റസിഡൻസ് വിസ ലംഘകരെ താമസിപ്പിക്കാൻ പുതിയ കേന്ദ്രം

ദുബൈ: ജനറൽ ഡയറക്ടറേറ്റ്​ ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സ് ദുബൈയിൽ റെസിഡൻസി വിസ നിയമലംഘകരെ താമസിപ്പിക്കാൻ പ്രത്യേക കേന്ദ്രം തുറന്നു. അൽ അവീറിൽ 16,731 സ്​ക്വയർ മീറ്റർ വലുപ്പത്തിൽ പണിത കെട്ടിടം അന്തരാഷ്​ട്ര നിലവാരം പുലർത്തുന്നതാണ്​.

ഹോട്ടലിലേത്​ പോലെ സംവിധാനങ്ങളാണ്​ ഇവിടെ​. വിസ കാലാവധി കഴിഞ്ഞവരെയാണ്​ കണ്ടെത്തി ഇവിടേക്ക്​ മാറ്റുക. പരമാവധി 14 ദിവസമാണ്​ ഇത്തരക്കാരെ കേന്ദ്രത്തിൽ താമസിപ്പിക്കുക. അതിന്​ ശേഷം അതത്​ രാജ്യങ്ങളിലേക്ക്​ മടക്കി അയക്കുകയോ മറ്റു നടപടികൾ സ്വീകരിക്കുകയോ ആണ്​ ചെയ്യുന്നത്​.

2015ൽ തുടങ്ങിയ കേന്ദ്രത്തി​െൻറ നിർമാണം 2018ൽ പ്രവർത്തനസജ്ജമായിരുന്നു. നേരത്തെ നിലവിലുള്ള കേന്ദ്രത്തിൽ 500പേരെ താമസിപ്പിക്കാനുള്ള സൗകര്യം മാത്രമാണുണ്ടായിരുന്നത്​. പുതുതായി നിർമിച്ച കേന്ദ്രത്തിൽ 735 പുരുഷൻമാരും 553 സ്​ത്രീകളും ഉൾപ്പെടെ 1288 പേർക്ക്​ കഴിയാൻ സൗകര്യമുണ്ട്​.

നിലവിൽ 11 പുരുഷന്മാരും അത്ര സ്​ത്രീകളുമാണ്​ ഇവിടെ കഴിയുന്നത്​. കേന്ദ്രത്തിൽ കഴിയുന്നവർക്ക്​ നിബന്ധനകൾ പാലിച്ച്​ സന്ദർശകരെ കാണാം​. പാസ്‌പോർട്ട് നഷ്‌ടപ്പെട്ടവർക്ക് ബന്ധപ്പെട്ട കോൺസുലേറ്റുകൾ, എംബസികൾ എന്നിവ വഴി പുതിയ യാത്രാ രേഖകൾ ലഭിക്കും. കോവിഡ് പരിശോധനയും ആരോഗ്യപരിശോധനയും നടത്താൻ താമസക്കാർക്ക് പ്രത്യേക മെഡിക്കൽ ക്ലിനിക്കുമുണ്ട്. ഗുരുതര രോഗമുള്ളവരെ ആംബുലൻസുകൾ വഴി ദുബൈ ഹെൽത്ത് അതോറിറ്റി നടത്തുന്ന ആശുപത്രികളിലേക്ക് മാറ്റും.