മുഖ്യമന്ത്രിക്ക്​ ദുബൈ ഭരണാധികാരിയുടെ ഊഷ്മള സ്വീകരണം

ദുബൈ: കേരള മുഖ്യമന്ത്രി പിണറായി വിജയന്​ യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമിന്‍റെ ഊഷ്മള സ്വീകരണം. ദുബൈ എക്സ്​പോയിലെ യു.എ.ഇ പവലിയനിലാണ്​ ശൈഖ്​ മുഹമ്മദും മക്കളായ ദുബൈ കിരീടാവകാശിയും എക്​സിക്യൂട്ടീവ്​ കൗൺസിൽ ചെയർമാനുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂം, യു.എ.ഇ ധനകാര്യ മന്ത്രിയും ദുബൈ ഉപഭരണാധികാരിയും ദുബൈ മീഡിയ ചെയർമാനുമായ ശൈഖ്​ മക്​തൂം ബിൻ മുഹമ്മദ്​ ബിൻ റാശിദ്​ ആൽ മക്​തൂം, എമിറേറ്റ്​സ്​ എയർലൈൻ ചെയർമാനും ദുബൈ സിവിൽ ഏവിയേഷൻ പ്രസിഡന്‍റുമായ ശൈഖ്​ അഹ്​മദ്​ ബിൻ സഈദ്​ ആൽ മക്​തൂം എന്നിവർ ചേർന്ന്​ സ്വീകരണമൊരുക്കിയത്​.

കേരള വ്യവസായ മന്ത്രി പി. രാജീവ്​, ഇന്ത്യൻ അംബാസഡർ സഞ്ജയ്​ സുധീർ, കോൺസുൽ ജനറൽ അമൻ പുരി, ലുലു ഗ്രൂപ്പ്​ ചെയർമാനും അബൂദബി ചേംബർ വൈസ്​ ചെയർമാനുമായ എം.എ. യൂസുഫലി എന്നിവർ ഒപ്പമുണ്ടായിരുന്നു.

യു.എ.ഇയിലെത്തിയ ശേഷം ആദ്യമായാണ്​ മുഖ്യമന്ത്രി എക്സ്​പോ സന്ദർശിക്കുന്നത്​. ശൈഖ്​ ഹംദാനൊപ്പം യു.എ.ഇ പവലിയൻ ചുറ്റിക്കണ്ട മുഖ്യമന്ത്രി കേരളവുമായി ബന്ധപ്പെട്ട വിഷയങ്ങൾ ചർച്ച ചെയ്തു. ​മുഖ്യമന്ത്രിയുടെ ഉപഹാരം ശൈഖ്​ മുഹമ്മദും ശൈഖ്​ ഹംദാനും ഏറ്റുവാങ്ങി.