ഗ്ലോബൽ വി​ല്ലേജ്​ ഒരുങ്ങുന്നു; പുതുപുത്തനായി

ദുബൈ: ഈ മാസം 26ന്​ ആരംഭിക്കുന്ന ഗ്ലോബൽ വില്ലേജി​െൻറ 26ാം സീസണിൽ പുതിയ അനുഭവങ്ങളും കാഴ്​ചകളും ഒരുക്കി സംഘാടകർ. സന്ദർശകർക്ക്​ കൂടുതൽ സൗകര്യപ്രദമായ രീതിയിൽ വിനോദ പരിപാടികൾ ആസ്വദിക്കാൻ കഴിയുന്നതിന്​ പശ്ചാത്തല സൗകര്യങ്ങളടക്കം വിപുലീകരിക്കുന്നുണ്ട്​. സന്ദർശകർക്ക്​ കൂടുതൽ ഇരിപ്പിടങ്ങൾ നിർമിക്കുകയും നടപ്പാതകൾ പുതുക്കിപ്പണിയുകയും ചെയ്​തിട്ടുണ്ട്​. എക്​സ്​പോ കൂടി നടക്കുന്ന സാഹചര്യത്തിൽ കൂടുതൽ സന്ദർശകരെ പ്രതീക്ഷിക്കുന്നതിനാൽ തിരക്കൊഴിവാക്കാനാണ്​ നടപടികൾ സ്വീകരിച്ചത്​. അതു​പോലെ പ്രധാന വേദിയിലും ഇത്തവണ പലവിധ മാറ്റങ്ങൾ കൊണ്ടുവന്നിട്ടുണ്ട്​. ഒാരോ തവണയും അഥിതികളുടെ അഭിപ്രായം തേടുകയും മാറ്റങ്ങൾ വരുത്തുകയും ചെയ്യുന്നത്​ പതിവാണെന്നും സന്ദർശകർക്ക്​ കൂടുതൽ മികച്ച സൗകര്യമൊരുക്കാനുള്ള നടപടികളാണ്​ ഇത്തവണ സ്വീകരിച്ചതെന്നും ഗ്ലോബൽ വില്ലേജ്​, െഗസ്​റ്റ്​ റിലേഷൻസ്​ സീനിയർ മാനേജർ മുഹന്നദ്​ ഇസ്​ഹാഖ്​ പറഞ്ഞു. എല്ലാവരുടെ സന്ദർശനവും കഴിയുന്നത്ര ആസ്വാദ്യകരവും സൗകര്യപ്രദവുമാക്കാൻ പരിശ്രമിക്കുന്നത് തുടരും. അതിഥികൾക്ക്​ ഏറ്റവും മികച്ച വിനോദത്തിനും കുടുംബത്തോടപ്പമുള്ള ആനന്ദത്തിനുമായി ഒരുക്കങ്ങൾ പൂർത്തിയായി -അദ്ദേഹം പറഞ്ഞു. മുഖ്യവേദിയിൽ സീറ്റുകൾ വർധിപ്പിച്ചത്​ സന്ദർശകർക്ക്​ ഏറെ ഗുണംചെയ്യും. ഓഡിയോ വിഷ്വൽ സംവിധാനങ്ങളുടെ ഗുണനിലവാരം വർധിപ്പിച്ചു. കുട്ടികളുടെ തിയറ്റർ സ്​റ്റേജിലും പുതിയ സംവിധാനങ്ങൾ ഒരുക്കിയിട്ടുണ്ട്​. കാർണിവലിണ്​ സമീപം കുട്ടികൾക്കും ഒപ്പമുള്ളവർക്കും പുതിയ സിറ്റിങ്​ സൗകര്യവും നിർമിച്ചിട്ടുണ്ട്.