യു.എ.ഇയിൽ ഇനി ബാങ്ക്​ ഒ.ടി.പിയില്ല; എല്ലാം ഇനി ആപ്പ്​ വഴി

ദുബൈ: രാജ്യത്തെ ബാങ്കുകളിൽ നിന്ന്​ ഇടപാടുകളുടെ ആധികാരികത ഉറപ്പാക്കാൻ ഒ.ടി.പി മെയിലിലും എസ്​.എം.എസായും ലഭിക്കുന്ന പതിവ്​ അവസാനിക്കുന്നു. പകരം സ്മാർട്​ മൊബൈൽ ആപ്ലിക്കേഷനുകൾ വഴിയായിരിക്കും ഇടപാടുകളുടെ ആധികാരികത ഉറപ്പുവരുത്തുന്നത്​. ഒ.ടി.പികൾ അയക്കുന്നത്​ ക്രമേണ കുറച്ചുകൊണ്ടുവരാനുള്ള യു.എ.ഇ സെൻട്രൽ ബാങ്ക്​ നിർദേശപ്രകാരമാണ്​ നടപടി സ്വീകരിച്ചത്​. വെള്ളിയാഴ്ച മുതൽ നടപടി ആരംഭിക്കും. ഇടപാടുകൾ കൂടുതൽ സുരക്ഷിതവും എളുപ്പത്തിലുമാക്കുന്നതാണ്​ മാറ്റം. ബാങ്ക്​ അക്കൗണ്ടുമായി ബന്ധപ്പെട്ട തട്ടിപ്പുകളിൽ നിന്ന്​ രക്ഷപ്പെടാനും ഉപഭോക്​താക്കൾക്ക്​ സംവിധാനം വഴി സാധ്യമാകും.

എല്ലാ അന്താരാഷ്ട്ര, ആഭ്യന്തര ഇടപാടുകളും 2026 മാർച്ചോടെ ആപ്പ്​ വഴിയുള്ള ഒതന്‍റിഫിക്കേഷനിലേക്ക്​ മാറണമെന്നാണ്​ സെൻട്രൽ ബാങ്ക്​ നിർദേശിച്ചിരിക്കുന്നത്​. ഇതനുസരിച്ച്​ അടുത്ത വർഷം മാർച്ചോടെ എസ്​.എം.എസ്​ ഒടി.പികൾ പൂർണമായും ഇല്ലാതാകും. അതുവരെ ചില ഉപഭോക്​താക്കൾക്ക്​ ഒ.ടി.പി ലഭിക്കാനും സാധ്യതയുണ്ട്​. ആപ്പ്​ വഴിയുള്ള ആധികാരികത ഉറപ്പുവരുത്തൽ സംവിധാനം ഉപഭോക്​താക്കൾക്ക്​ കൂടുതൽ എളുപ്പമുള്ളതുമാണ്​. എസ്​.എം.എസ്​ വഴിയും മെയിൽ വഴിയും വരുന്ന ഒ.ടി.പികൾ ടൈപ്പ്​ ചെയ്യുകയോ കോപി ചെയ്യുകയോ വേണ്ടതുണ്ടായിരുന്നു. എന്നാൽ ആപ്പ്​ വഴിയാകുമ്പോൾ ഇടപാടിന്​ അംഗീകാരം നൽകാ​നും തള്ളിക്കളയാനും ഒരു നിമിഷത്തിൽ സാധിക്കും.

മിക്ക സൈബർ തട്ടിപ്പുകളും ഒ.ടി.പി അടിസ്ഥാനമാക്കിയാണ്​ നടക്കുന്നത്​. ഇടപാടുകൾ ആപ്പ്​ വഴി ആകുന്നതോടെ സൈബർ തട്ടിപ്പുകൾ വളരെ കുറക്കാൻ സാധിക്കും. എസ്​.എം.എസ്​ വഴി ലഭിക്കുന്ന ഒ.ടി.പികൾ മൊബൈൽ നമ്പർ ഹൈജാക്ക്​ ചെയ്ത്​ കൈക്കലാക്കുന്ന തട്ടിപ്പുകാരുണ്ട്​. ഇതിൽ നിന്നും സുരക്ഷ നൽകുന്നതാണ്​ പുതിയ സംവിധാനം. ആപ്പുകളുടെ സുരക്ഷ ഉറപ്പാക്കാൻ ബാങ്കുകൾ ബയോമെട്രിക്സ്​, പാസ്​കോഡ്​വീഡിയോ സെൽഫി പോലുള്ള തൽസമയ പരിശോധന എന്നിവ ഉപയോഗപ്പെടുത്തുന്നുണ്ട്​. അതിനാൽ മറ്റൊരാൾക്ക്​ ആപ്പുകൾ ആക്സസ്​ ചെയ്യാൻ സാധിക്കണമെന്നില്ല.

എമിറേറ്റ്​സ്​ എൻ.ബി.ഡി, മഷ്​രിഖ്​, എ.ഡി.സി.ബി, എഫ്​.എ.ബി എന്നിങ്ങനെ വിവിധ ബാങ്കുകൾ ആപ്പ്​ അടിസ്ഥാനമാക്കിയുള്ള ബാങ്കിങിലേക്ക്​ മാറിയിട്ടുണ്ട്​. ചില ബാങ്കുകൾ ആപ്പുകളിൽ തന്നെ സ്മാർട്​ ഒ.ടി.പി രീതിയും സ്വീകരിക്കുന്നുണ്ട്​.