കോവിഡ് സമ്പർക്കം കണ്ടെത്താൻ പുതിയ സംവിധാനം

ദുബൈ: കോവിഡ്​ രോഗികൾ ആരെല്ലാമായി സമ്പർക്കം പുലർത്തി എന്നറിയാൻ സംവിധാനവുമായി അബൂദബി ആരോഗ്യ വകുപ്പ്​. പോസിറ്റിവാകുന്നവരുമായി നടത്തുന്ന ചാറ്റിലൂടെയായിരിക്കും ഇവ​െര കണ്ടെത്തുക. ഇതുവഴി ആവശ്യമായ നിർദേശങ്ങൾ നൽകാനും രോഗവ്യാപനം തടയാനും കഴിയുമെന്നാണ്​ പ്രതീക്ഷ.

ഗൾഫ് മേഖലയിൽ ആദ്യമായാണ് കോവിഡ് സമ്പർക്കം കണ്ടെത്താൻ ഇത്തരമൊരു സാങ്കേതിക സംവിധാനം. അബൂദബിയിലാണ്​ ആദ്യമായി നടപ്പാക്കുന്നത്​. കോവിഡ് പോസിറ്റിവ് ആണെന്ന ഫലം വരുന്നതോടൊപ്പം രോഗികൾക്ക് എസ്.എം.എസ് വഴി ലിങ്ക് കൂടി ലഭിക്കും. ഇതിൽ രോഗിയുമായി വെർച്വൽ ചാറ്റിങ്​ നടക്കും. എമിറേറ്റ്സ് ഐ.ഡി വിവരങ്ങൾ പരിശോധിച്ച ശേഷം രോഗിയോട് ചില ചോദ്യങ്ങൾ ചാറ്റിലൂടെ ആരായും.

വിദേശത്തുനിന്ന് വന്നവർ, ജോലി സ്ഥലത്തുണ്ടായവർ, അടുത്ത് സമ്പർക്കം പുലർത്തിയവർ, 48 മണിക്കൂറിനിടെ കണ്ടുമുട്ടിയവർ തുടങ്ങിയ വിവരങ്ങൾ ചാറ്റിലൂടെ ശേഖരിക്കും. ഈ വിവരങ്ങൾ അതീവ രഹസ്യമാക്കി സൂക്ഷിക്കും. രോഗിയുമായുള്ള ചാറ്റിൽ നിന്ന് ലഭിക്കുന്ന വിവരങ്ങളുടെ അടിസ്ഥാനത്തിൽ രോഗവ്യാപനം തടയാൻ നടപടി ആവിഷ്കരിക്കാൻ ഈ സാങ്കേതിക വിദ്യ സൗകര്യമൊരുക്കും. അബൂദബി പൊതുജനാരോഗ്യ കേന്ദ്രവും ആരോഗ്യ വകുപ്പും സംയുക്തമായാണ് സാങ്കേതിക സംവിധാനം വികസിപ്പിച്ചത്.