യു.എ.ഇയിൽ പുതിയ നിയമം : മന്ത്രിമാർക്കും ഉദ്യോഗസ്ഥർക്കുമെതിരെ പരാതി നൽകാം

ദുബൈ: മന്ത്രിമാ​ർക്കെതിരെയും മുതിർന്ന ഉദ്യോഗസ്​ഥർക്കെതിരെയും പരാതി നൽകാനും അന്വേഷണം നടത്താനും അവസരം നൽകുന്ന പുതിയ നിയമം യു.എ.ഇ അവതരിപ്പിച്ചു. യു.എ.ഇ ​പ്രസിഡൻറ്​ ശൈഖ്​ ഖലീഫ ബിൻ സായിദ്​ ആൽ നഹ്​യാൻ നിയമത്തിന്​ അംഗീകാരം നൽകി. യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമാണ്​ ഇക്കാര്യം അറിയിച്ചത്​. യു.എ.ഇ പ്രവർത്തനങ്ങൾ കൂടുതൽ സുതാര്യമാക്കാനാണ്​ നിയമം നടപ്പാക്കുന്നതെന്ന്​ ശൈഖ്​ മുഹമ്മദ്​ ട്വിറ്ററിൽ കുറിച്ചു.

കുറ്റക്കാരെന്ന്​ കണ്ടെത്തുന്ന മുതിർന്ന ഉദ്യോഗസ്​ഥർക്ക്​ യാത്രാനുമതി നിഷേധിക്കാനും സ്വത്ത്​​ മരവിപ്പിക്കാനുമുള്ള അവകാശം അറ്റോണി ജനറലിനുണ്ടാകും. ഭരണപരവും സാമ്പത്തികവുമായ കുറ്റകൃത്യങ്ങൾ കണ്ടെത്തിയാൽ മുതിർന്ന ഉദ്യോഗസ്​ഥരെ പുറത്താക്കാം. വീഴ്ച കണ്ടെത്തിയാൽ മന്ത്രിയെ ശാസിക്കാനും ചുമതലയിൽനിന്ന് പുറത്താക്കാനും ആനുകൂല്യം തടയാനും നിയമം വ്യവസ്ഥചെയ്യുന്നു.

എല്ലാവരിൽനിന്നും പരാതി സ്വീകരിക്കാൻ അവകാശം പ്രോസിക്യൂട്ടർക്കുണ്ടാകും. എന്നാൽ, തുടർനടപടികൾക്ക്​ സുപ്രീം കൗൺസി​ലി​െൻറ അനുമതി തേടണം. അനുമതിയില്ലാതെ മന്ത്രിമാരെയോ ഉദ്യോഗസ്​ഥരെയോ ചോദ്യം ചെയ്യാനോ അന്വേഷണം നടത്താനോയുള്ള അധികാരം പ്രോസിക്യൂട്ടർക്കില്ല. ഉദ്യോഗസ്​ഥർക്കെതിരായ പരാതി ലഭിച്ചാൽ പ്രോസിക്യൂട്ടർ മന്ത്രിസഭയെ അറിയിക്കണം. അതേസമയം, മന്ത്രിക്കെതിരായ പരാതിയാണെങ്കിൽ വിവരം രഹസ്യസ്വഭാവത്തിൽ കാബിനറ്റി​െൻറ ചുമതലയുള്ള മന്ത്രിയെ അറിയിക്കണം. നിലവിൽ മുഹമ്മദ്​ അൽ ഗർഗാവിക്കാണ്​ കാബിനറ്റി​െൻറ ചുമതല. അന്വേഷണവുമായി മുന്നോട്ടുപോകണോ എന്ന്​ തെളിവുകളുടെ അടിസ്​ഥാനത്തിൽ കാബിനറ്റ്​ മന്ത്രി തീരുമാനിക്കും. അന്വേഷണം തുടരാനാണ്​ തീരുമാനമെങ്കിൽ വിവരം പ്രധാനമന്ത്രിയെ അറിയിക്കണം. അനുമതി ലഭിച്ചാൽ നിയമബിരുദം നേടിയ പബ്ലിക്​ പ്രോസിക്യൂട്ടറായിരിക്കും അന്വേഷണം നടത്തുക. കുറ്റക്കാരനെന്ന്​ കണ്ടെത്തിയാൽ അറ്റോണി ജനറൽ റിപ്പോർട്ട്​ കാബിനറ്റ്​കാര്യ മന്ത്രിക്ക്​ കൈമാറും. ഈ റിപ്പോർട്ട്​ പ്രധാനമന്ത്രിക്ക്​ സമർപ്പിച്ചശേഷം അദ്ദേഹത്തി​െൻറ അനുമതിയോടെയാകും തുടർനടപടികളുമായി മുന്നോട്ടുപോകുക. പരാതിയുമായി മുന്നോട്ടുപോകേണ്ടെന്നാണ്​ അറ്റോണി ജനറലി​െൻറ തീരുമാനമെങ്കിലും വിവരം കാബിനറ്റ്​ കാര്യമന്ത്രിയെയും പ്രധാനമന്ത്രിയെയും അറിയിക്കണം.

യാത്രാവിലക്കേർപ്പെടുത്തൽ, സ്വത്ത്​​ മരിപ്പിക്കൽ, ഭാര്യയുടെയും കുട്ടികള​ുടെയും സ്വത്ത്​ മരവിപ്പിക്കൽപോലുള്ള നടപടികളെടുക്കാനുള്ള ചുമതല അറ്റോണി ജനറലിനായിരിക്കും. റിപ്പോർട്ടിനെതിരെ മന്ത്രിയോ മുതിർന്ന ഉദ്യോഗസ്​ഥനോ പരാതി നൽകിയാൽ രണ്ടാഴ്​ചക്കകം തീരുമാനം എടുക്കണം. പബ്ലിക്​ പ്രോസിക്യൂട്ടറായിരിക്കും കേസ്​ കോടതിയിൽ ഫയൽ ചെയ്യുക. റിപ്പോർട്ട്​ പഠിച്ചശേഷം കോടതി അന്തിമവിധി പ്രഖ്യാപിക്കും. യാത്രാവിലക്ക് നീക്കാനും സ്വത്ത്​ മരവിപ്പിക്കൽ ഒഴിവാക്കാനും കോടതിക്ക് അധികാരമുണ്ട്. വിധി പ്രഖ്യാപിച്ച്​ 30 ദിവസത്തിനുള്ളിൽ അപ്പീൽ നൽകാം. സ്വത്ത്​ മരവിപ്പിക്കൽ, യാത്രാവിലക്ക്​ എന്നിവയിൽ മൂന്ന്​ മാസത്തിന്​ ശേഷമേ അപ്പീൽ നൽകാൻ കഴിയൂ. ആറ്​ ജഡ്​ജിമാരുടെ കമ്മിറ്റിയായിരിക്കും അപ്പീലിൽ അന്തിമവിധി പറയുക.