അബൂദബി പ്രവേശനത്തിന്​ പുതിയ നിബന്ധന

അബൂദബി: കോവിഡ് വ്യാപനം വർധിച്ച സാഹചര്യത്തിൽ അബൂദബി എമിറേറ്റിൽ പ്രവേശിക്കുന്നതിന് എമർജൻസി ക്രൈസിസ് ആൻഡ് ഡിസാസ്​റ്റർ മാനേജ്‌മെൻറ് കമ്മിറ്റി പുതിയ നിബന്ധനകൾ പ്രഖ്യാപിച്ചു.ഞായറാഴ്ച മുതൽ മറ്റ്​ എമിറേറ്റുകളിൽനിന്ന് അബൂദബിയിൽ എത്തുന്നവർ നാലു​ ദിവസത്തിൽ കൂടുതൽ തങ്ങിയാൽ നാലാം ദിവസം പി.സി.ആർ പരിശോധന നടത്തണം. എത്തുന്ന ദിവസം ആദ്യ ദിവസമായി കണക്കാക്കും. എട്ടു ദിവസത്തിൽ കൂടുതൽ താമസിക്കുകയാണെങ്കിൽ എട്ടാം ദിവസം മറ്റൊരു പി.സി.ആർ പരിശോധനയും നടത്തണം. നേരത്തേ ആറു​ ദിവസത്തിൽ കൂടുതൽ തങ്ങുന്നവർ ആറാം ദിവസം പരിശോധന നടത്തണമെന്നായിരുന്നു നിബന്ധന. ഇതിലാണ്​ ഇപ്പോൾ മാറ്റംവന്നിരിക്കുന്നത്​.

മറ്റ്​ എമിറേറ്റുകളിൽനിന്ന്​ അബൂദബിയിലേക്ക്​ പ്രവേശിക്കണമെങ്കിൽ 48 മണിക്കൂറിനുള്ളിൽ നടത്തിയ പി.സി.ആർ പരിശോധന ഫലമോ ലേസർ പരിശോധന നെഗറ്റിവ് ഫലമോ വേണമെന്ന നിബന്ധന തുടരും. ​കോവിഡ് വാക്‌സിൻ പരീക്ഷണത്തിൽ പങ്കാളികളായ സന്നദ്ധപ്രവർത്തകരെയും അടിയന്തര തൊഴിലുമായി ബന്ധപ്പെട്ട ഉദ്യോഗസ്ഥരെയും ഈ നടപടികളിൽനിന്ന് ഒഴിവാക്കിയിട്ടുണ്ട്. ഇവർക്ക് സുഗമമായ യാത്രക്ക് അതിർത്തി ചെക്ക്​​പോസ്​റ്റിന്​ സമീപത്തെ അടിയന്തര വാഹന പാതകൾ ഉപയോഗിക്കാം. അബൂദബിയിൽ പി.സി.ആർ പരിശോധനക്ക് 150 മുതൽ 250 ദിർഹം വരെ ചെലവുവരും. ഒരുതവണ ഡി.പി.ഐ പരിശോധനക്ക് 50 ദിർഹവും ചെലവുണ്ട്. എന്നാൽ ഷാർജ, അജ്​മാൻ ഉൾപ്പെടെയുള്ള എമിറേറ്റുകളിൽ സൗജന്യ പരിശോധന സൗകര്യമുണ്ട്​.

കോവിഡ്-19 പരിശോധന ഉറപ്പുവരുത്തുന്നതിനും വൈറസ് വ്യാപനം തടയുന്നതിനും കഴിഞ്ഞ ജൂൺ രണ്ടു മുതലാണ് അബൂദബി എമിറേറ്റിലേക്ക് പ്രവേശിക്കാനുള്ള നിയന്ത്രണങ്ങൾ പ്രാബല്യത്തിലായത്. അബൂദബിയിലെ ജനസാന്ദ്രത മേഖലകളിൽ ഡോർ ടു ഡോർ കോവിഡ്-19 പരിശോധന അടുത്തിടെ വീണ്ടും വിപുലീകരിച്ചു. വൈറസ് വ്യാപനം തടയാൻ യു.എ.ഇയിലുടനീളം നടത്തിയ സമൂഹ കോവിഡ് പരിശോധന വിജയിച്ചതായും ഇതുവരെ 135 ലക്ഷത്തിലധികം പരിശോധനകൾ നടത്തിയതായും അധികൃതർ വെളിപ്പെടുത്തി.