ജലസംരക്ഷണത്തിന്​  ദുബൈ ടാപ്പ്​ എത്തി

ദുബൈ: ഉൗർജ സംരക്ഷണത്തിന്​ ദുബൈ ലൈറ്റുകൾ സ്​ഥാപിച്ചതിന്​ പിന്നാലെ ജലസംരക്ഷണത്തിന്​ വേണ്ടി ‘ദുബൈ ടാപ്പു’കളും എത്തി. വെള്ളം പാഴാകുന്നത്​ 80 ശതമാനം തടയാൻ ഉതകുന്നതാണ്​ ഇവ​െയന്ന്​ ടാപ്പുകൾ പുറത്തിറക്കിക്കൊണ്ട്​​ നടത്തിയ വാർത്താസമ്മേളനത്തിൽ ദുബൈ മുനിസിപ്പാലിറ്റി ഡയറക്​ടർ ജനറൽ ഹുസൈൻ നാസർ ലൂത്ത പറഞ്ഞു. വെള്ളം അമിതമായി ഒഴുകുന്നത്​ തടയുന്ന തരത്തിൽ പ്രത്യേകതരം വാൽവ്​ ഘടിപ്പിച്ചവയാണ്​ ഇവ. പള്ളികളിൽ അംഗശുദ്ധി വരുത്തുന്നതിനിടെ ധാരാളം ജലം പാഴാകുന്നുണ്ട്​.  പഠനങ്ങളിൽ കണ്ടെത്തിയതനുസരിച്ച്​ ഒരു വ്യക്തി വർഷം 35100 ലിറ്റർ വെള്ളം ഇതിനായി ഉപയോഗിക്കുന്നുണ്ട്​. ദുബൈ ടാപ്പ്​ ഘടിപ്പിച്ചാൽ ഇത്​ 7614 ലിറ്റർ ആയിക്കുറക്കാൻ കഴിയും. അംഗശുദ്ധിക്കായി സ്​ഥാപിക്കുന്ന സാധാരണ ടാപ്പിലൂടെ മിനിറ്റിൽ 6.5 ലിറ്റർ വെള്ളം പോകു​േമ്പാൾ ദുബൈ ടാപ്പിലൂടെ 1.41 ലിറ്റർ വെള്ളമെ ഒഴുകൂ. ഒാരോരുത്തർക്കും ഇത്​ വഴി പ്രതിവർഷം 27486 ലിറ്റർ വെള്ളം ലാഭിക്കാനാകുമെന്നാണ്​ കണക്ക്​. ആദ്യ ഘട്ടത്തിൽ ദുബൈയിലെ എല്ലാ പള്ളികളിലുമാണ്​ ദുബൈ ടാപ്പ്​ സ്​ഥാപിക്കുക. ടാപ്പ്​ ഉൽപാദനത്തിന്​ ഹമദ്​ റഹ്​മ അൽ ശംസി ജനറൽ ട്രേഡിങ്​കമ്പനിയുമായി മുനിസിപ്പാലിറ്റി കരാർ ഒപ്പിട്ടിട്ടുണ്ട്​. നഗരസഭയുടെ വിവിധ പദ്ധതികളിലും ഇൗ ടാപ്പായിരിക്കും ഉപയോഗിക്കുക. കരാർ പ്രകാരം ടാപ്പ്​ നിർമിച്ച്​ വിതരണം ചെയ്യേണ്ട ഉത്തരവാദിത്വം സ്വകാര്യ കമ്പനിക്കാണ്​. ടാപ്പ്​ ഉപയോഗം വ്യാപകമാക്കാനുള്ള നടപടികൾ മുനിസിപ്പാലിറ്റി സ്വീകരിക്കും. ഇതിനായി പ്രത്യേക സമിതിയെയും നിയമിക്കും. എന്നാൽ ദുബൈയിലെ കെട്ടിടങ്ങൾക്ക്​ ഇവ നിർബന്ധമാക്കിയിട്ടില്ല. വിപണിയിൽ സുലഭമായി ലഭ്യമാകുന്ന സാഹചര്യത്തിൽ ഇവ ഉപയോഗിക്കുന്നത്​ കെട്ടിട നിർമാണ കമ്പനികൾക്കിടയിൽ പ്രോൽസാഹിപ്പിക്കാനാണ്​ ഉദ്ദേശിക്കുന്നത്​. 2021 ഒാടെ വായുമലിനീകരണം കുറക്കാനും ജലസംരക്ഷണം ഉറപ്പാക്കാനും ശുദ്ധമായ ഉറവിടങ്ങളിൽ നിന്നുള്ള ഉൗർജം ഉപയോഗിക്കാനുമുള്ള പദ്ധതികളുടെ ഭാഗമായാണ്​ ദുബൈ ടാപ്പ്​ പുറത്തിറക്കിയിരിക്കുന്നത്​.