ഓപറേഷൻ സിന്ദൂർ ;ഇന്ത്യൻ നിലപാട്​ വിശദീകരിച്ച്​ പ്രതിനിധി സംഘം

ദുബൈ: പഹൽഗാം ഭീകരാക്രമണത്തിനു​ ശേഷം ഇന്ത്യ നടപ്പിലാക്കിയ ഓപറേഷൻ സിന്ദൂറിനെ കുറിച്ച് യു.എ.ഇ പ്രമുഖരുടെ മുമ്പിൽ വിശദീകരിച്ച്​ കേന്ദ്ര പ്രതിനിധി സംഘം. വ്യാഴാഴ്ച രാവിലെ യു.എ.ഇ സഹിഷ്ണുത-സഹവർത്തിത്വ വകുപ്പ് മന്ത്രി ​ശൈഖ്​ നഹ്​യാൻ ബിൻ മുബാറക്​ ആൽ നഹ്​യാനുമായാണ്​ ആദ്യ കൂടിക്കാഴ്ച നടന്നത്​.

ഭീകരതയെ നേരിടുന്നതിൽ ഇന്ത്യയും യു.എ.ഇയും ഒരുമിച്ചുനിൽക്കുമെന്നും യു.എ.ഇ ഇന്ത്യക്കൊപ്പം എപ്പോഴും നിലയുറപ്പിക്കുമെന്നും ​ശൈഖ്​ നഹ്​യാൻ വ്യക്​തമാക്കി. ശ്രീകാന്ത്​ ഏകനാഥ്​ ഷിൻഡെ എം.പി നയിക്കുന്ന സംഘത്തിനൊപ്പം യു.എ.ഇയിലെ ഇന്ത്യൻ അംബാസഡർ സഞ്ജയ്​ സുധീറും കൂടിക്കാഴ്ചയിൽ പ​ങ്കെടുത്തു. തുടർന്ന്​ യു.എ.ഇ ഫെഡറൽ നാഷനൽ കൗൺസിലിലെ പ്രതിരോധ, ആഭ്യന്തര, വിദേശകാര്യ കമ്മിറ്റി ചെയർമാൻ ഡോ. അലി റാശിദ്​ അൽ നുഐമിയുമായി കൂടിക്കാഴ്ച നടത്തുകയും ഇന്ത്യയുടെ നിലപാട്​ വിശദീകരിക്കുകയും ചെയ്തു.

സംഭാഷണം ഫലപ്രദമായിരുന്നുവെന്നും ഭീകരതക്കെതിരെ എല്ലാ രാജ്യങ്ങളും ഒരുമിക്കണമെന്ന അഭിപ്രായമാണ്​ എല്ലാവരും പങ്കുവെച്ചതെന്നും തുടർന്ന്​ ശ്രീകാന്ത്​ ഏകനാഥ്​ ഷിൻഡെ മാധ്യമങ്ങളോട്​ വെളിപ്പെടുത്തി. ഇന്ത്യൻ ഭരണകൂടം മാത്രമല്ല, ജനതയും യു.എ.ഇയുടെ തന്ത്രപ്രധാന പങ്കാളിയാണെന്ന്​ കൂടിക്കാഴ്ചക്കുശേഷം ഡോ. അലി റാശിദ്​ അൽ നുഐമി പറഞ്ഞു. ഭീകരത ഒരു രാജ്യത്തിനോ പ്രദേശത്തിനോ മാത്രമുള്ള ഭീഷണിയല്ല, മറിച്ച് ആഗോളതലത്തിൽ തന്നെയുള്ള ഭീഷണിയാണ്. അന്താരാഷ്ട്ര സമൂഹമെന്ന നിലയിൽ, എല്ലാവർക്കും മികച്ച ഭാവി സൃഷ്ടിക്കുന്നതിനായി എല്ലാവരും ഒന്നിച്ചുനിൽക്കണമെന്ന് ഞങ്ങൾ വിശ്വസിക്കുന്നു -അദ്ദേഹം കൂട്ടിച്ചേർത്തു.

നാഷനൽ മീഡിയ ഓഫിസ്​ ഡയറക്ടർ ജനറൽ ഡോ. ജമാൽ അൽ കഅബിയുമായും സംഘം കൂടിക്കാഴ്ച നടത്തി. കൂടിക്കാഴ്ചയിൽ ഭീകരതയും തീവ്രവാദവും തടയുന്നതിലെ മാധ്യമങ്ങളുടെ പങ്ക്​ ഇരു വിഭാഗവും ചർച്ച ചെയ്തു. വൈകുന്നേരം ആറിന്​ അബൂദബി ഇന്ത്യൻ എംബസി ഓഡിറ്റോറിയത്തിൽ നടന്ന ചടങ്ങിൽ ഇന്ത്യൻ ബിസിനസ്​ രംഗത്തെയും മറ്റും പ്രമുഖരുമായും സംഘം സംവദിച്ചു. വെള്ളിയാഴ്ച അൻവർ ഗർഗാഷ്​ ഡിപ്ലോമാറ്റിക്​ അക്കാദമി ഡയറക്ടർ ജനറൽ നികോലായ്​ മ്ലദ​നേവുമായും മറ്റു പ്രമുഖരുമായും കൂടിക്കാഴ്ചകൾ നടത്തും. ദുബൈയിൽ മാധ്യമങ്ങളെയും കാണുന്നുണ്ട്​​. യു.എ.ഇയിലെത്തിയ ദൗത്യസംഘത്തിൽ എം.പിമാരായ ഇ.ടി. മുഹമ്മദ്​ ബഷീർ, ബാൻസുരി സ്വരാജ്​, അതുൽ ഗാർഗ്​, സാംസിത്​ പാത്ര, മനൻകുമാർ മിശ്ര, മുൻ പാർലമെന്‍റ്​ അംഗം എസ്​.എസ്.​ അഹ്​ലുവാലിയ, മുൻ അംബാസഡർ സുജൻ ചിനോയ്​ എന്നിവർ അംഗങ്ങളാണ്​.

വ്യാഴാഴ്ച പുലർച്ചയാണ് സംഘം അബൂദബിയിലെത്തിയത്. അബൂദബി സായിദ്​ അന്താരാഷ്ട്ര വിമാനത്താവളത്തിൽ യു.എ.ഇയിലെ ഇന്ത്യൻ അംബാസഡർ സഞ്ജയ് സുധീറും യു.എ.ഇ ഫെഡറൽ നാഷനൽ കൗൺസിൽ അംഗം അഹ്മദ് മിർ ഖൗറിയും ചേർന്ന് സംഘത്തെ സ്വീകരിച്ചു. യു.എ.ഇ സന്ദർശനശേഷം ഇതേ സംഘം ലൈബീരിയ, കോംഗോ, സിയറാ ലിയോൺ എന്നീ ആഫ്രിക്കൻ രാജ്യങ്ങളും സന്ദർശിക്കും