ദുബൈ പള്ളികളിൽ ആഗസ്റ്റ്​ മുതൽ പെയ്​ഡ്​ പാർക്കിങ്

ദുബൈ: എമിറേറ്റിലെ പള്ളികൾക്ക്​ സമീപത്തെ പാർക്കിങ്​ സ്ഥലങ്ങളിൽ ആഗസ്റ്റ്​ മാസം മുതൽ പെയ്​ഡ്​ പാർക്കിങ് നടപ്പിലാക്കും. ഇതിന്‍റെ ഭാഗമായി ദുബൈയിലെ പാർക്കിങ്​ നിയന്ത്രണ കമ്പനിയായ ‘പാർക്കിൻ’ 59 ഇടങ്ങളിലെ 2100 പാർക്കിങ്​ സ്ഥലങ്ങൾ നിയന്ത്രിക്കുമെന്ന്​ അധികൃതർ വ്യാഴാഴ്ച അറിയിച്ചു. അതേസമയം നമസ്കാരത്തിന്‍റെ ഒരു മണിക്കൂർ സമയം പാർക്കിങ്​ സൗജന്യമായിരിക്കും. പാർക്കിനും ദുബൈയിലെ ഇസ്​ലാമികകാര്യ, ജീവകാരുണ്യ പ്രവർത്തന വകുപ്പും(ഐ.എ.സി.എ.ഡി) തമ്മിൽ ഒപ്പുവെച്ച സഹകരണ കരാറനുസരിച്ചണ്​ പദ്ധതി നടപ്പിലാക്കുന്നത്​.

എമിറേറ്റിലെ പള്ളികളുടെയും ഇസ്​ലാമിക കാര്യ, ജീവകാരുണ്യ പ്രവർത്തനങ്ങളുടെയും ചുമതലയുള്ള വകുപ്പാണ്​ ഐ.എ.സി.എ.ഡി.പദ്ധതിയുടെ ഭാഗമായി പാർക്കിങ്​ സ്ഥലങ്ങൾ രണ്ട്​ സോണുകളായി തിരിക്കും. 41സ്ഥലങ്ങൾ സോൺ എം(സ്​​റ്റാൻന്‍റേഡ്​), 18 സ്ഥലങ്ങൾ സോൺ എം.പി(പ്രീമിയം) യും ആയിരിക്കും. എല്ലാ സ്ഥലങ്ങളിലും നമസ്കാര സമയത്തൊഴികെ എല്ലാദിവസവും 24മണിക്കൂറും പാർക്കിങിന്​ നിരക്ക്​ ഈടാക്കും.

പാർക്കിങ്​ സ്ഥലങ്ങൾ കൃത്യമായി രേഖപ്പെടുത്തുകയും നിരക്കുകൾ വ്യക്​തമാക്കുന്ന ബോർഡുകൾ സ്ഥാപിക്കുകയും ചെയ്യും. സോൺ എം(സ്​​റ്റാൻന്‍റേഡ്​) മേഖലയിൽ അരമണിക്കൂറിന്​ രണ്ട്​ ദിർഹമും മണിക്കൂറിന്​ നാല്​ ദിർഹമുമാണ്​ നിരക്ക്​. അതേസമയം സോൺ എം.പി(പ്രീമിയം) മേഖലയിൽ അരമണിക്കൂറിന്​ തിരക്കേറിയ സമയങ്ങളിൽ മൂന്ന്​ ദിർഹമും അല്ലാത്ത സമയങ്ങളിൽ രണ്ട്​ ദിർഹമുമാണ്​ നിരക്ക്​. മണിക്കൂറിന്​ ഇവിടെ തിരക്കുള്ള സമയങ്ങളിൽ ആറ്​ ദിർഹമും അല്ലാത്തപ്പോൾ നാലു ദിർഹമും നൽകണം. സാധാരണ സോണുകളിൽ രാവിലെ 8മുതൽ 10വരെയും ശെവകുന്നേരം 4മുതൽ രാ​ത്രി 8വരെയുമാണ്​ തിരക്കേറിയ സമയങ്ങളായി കണക്കാക്കുന്നത്​.

പ്രാർഥന സമയങ്ങളിൽ പാർക്കിങിന്​ സ്ഥലം കണ്ടെത്താനുള്ള ബുദ്ധിമുട്ട്​ ഒഴിവാക്കുന്നതിനാണ്​ സംവിധാനം ഏർപ്പെടുത്തിയതെന്ന്​ പാർക്കിനും ഐ.എ.സി.എ.ഡിയും അറിയിച്ചു. എല്ലാ സമയങ്ങളിലും പള്ളികളിലേക്ക്​ പ്രവേശനം എളുപ്പമാക്കുകയും വിശ്വാസികളുടെ മതപരമായ കാര്യങ്ങൾക്ക്​ സൗകര്യമൊരുക്കുന്നതുമാണ്​ സംരംഭമെന്നും അധികൃതർ കൂട്ടിച്ചേർത്തു. ഭാവിയിൽ ഐ.എ.സി.എ.ഡിയുടെ കീഴിലുള്ള കൂടുതൽ പള്ളികളിലേക്കും സംരംഭം വിപുലീകരിച്ചേക്കും.