പി.എം ഫൗണ്ടേഷൻ  ടാലൻറ് സെർച്ച് പരീക്ഷ :വിജയികൾക്ക് ഒന്നേകാൽ ലക്ഷം വരെ സ്കോളർഷിപ്പ് 

ദുബൈ : ജി.സി.സി രാജ്യങ്ങളിൽ പഠിക്കുന്ന ഏറ്റവും മിടുക്കരായ വിദ്യാർത്ഥികളെ കണ്ടെത്താൻ പി.എം ഫൗണ്ടേഷൻ നടത്തുന്ന ടാലൻറ്​  സെർച്ച്​ പരീക്ഷ അടുത്ത മാസം നടക്കും. ബഹറൈൻ ,ഖത്തർ,യു.എ.ഇ ,ഒമാൻ,കുവൈറ്റ് ,സൗദി അറേബ്യ എന്നീ രാജ്യങ്ങളിലെ വിവിധ കേന്ദ്രങ്ങളിലായാണ് പരീക്ഷ നടക്കുക. 2017 മാർച്ച്/ഏപ്രിൽ മാസങ്ങളിൽ നടന്ന പത്താം ക്ലാസ് പരീക്ഷയിൽ എല്ലാ വിഷയങ്ങൾക്കും എ+/ എ1 ഗ്രേഡ് നേടിയ വിദ്യാർത്ഥികൾക്ക് അപേക്ഷിക്കാം.  പൊതുവിജ്ഞാനം, വിശകലനം, അടിസ്​ഥാന വിഷയങ്ങളിലുള്ള പരിജ്ഞാനം എന്നീ മേഖലകളിൽ വിദ്യാർഥികളുടെ മാറ്റു നോക്കുന്ന രണ്ടു മണിക്കൂർ പരീക്ഷയാണിത്.  ശരിയുത്തരം തെരഞ്ഞെടുക്കേണ്ട 120 ചോദ്യങ്ങളാണുണ്ടാവുക. ഇതിൽ നിശ്ചിത മാർക്ക് നേടുന്ന കുട്ടികൾക്കെല്ലാം ‘അവാർഡ് ഓഫ് എക്സലൻസ്​’ സർട്ടിഫിക്കറ്റും പതിനായിരം രൂപ മൂല്യമുള്ള സമ്മാനങ്ങളും നൽകും. ഏറ്റവും  മികച്ച വിജയം നേടുന്ന വിദ്യാർത്ഥികൾക്ക് പി.എം. ഫൗണ്ടേഷൻ  ഒന്നേക്കാൽ ലക്ഷം രൂപയുടെ സ്കോളർഷിപ്പും തുടർപഠന  മാർഗ നിർദേശങ്ങളും നൽകും.  2017 ഒക്ടോബർ 14 നാണു പരീക്ഷ. പങ്കെടുക്കാൻ ആഗ്രഹിക്കുന്ന വിദ്യാർത്ഥികൾ www.pmfonline.org എന്ന വെബ്​സൈറ്റ്​ മുഖേന ഇൗ മാസം 30 നകം   അപേക്ഷിക്കണം.