പുതുവൽസരാഘോഷം: മുന്നൊരുക്കങ്ങളുമായി പൊലീസും ആർ.ടി.എയും മുന്നൊരുക്കങ്ങളുമായി പൊലീസും ആർ.ടി.എയും

ദുബൈ: പുതുവൽസരാഘോഷത്തോടനുബന്ധിച്ച്​ ഉണ്ടാകുന്ന വൻ തിരക്ക്​ നിയന്ത്രിക്കാൻ ദുബൈ പൊലീസും ആർ.ടി.എയും  നടപടികൾ പ്രഖ്യാപിച്ചു. ​റോഡുകൾ അടച്ചും പൊതുഗതാഗത സംവിധാനം കൂടുതൽ കാര്യക്ഷമമാക്കിയും ജനങ്ങൾക്ക്​ ബുദ്ധിമുട്ടില്ലാത്ത ആഘോഷം സമ്മാനിക്കാനാണ്​ പദ്ധതി. 

റോഡുകളും തെരുവുകളും അടക്കും 
ആഘോഷം സുഗമമാക്കുന്നതി​​െൻറ ഭാഗമായി മുഹമ്മദ്​ ബിൻ റാശിദ്​ ബുലെവാർഡ്​ ഡിസംബർ 31 ന്​ വൈകിട്ട്​ അഞ്ച്​ മുതൽ എട്ട്​ വരെ അടക്കും. പാർക്കിങ്​ നിറഞ്ഞാൽ അതിന്​ മുമ്പ്​ തന്നെ പ്രവേശനം അസാധ്യമായേക്കും. ഇങ്ങോ​േട്ടക്ക്​ വരുന്നവർ അഞ്ചിന്​ മുമ്പ്​ എത്തണമെന്ന്​ അധികൃതർ അറിയിച്ചിട്ടുണ്ട്​. ഫിനാൻഷ്യൽ സ​െൻറർ സ്​ട്രീറ്റ്​, അൽ സൂഖ്​ സ്​ട്രീറ്റ്​ എന്നിവ രാത്രി എട്ടിന്​  പൂട്ടും. ഉൗദ്​ മേത്ത സ്​ട്രീറ്റിൽ നിന്ന്​ ഫിനാൻഷ്യൽ സ​െൻറർ സ്​ട്രീറ്റിലേക്കുള്ള അൽ അസായേൽ സ്​ട്രീറ്റ്​ വൈകിട്ട്​ നാല്​ മുതൽ പൊതുവാഹനങ്ങൾക്കും അടിയന്തിര സാഹചര്യം നേരിടാൻ പോകുന്ന വാഹനങ്ങൾക്കും മാത്രമായി നിയ​ന്ത്രിക്കപ്പെടും. 
അൽ സാദ റോഡിൽ അൽ മുറൂജ്​ ജംഗ്​ഷൻ മുതൽ ബുർജ്​ ഖലീഫയിലേക്കും ടണലിലേക്കുമുള്ള ഭാഗം വൈകിട്ട്​ ആറിന്​ അടക്കും. എമിറേറ്റ്​ ടവറിലേക്കുള്ള ജംഗ്​ഷൻ രാത്രി എട്ടിനും അടക്കും. ദുബൈ പൊലീസി​​െൻറ സഹായത്തോടെ ആർ.ടി.എയാണ്​ നിയന്ത്രണങ്ങൾ ഏർപ്പെടുത്തുന്നത്​. 
ബുർജ്​ ഖലീഫ മെട്രോ സ്​റ്റേഷൻ രാത്രി 10 മണി വരെ മാത്രമെ പ്രവർത്തിക്കൂ. ബുർജ്​ ഖലീഫ മെട്രോ സ്​റ്റേഷനും ബിസിനസ്​ ബേ മെട്രോ സ്​റ്റേഷനും സമീപത്തുള്ള ക്രോസിങ​ുകൾ വഴിവേണം കാൽനട യാത്രികർ ശൈഖ്​ സായദ്​ റോഡ്​ മുറിച്ചു കടക്കാൻ.

യാത്രക്ക്​ 170 സൗജന്യ ബസുകൾ
ആഘോഷം നടക്കുന്നിടത്തു നിന്ന്​ ജനങ്ങളെ യാത്രാ സൗകര്യം ലഭ്യമാകുന്ന വിവിധയിടങ്ങളിലെത്തിക്കാൻ 170 ബസുകളാണ്​ ഏർപ്പെടുത്തിയിരിക്കുന്നത്​. ഇവയിൽ യാത്ര സൗജന്യമാണ്​. ബുർജ്​ ഖലീഫ മെട്രോ സ്​റ്റേഷനിൽ നിന്ന്​ അൽ ജാഫിലിയ സ്​റ്റേഷനിലേക്കും മൻഖൂൽ പ്രാർത്ഥനാ മൈതാനത്തേക്കും ജനങ്ങളെ എത്തിക്കാൻ ​ശൈഖ്​ സായദ്​ റോഡ്​ വഴി 90 ബസുകൾ സർവീസ്​ നടത്തും. ബുർജ്​ ഖലീഫ മെട്രോ സ്​റ്റേഷനിൽ നിന്ന് നൂർ ബാങ്ക്​ സ്​റ്റേഷനിലേക്ക്​ 20 ബസുകൾ ഒാടിക്കും. വാഹന പാർക്കിങിന്​ നീക്കിവച്ചിരിക്കുന്ന അൽ വാസൽ ക്ലബ്​, ജാഫിലിയ, ദേര സിറ്റി സ​െൻറർ എന്നിവിടങ്ങളിലേക്ക്​ ഫിനാൻഷ്യൽ സ​െൻറർ സ്​ട്രീറ്റിൽ നിന്ന്​ ആളുകളെ എത്തിക്കാൻ 35 ബസുകൾ ഉണ്ട്​. അൽ ജാഫിലിയ സ്​റ്റേഷനിലേക്കും മൻഖൂൽ പ്രാർത്ഥനാ മൈതാനത്തേക്കും  ഫിനാൻഷ്യൽ സ​െൻറർ സ്​ട്രീറ്റിൽ നിന്ന്​ 20 ബസുകൾ ഒാടിക്കും. നൂർ ബാങ്ക്​ മെട്രോ സ്​റ്റേഷനിലേക്ക്​ ദുബൈ വാട്ടർ കനാലിൽ നിന്ന്​ അഞ്ച്​ ബസുകളിൽ യാത്രികർ എത്തും. ഇൗ സംവിധാനം ഉപയോഗിച്ച്​ രാത്രി 12 നും പുലർച്ചെ നാലിനുമിടയിൽ 23100 പേർക്ക്​ യാത്ര ചെയ്യാനാവുമെന്നാണ്​ പ്രതീക്ഷിക്കപ്പെടുന്നത്​. പരിപാടി നടക്കുന്നിടത്തേക്ക്​ എത്താൻ കഴിവതും പൊതുഗതാഗത സംവിധാനത്തെ ആശ്രയിക്കണമെന്ന്​ അധികൃതർ അറിയിച്ചിടുണ്ട്​. 

പാർക്കിങിന്​ കൂടുതൽ സ്​ഥലം
ബുർജ്​ ഖലീഫയിലെ പരിപാടികൾ കാണാൻ എത്തുന്നവർക്കായി 4000 പാർക്കിങ്​ ഇടങ്ങളാണ്​ സജ്ജമാക്കിയിരിക്കുന്നത്​. അൽ വാസൽ ക്ലബിൽ 1000, അൽ ജാഫിലിയയിലെ ജനറൽ ഡയറക്​​ട്രേറ്റ്​ ഒാഫ്​ റെസിഡൻസി ആൻറ്​ ഫോറിനേഴ്​സ്​ അഫയേഴ്​സിൽ 500, മൻഖൂൽ പ്രാർത്ഥനാ മൈതാനത്ത്​ 1500, വാട്ടർ കനാൽ 1000 എന്നിങ്ങനെയാണ്​ പാർക്കിങ്​ സൗകര്യം  ഏർപ്പെടുത്തിയിരിക്കുന്നത്​. ഇൗ അവസരത്തിൽ ടാക്​സികൾ 18000 ട്രിപ്പുകൾ നടത്തുമെന്നും ഇതിലൂടെ 38500 യാത്രികർ സഞ്ചരിക്കുമെന്നും പ്രതീക്ഷിക്കുന്നുണ്ട്​. 

മെട്രോ കൂടുതൽ സമയം ഒാടും
ഡിസംബർ 31 ന്​ മെട്രോ റെഡ്​ ലൈൻ സർവീസ്​ രാവിലെ അഞ്ച്​ മണിക്ക്​ തുടങ്ങും. ഗ്രീൻ ലെൻ 5.30 നായിരിക്കും പ്രവർത്തനം ആരംഭിക്കുക. പിറ്റേന്ന്​ പുലർച്ചെ ഒരു മണി വരെ സർവീസ്​ നീളും. 

മുന്നറിയിപ്പുകൾ ​ശ്രദ്ധിക്കാം
പാർക്കിങ്​ സൗകര്യം എവിടെയൊക്കെ ഏർപ്പെടുത്തിയിട്ടുണ്ടെന്ന്​ വ്യക്​തമാക്കുന്ന 62 സൂചനാ ​േബാർഡുകൾ ആർ.ടി.എ. സ്​ഥാപിക്കും. 
തിരക്കുള്ള റോഡുകൾക്ക്​ പകരം ഉപയോഗിക്കാവുന്ന റോഡുകൾ വ്യക്തമാക്കുന്ന ബോർഡുകളും സ്​ഥാപിക്കും. പരിപാടികൾ നടക്കുന്നിടത്തേക്ക്​ കാൽ നടക്കാർക്ക്​ അനായാസം എത്തുന്നതിന്​ 67 സൂചനാ ബോർഡുകളും ഉണ്ടാവും. തൽസമയ നിർദേശങ്ങൾ നൽകാൻ ലൈറ്റ്​ സിഗ്​നലുകളും ഉണ്ടാവും. 
ദുബൈ വാട്ടർ കനാലിന്​ മുകളിൽ കാൽനടക്കാർക്കായി സ്​ഥാപിച്ചിരിക്കുന്ന മേൽപാലം അടച്ചിടും. വാട്ടർ കനാലിന്​ മുകളിൽ ശൈഖ്​ സായദ്​ റോഡിലുള്ള വാക്​വേയും അടക്കും. ക്രമീകരണങ്ങളെക്കുറിച്ചുള്ള സംശയങ്ങൾ പരിഹരിക്കുന്നതിന്​ ​8009090 എന്ന ടോൾഫ്രീ നമ്പറും ആർ.ടി.എ. ഏർപ്പെടുത്തിയിട്ടുണ്ട്​.