പുതിയ മേൽപാലം തുറക്കാൻ ഒരുങ്ങുന്നു; വിമാനത്താവളയാത്ര എളുപ്പമാകും

ദുബൈ: റാശിദിയ ഇൻറർചേഞ്ചിൽ വിമാനത്താവളത്തിലേക്കുള്ള റോഡിൽ നിർമാണം പൂർത്തിയായ മേൽപാലം വെള്ളിയാഴ്​ച തുറക്കുമെന്ന്​ ആർ.ടി.എ. അറിയിച്ചു. ഇ​തോടെ ഹൈവേയിലെ തിരക്കിന്​ ശമനമുണ്ടാകും. 2016 പകുതിയോടെ ആരംഭിച്ച എയർപോർട്ട്​ റോഡ്​ നവീകരണം അവസാനഘട്ടത്തിൽ എത്തിയിരിക്കുകയാണ്​. 
ഇൗ വർഷം മാർച്ചിൽ ഇത്​ പൂർത്തിയാകുന്നതോടെ നിലവിൽ അരമണിക്കൂർ എടുക്കുന്ന യാത്രാസമയം അഞ്ച്​ മിനിറ്റായി മാറും. 

ദുബൈയിലെ യാത്രാ സൗകര്യങ്ങളും അടിസ്​ഥാന സൗകര്യങ്ങളും വികസിപ്പിക്കാനുള്ള 404 മില്ല്യൺ ദിർഹം ചെലവ്​ പ്രതീക്ഷിക്കുന്ന പദ്ധതിയുടെ ഭാഗമാണിത്​. ദുബൈ അന്താരാഷ്​ട്ര വിമാനത്താവളത്തിലെ യാത്രക്കാരുടെ എണ്ണത്തിൽ വൻ വർധനയുണ്ടാകുന്ന സാഹചര്യത്തിലാണ്​ എയർപോർട്ട്​ റോഡ്​ നവീകരണം നടപ്പാക്കുന്നത്​. 2020 ഒാടെ 9.2​ കോടി യാത്രക്കാർ ദുബൈ വിമാനത്താവളം ഉപയോഗിക്കുമെന്നാണ്​ പ്രതീക്ഷിക്കപ്പെടുന്നത്​. നവീകരണം പൂർത്തിയാകുന്നതോടെ മണിക്കൂറിൽ 5000 വാഹനങ്ങളെക്കൂടി ഉൾക്കൊള്ളാൻ എയർപോർട്ട്​ റോഡിന്​ കഴിയും.

മുഹമ്മദ്​ ബിൻ റാശിദ്​ ഇൻറർചേഞ്ച്​ മുതൽ കാസാബ്ലാൻക ഇൻറർചേഞ്ച്​ വരെ യാത്രചെയ്യാനുള്ള സമയം അരമണിക്കൂറിൽ നിന്ന്​ അഞ്ച്​ മിനിറ്റായി കുറയുമെന്ന്​ ആർ.ടി.എ. ബോർഡ്​ ഒാഫ്​ എക്​സിക്യൂട്ടീവ്​ ഡയറക്​ടേഴ്​സ്​ ​െചയർമാനും ഡയറക്​ടർ ജനറലുമായി മത്താർ അൽ തായർ പറഞ്ഞു. കാസാബ്ലാൻക ഇൻറർസെക്ഷനിലെ പുതിയ പാലം ഇൗ മാസം പകുതിയോടെ പൂർത്തിയാകും. എമിറേറ്റ്​ എയർലൈൻ ആസ്​ഥാന മന്ദിരത്തിന്​ എതിർവശമുള്ള മേൽപാലം നിർമാണം അടുത്തമാസം തുറക്കാനാവുമെന്നും അദ്ദേഹം പറഞ്ഞു.