ജോലിയും ഭക്ഷണവും വൈദ്യുതിയുമില്ല; ദുരിതക്കയത്തിൽ 97 ഇന്ത്യക്കാർ

ദുബൈ: കമ്പനി നഷ്​ടത്തിലായി ജോലി നഷ്​ടപ്പെട്ട 97 ഇന്ത്യക്കാർ ദുരിതക്കയത്തിൽ. ജബൽ അലി ഇൻഡസ്​ട്രിയൽ ഏരിയയിൽ പ്രവർത്തിക്കുന്ന സ്​ഥാപനത്തിലെ 35 മലയാളികളും 59 ഉത്തരേന്ത്യക്കാരും രണ്ട്​ ഫിലിപ്പിനീകളും ഒരു പാകിസ്​താനിയുമാണ്​ ദുരിതത്തിൽ​. ബിൽ അടക്കാത്തതിനെ തുടർന്ന്​ ലേബർ ക്യാമ്പിലെ വെള്ളവും വൈദ്യുതിയും ​വിച്ഛേദിച്ചു​.

ലേബർ ക്യാമ്പിന്​ സമീപം കമ്പനി നൽകിയ ആറ്​ മുറികളാണ് 97 പേരുടെ അഭയകേന്ദ്രം. എല്ലാവർക്കും ഇവിടെ കിടക്കാൻ സൗകര്യമില്ലാത്തതിനാൽ പലരും ​പൊരിഞ്ഞചൂടിൽ ലേബർ ക്യാമ്പിൽതന്നെ കഴിഞ്ഞുകൂടുകയാണ്​. നാല്​ വർഷമായി നാട്​ കണ്ടിട്ട്​. ഒന്നരവർഷമായി വിസ പുതുക്കാത്തതി​െൻറ പിഴയുള്ളതിനാൽ നാട്ടിൽ പോകാൻ കഴിയില്ല.

ലെബനൻ സ്വദേശികളുടെ ഉടമസ്​ഥതയിലുള്ള യാട്ട്​ ഇൻറീരിയർ കമ്പനിയിൽ നാല്​ വർഷമായി ഇവർ ജോലി ചെയ്യുന്നു. ഒരുവർഷം മുമ്പാണ്​ ശമ്പളപ്രശ്​നങ്ങൾ തുടങ്ങുന്നത്​. ആറ്​ മാസം മുമ്പ്​​ ശമ്പളം പൂർണമായും നിലച്ചതോടെ ജോലിക്ക്​ പോകുന്നത്​ നിർത്തി. കമ്പനി നിലവിലുണ്ടെങ്കിലും പ്രവർത്തനങ്ങൾ നടക്കുന്നില്ല. വിവരം അറിഞ്ഞ്​ പ്രവാസി ഇന്ത്യ പ്രവർത്തകരെത്തി രണ്ട്​ നേരം ഭക്ഷണം നൽകുന്നുണ്ട്​. ഇതാണ്​​ ഏക ആശ്വാസം. ലേബർ ക്യാമ്പിലെ വെള്ളം നിലച്ചതിനാൽ തൊട്ടടുത്ത താമസസ്​ഥലത്തെ പരിമിതമായ എണ്ണം ശൗചാലയങ്ങളാണ്​ ആശ്രയം. ആറ്​ മുറിയിൽ 97 പേർക്ക്​ ഒരേസമയം കിടക്കാൻ കഴിയാത്തതിനാൽ പല സമയത്തായാണ്​ ഉറക്കംപോലും. കുറച്ചുപേർ ലേബർക്യാമ്പിലെ വരാന്തയിലും മറ്റും കഴിച്ചുകൂട്ടും. ദുബൈയിൽ ഏറ്റവും കൂടുതൽ ചൂട്​ അനുഭവപ്പെടുന്ന സ്​ഥലങ്ങളിലൊന്നാണ്​ ജബൽ അലി​.

ഉടമയുമായി ഒത്തുതീർപ്പിലൂടെ നാട്ടിലേക്ക്​ മടങ്ങാൻ ശ്രമിക്കുന്നതിനാൽ കേസ്​ നൽകിയിട്ടില്ല. ഫ്രീസോൺ വിസയുള്ളവരെ വൈകാതെ നാട്ടിലേക്ക്​ തിരിച്ചയക്കാമെന്ന്​ കമ്പനി പറയുന്നുണ്ട്​. എന്നാൽ, ഒന്നര വർഷമായി വിസ കാലാവധി കഴിഞ്ഞവർ എന്തു​െചയ്യുമെന്നറിയാതെ കുഴങ്ങുകയാണ്​. നൽകാനുള്ള തുകയുടെ 30 ശതമാനം നൽകാമെന്നാണ്​ കമ്പനി പറയുന്നത്​. ഇക്കാര്യത്തിലും വ്യക്​തമായ ഉറപ്പ്​ ലഭിച്ചിട്ടില്ല. ഇന്ത്യൻ എംബസിയും കോൺസുലേറ്റും സുമനസ്സുകളും മുന്നോട്ടുവരുമെന്ന പ്രതീക്ഷയിലാണിവർ ജീവിതം തള്ളിനീക്കുന്നത്​.