പൊലീസ് ഇടപെടൽ: പത്തു മാസത്തിനു ശേഷം പിതാവുമായി മകന്‍റെ കൂടിക്കാഴ്ച

ദുബൈ: കുടുംബവഴക്കിനെ തുടർന്ന് അമ്മക്കൊപ്പം ഇന്ത്യയിലേക്ക് പോയ അഞ്ച് വയസ്സുകാരനെ പിതാവിന്‍റെ ചാരെയെത്തിച്ച് ദുബൈ പൊലീസ്. ഇന്ത്യക്കാരനായ ഷാദ് ഹുസൈനാണ് ദുബൈ പൊലീസിന്‍റെ സഹായമെത്തിയത്. രക്ഷിതാക്കൾ തമ്മിലുള്ള പ്രശ്നം പരിഹരിക്കാൻ ശ്രമം നടത്തുന്നതായും പൊലീസ് പറഞ്ഞു.

ഇന്ത്യയിൽ താമസിക്കുന്നതിനിടെയാണ് ദമ്പതികൾ തമ്മിൽ പ്രശ്നമുണ്ടാകുന്നത്. ഇതേ തുടർന്ന് മാതാവ് കുഞ്ഞുമായി ദുബൈയിലെത്തി. മകനെ കാണാൻ ആഗ്രഹമുണ്ടായിരുന്നെങ്കിലും സാമ്പത്തിക ശേഷി അനുവദിച്ചില്ല. പിന്നീട് സാമ്പത്തിക ശേഷി മെച്ചപ്പെട്ടെങ്കിലും കുഞ്ഞിനെ കാണാൻ ഭാര്യ സമ്മതിച്ചില്ല.

ഭാര്യാപിതാവ് വഴി ശ്രമിച്ചെങ്കിലും അതും പരാജയപ്പെട്ടു. ഇതോടെ ദുബൈ പൊലീസിന്‍റെ സഹായം തേടി. പൊലീസ് യുവതിയുമായി ബന്ധപ്പെട്ട് കൂടിക്കാഴ്ചക്ക് അവസരം ഒരുക്കി.

കുട്ടികളുടെ അവകാശങ്ങൾ മാനിക്കപ്പെടണമെന്നും കുടുംബ തർക്കങ്ങളിലേക്ക് അവരെ വലിച്ചിഴക്കേണ്ടതില്ലെന്നും പൊലീസ് പറഞ്ഞു.