ദുബൈ റാസൽഖോറിൽ പുതിയ എക്സിറ്റ് ആഗസ്റ്റിൽ​ തുറക്കും​

ദു​ബൈ: ഫിനാൻഷ്യൽ സെന്‍റർ സ്​ട്രീറ്റിൽ നിന്ന്​ റാസൽഖോർ റോഡിലേക്ക്​ സഞ്ചരിക്കുന്ന വാഹനങ്ങൾക്കായി കലക്ടർ റോഡിൽ നിന്ന്​ പുതിയ എക്സിറ്റ്​ ആഗസ്റ്റ്​​ ആദ്യം തുറക്കുമെന്ന്​​ ദുബൈ റോഡ്​ ഗതാഗത അതോറിറ്റി അറിയിച്ചു. റാസൽഖോർ മേഖലയിൽ ഗതാഗതം സുഗമമാക്കുന്നതിനും റോഡ്​ ശൃംഖലയുടെ​ കാര്യക്ഷമത മെച്ചപ്പെടുത്താനും ലക്ഷ്യമിട്ട്​ നടത്തുന്ന വികസന പ്രവർത്തനങ്ങളുടെ ഭാഗമായാണ്​ പുതിയ എക്സിറ്റ്​ നിർമാണം​.

മേഖലയിലെ പ്രധാന വികസന പ്രവർത്തനങ്ങൾ, വാണിജ്യ, വ്യവസായ മേഖലകൾ എന്നിവിടങ്ങളിലേക്കുള്ള അതിർത്തി പ്രദേശമാണ്​ ബു കദ്​റ ഇന്‍റർചേഞ്ചിന്​ സമീപത്തുള്ള റാസൽഖോർ റോഡ്​. പുതിയ എക്സിറ്റ്​ വരുന്നതോടെ ഫിനാൻഷ്യൽ സെന്‍റർ സ്​ട്രീറ്റിൽ നിന്ന്​ കലക്ടർ റോഡിലൂടെ റാസൽഖോറിലേക്ക്​ പോകുന്നവരുടെ യാത്ര സമയം വലിയ തോതിൽ കുറയും. തിരക്കേറിയ സമയങ്ങളിൽ ഈ റൂട്ടിലെ യാത്രസമയം 13 മിനിറ്റിൽ നിന്ന്​ ആറു മിനിറ്റായി 54 ശതമാനമാണ്​ കുറയുക. അതോടൊപ്പം ദുബൈ-അൽഐൻ റോഡിലേക്ക്​ പോകുന്ന വാഹനങ്ങളുടെ തിരക്ക്​ കുറക്കാനും പുതിയ എക്സിറ്റ്​ സഹായകമാവും.

അടുത്തിടെ റാസൽഖോർ മേഖലയിൽ നടത്തിയ വികസന പ്രവർത്തനങ്ങളുടെ ഭാഗമായി എക്സിറ്റ്​ 25 വികസിപ്പിച്ചിരുന്നു. റാസൽ ഖോർ റോഡിൽ നിന്ന് അൽ ഖൈൽ റോഡിലേക്കുള്ള ഈ എക്സിറ്റ്​ ഭാഗം 500 മീറ്റർ ദൂരത്തിൽ ഒറ്റവരിയിൽ നിന്ന് രണ്ട് വരികളായാണ്​ വികസിപ്പിച്ചത്​. ഈ നവീകരണത്തിലൂടെ റോഡിന്​ മണിക്കൂറിൽ 3,000 വാഹനങ്ങളെ ഉൾകൊള്ളാനുള്ള ശേഷിയുണ്ടാകും. തിരക്കേറിയ സമയങ്ങളിൽ യാത്ര സമയം ഏഴ്​ മിനിറ്റിൽ നിന്ന്​ നാല്​ മിനിറ്റായി കുറക്കാനും ഇത്​ സഹായകമാവും.