ഒരുവർഷത്തിന്​ ശേഷം ടെർമിനൽ-1 തുറക്കുന്നു

ദുബൈ: വരും ദിവസങ്ങളിലെ തിരക്ക്​ കണക്കിലെടുത്ത്​ ദുബൈ വിമാനത്താവളത്തിലെ ഒന്നാം നമ്പർ ടെർമിനൽ വീണ്ടും തുറക്കുന്നു. 15 മാസത്തിന്​ ശേഷമാണ്​ ടെർമിനൽ വൺ തുറക്കുന്നത്​. 24 മുതൽ ടെർമിനലിൽ യാത്രക്കാരെ അനുവദിക്കുമെന്ന്​ എയർപോർട്ട്​ സി.ഇ.ഒ പോൾ ഗ്രിഫിത്​സ്​ പറഞ്ഞു. 3500ഓളം പേർക്ക്​ ഇതുവഴി ജോലി ലഭിക്കുമെന്നാണ്​ പ്രതീക്ഷ.

സ്​കൂൾ അവധി, പെരുന്നാൾ എന്നിവ പ്രമാണിച്ച്​ വലിയ തിരക്കാണ്​ പ്രതീക്ഷിക്കുന്നത്​. എക്​സ്​പോ ഉൾപ്പെടെ രാജ്യാന്തര മേളകളും തുടങ്ങാനിരിക്കുകയാണ്​. അടുത്തമാസങ്ങളിലെ ​തിരക്ക്​ കണക്കിലെടുത്താണ്​ ടെർമിനൽ വൺ തുറക്കുന്നതെന്നും അദ്ദേഹം പറഞ്ഞു.

24 മുതൽ ഇന്ത്യൻ യാത്രികർക്കും അനുമതി ലഭിക്കുന്നതോടെ വിമാനത്താവളത്തിൽ തിരക്കേറും. ദുബൈ വിമാനത്താവളത്തിലെത്തുന്നവരിൽ ഭൂരിപക്ഷവും ഇന്ത്യക്കാരാണ്​. കോവിഡിനെ തുടർന്ന്​ വിമാനങ്ങളുടെയും യാത്രക്കാരുടെയും എണ്ണം കുറഞ്ഞതോടെ 15 മാസം മുമ്പാണ്​ ടെർമിനൽ അടച്ചത്​.

ലോകത്ത്​ ഏറ്റവും കൂടുതൽ യാത്രക്കാർ സഞ്ചരിക്കുന്ന വിമാനത്താവളമാണ്​ ദുബൈ. എന്നാൽ, കോവിഡ്​ എത്തിയതോടെ 2019നെ അപേക്ഷിച്ച്​ 70 ശതമാനം യാത്രക്കാരാണ്​ കഴിഞ്ഞ വർഷം കുറഞ്ഞത്​.

മഹാമാരിക്ക്​ മുമ്പുള്ള യാത്രക്കാരിൽ 90 ശതമാനവും തിരിച്ചെത്തുമെന്നാണ്​ പ്രതീക്ഷ. ജൂലൈ അവസാനത്തോടെ 90 ശതമാനം യാത്രക്കാർ തിരിച്ചെത്തുമെന്ന്​ ​പ്രതീക്ഷിക്കുന്നതായി എമിറേറ്റ്​സ്​ അറിയിച്ചിരുന്നു. ജൂൺ 23 മുതൽ ഇന്ത്യ, ദക്ഷിണാഫ്രിക്ക, നൈജീരിയ എന്നിവിടങ്ങളിലേക്ക്​ സർവിസ്​ പുനരാരംഭിക്കുമെന്നും എമിറേറ്റ്​സ്​ അറിയിച്ചിട്ടുണ്ട്​.

അതേസമയം, ടെർമിനൽ 1 തുറക്കുന്നതോടെ 3500 പുതിയ ജോലികൾ സൃഷ്​ടിക്കപ്പെടുമെന്നാണ്​ പ്രതീക്ഷ. 66 എയർലൈനുകളാണ്​ ടെർമിനൽ 1ൽനിന്ന്​ ഓപറേറ്റ്​ ചെയ്യുക.

ഇതോടെ കൂടുതൽ ജീവനക്കാരെ വേണ്ടിവരും. നേരത്തെ നിർത്തിവെച്ചിരുന്ന ചില ജോലികൾ പുനരാരംഭിക്കുന്നതിനൊപ്പം കൂടുതൽ തസ്​തികകൾ സൃഷ്​ടിക്കപ്പെടുകയും ചെയ്യും.