ റെഡ്​ ലൈനിൽ ആറു മാസത്തനിടെ യാത്ര ചെയ്തവരുടെ എണ്ണം 14.39 കോടിയാണ്​. ബുർജുമാൻ, അൽ റിഗ സ്​റ്റേഷനുകളിലാണ്​ ഏറ്റവും കൂടുതൽ യാത്രക്കാർ വന്നുപോയത്​.

പൊതു ഗതാഗത സംവിധാനങ്ങളുടെ കാര്യക്ഷമതയിലും ഗുണിനിലവാരത്തിലും യാത്രക്കാർക്കുള്ള ആത്​മവിശ്വാസമാണ്​ ഓരോ വർഷവും ഉയരുന്ന കണക്കുകൾ പ്രതിഫലിപ്പിക്കുന്നതെന്ന്​​ ആർ.ടി.എ ചെയർമാൻ മതാർ അൽ തായർ പറഞ്ഞു. സമൂഹത്തിലെ എല്ലാ മേഖലയിലുള്ളവർക്കും സുഗമവും സുരക്ഷിതവുമായ യാത്ര സൗകര്യം നൽകുന്നത്​ തുടരും. ദുബൈയിലെ പൊതുഗതാഗത ശൃംഖലകൾ സുപ്രധാനമായ മാറ്റങ്ങൾക്ക്​​ വിധേയമായിക്കൊണ്ടിരിക്കുകയാണ്​​​. നൂതനമായ അടിസ്ഥാന സൗകര്യങ്ങളും വിത്യസ്ത തലത്തിലുള്ള ഗതാഗത ഓപ്​ഷനുകളും തെരഞ്ഞെടുക്കാനുള്ള അവസരം യാത്രക്കാർക്ക്​ ലഭ്യമാണെന്നും അദ്ദേഹം വ്യക്​തമാക്കി.