വിമാനത്താവളത്തിലിറങ്ങിയോ;  ടെസ്​ല വിളിച്ചോളൂ 

ദുബൈ: ദുബൈ വിമാനത്താവളത്തിലിറങ്ങി തുടർ യാത്രക്ക്​ ദുബൈ ടാക്​സിയെ ആണോ ആശ്രയിക്കുന്നത്​. എങ്കിൽ അടുത്ത തവണ ടെസ്​ല കാറൊന്ന്​ പരീക്ഷി​ച്ചോളൂ. ഇലക്​ട്രിക്​ കാറുകളുടെ തലവര മാറ്റിയ ടെസ്​ല കാറുകൾ 50 എണ്ണമാണ്​ കഴിഞ്ഞ മാസം മുതൽ  വിമാനത്താവളത്തിൽ തയാറായിക്കിടക്കുന്നത്​. ഇവയിൽ പകുതി മോഡൽ എസ്​ എന്ന സെഡാനുകളാണ്​. ബാക്കി മോഡൽ എക്​സ്​ എന്ന എസ്​യുവികളും. പരുന്ത്​ ചിറക്​ വിരിക്കും പോലെ തുറക്കുന്ന വാതിലുകളും പനോരമിക്​ വിൻഡ്​ ഷീൽഡുമുള്ള ​േമാഡൽ എക്​സിൽ ഏഴ്​ പേർക്ക്​ യാത്ര ചെയ്യാം. സുരക്ഷിതത്വമാണ്​ മോഡൽ എസി​​െൻറ പ്രത്യേകത. രണ്ട്​ കാറുകളും ഒറ്റത്തവണ ചാർജ്​ ചെയ്​താൽ 400 കിലോമീറ്റർ ഒാടും. ഒരു തവണ പൂർണമായി ചാർജ്​ ചെയ്യാൻ 3-4 മണിക്കൂർ മതിയാകും. നിലവിൽ വിമാനത്താവളത്തിൽ മാത്രമാണ്​ ഇവയുടെ സേവനം കിട്ടുക. സമീപ ഭാവിയിൽ തന്നെ ദുബൈ മുഴുവൻ ഇവയുടെ സേവനം ലഭ്യമാകും. 2019 ഒാടെ 200 ടെസ്​ലകൾ ദുബൈ ടാക്​സി ലിമോസിൻ ശ്രേണിയിൽ ഉൾപ്പെടുത്താനാണ്​ പദ്ധതി. കഴിഞ്ഞ ഫെബ്രുവരിയിൽ ഇതിനുള്ള കരാർ ഒപ്പുവച്ചിരുന്നു.  ഇതിൽ പെടുന്ന 50 വാഹനങ്ങളാണ്​ ഇപ്പോൾ സർവീസ്​ നടത്തുന്നത്​. 2008 ഒാടെ 75 വാഹനങ്ങളും അതിനടുത്ത വർഷം ബാക്കി വാഹനങ്ങളും ലഭിക്കും. 

ദുബൈയെ ലോകത്തെ ഏറ്റവും സ്​മാർട്ടായ നഗരമാക്കണമെന്ന യു.എ.ഇ. വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്തൂമി​​െൻറ കാഴ്​ചപ്പാടി​​െൻറ അടിസ്​ഥാനത്തിലാണ്​ പദ്ധതി നടപ്പാക്കുന്നതെന്ന്​ ദുബൈ ടാക്​സി കോർപറേഷ​​െൻറ ആക്​ടിങ്​ കോർപറേറ്റ്​ അഡ്​മിനിസ്​ട്രേറ്റീവ്​ സപ്പോർട്ട്​ സർവീസ്​ ഡയറക്​ടർ അമ്മർ റാഷിദ്​ അൽ ബ്രെയ്​കി പറഞ്ഞു. വിമാനത്താവളത്തിൽ നിന്ന്​ സാധാരണ ടാക്​സികളെപ്പോലെ 25 ദിർഹത്തിലാണ്​ ടെസ്​ലക്കും വാടക തുടങ്ങുന്നത്​. കിലോമീറ്ററിന്​ അഞ്ച്​ ദിർഹം വീതം വീണ്ടും നൽകണം. ദുബൈ മുഴുവൻ ഇവയുടെ ഒാട്ടം തുടങ്ങു​േമ്പാൾ നിരക്കിൽ മാറ്റം വരും. എട്ട്​ മണിക്കൂറാണ്​ ഡ്രൈവർമാരുടെ ജോലി സമയം. 

ഒാരോ ഷിഫ്​റ്റ്​ കഴിയു​േമ്പാഴും കാർ ചാർജ്​ ചെയ്യാനിടും. വിമാനത്താവളത്തിലും ദുബൈ ടാക്​സി കോർപറേഷൻ ഒാഫീസിലും ഇതിന്​ സൗകര്യമുണ്ട്​. കൂടാതെ നഗരത്തിൽ 103 ചാർജിംഗ്​ പോയൻറുകൾ വേറെയുമുണ്ട്​. ​സ്വയം ഒാടാൻ ആവശ്യമായ എല്ലാ സംവിധാനങ്ങളും ഉൾപ്പെടുത്തിയിരിക്കുന്ന കാറുകളാണ്​ ഇവ. എങ്കിലും തൽക്കാലം ഡ്രൈവർമാരെ ഉപയോഗിച്ചാണ്​ കാറുകൾ ഒാടിക്കുക. ഇലക്​ട്രിക്​ കാറുകളും അതിനോടനുബന്ധിച്ച സാ​േങ്കതിക സംവിധാനങ്ങളും പ്രവർത്തിപ്പിക്കാൻ പ്ര​േത്യക പരിശീലനം നേടിയ ഡ്രൈവർമാരാണ്​ ഇവ ഒാടിക്കുന്നത്​. സ്വയം നിയന്ത്രിത കാറുകൾ നിരത്തിലിറക്കുന്നതിനുള്ള നിയമപരമായ നടപടികൾ പുരോഗമിച്ചുകൊണ്ടിരിക്കുകയാണ്​. ഇത്​ പൂർത്തിയായാൽ കാറുകളിലെ സംവിധാനം ഉപയോഗിക്കാനാണ്​ തീരുമാനം. ഇത്തരം കാറുകൾക്ക്​ 2019 വരെ സൗജന്യ ചാർജിംഗും പർക്കിംഗും അനുവദിക്കാനും തീരുമാനിച്ചിട്ടുണ്ട്​.