ഷാർജ അമേരിക്കൻ സർവകലാശാലക്ക് പുതിയ ചാൻസലർ

ഷാർജ: മലയാളികളടക്കം വിവിധ രാജ്യക്കാർ ഉന്നത വിദ്യാഭ്യാസത്തിന്​ തിരഞ്ഞെടുക്കുന്ന ഷാർജ അമേരിക്കൻ സർവകലാശാലയുടെ പുതിയ ചാൻസലറായി ഡോ. സൂസൻ മമ്മിനെ നിയമിച്ച്​ സുപ്രീം കൗൺസിൽ അംഗവും ഷാർജ ഭരണാധികാരിയും അമേരിക്കൻ യൂനിവേഴ്‌സിറ്റി ഓഫ് ഷാർജ പ്രസിഡൻറുമായ ഡോ. ശൈഖ് സുൽത്താൻ ബിൻ മുഹമ്മദ് അൽ ഖാസിമി ഉത്തരവിട്ടു.

പുതിയ ചാൻസലർ ആഗസ്​റ്റിൽ ചുമതലയേൽക്കും. ബോർഡ്​ ചാൻസലർ നിയമന സമിതിയുടെ ശിപാർശയെ തുടർന്നാണ്​ സർവകലാശാല ബോർഡ് ഓഫ് ട്രസ്​റ്റീസ് നിയമനത്തിന്​ അംഗീകാരം നൽകിയത്​.ഉന്നതവിദ്യാഭ്യാസത്തിൽ വിപുലമായ പരിചയമുള്ള ഡോ. സൂസൻ, ചരിത്രകാരി കൂടിയാണ്. സർവകലാശാലയെ നയിക്കാൻ അവർ യോഗ്യയാണ്. ചാൻസലറായി സേവനമനുഷ്ഠിച്ച കാലയളവിൽ സർവകലാശാലയോടുള്ള ശ്രദ്ധേയമായ പ്രതിബദ്ധത പുലർത്തിയ പ്രഫ. കെവിൻ മിച്ചലിന്​ അഭിനന്ദനം അറിയിക്കാൻ ആഗ്രഹിക്കുന്നതായും ശൈഖ് സുൽത്താൻ പറഞ്ഞു. 1999 മുതൽ സർവകലാശാലയിൽ സേവനമനുഷ്ഠിക്കുകയും വിവിധ ഭരണപരമായ ചുമതലകൾ വഹിക്കുകയും ചെയ്​തയാളാണ്​ പ്രഫ. മിച്ചൽ. ഡോ. സൂസൻ മമ്മ് നേരത്തെ കാനഡയിലും ന്യൂസിലൻഡിലും ഉന്നത വിദ്യാഭ്യാസരംഗത്ത്​ പ്രവർത്തിച്ചിട്ടുണ്ട്​.