വിളിച്ചാൽ വീട്ടുപടിക്കലെത്തുന്ന കുട്ടിബസുമായി ആർ.ടി.എ

ദുബൈ: ബസും മെട്രോയുമിറങ്ങി വീട്ടിലേക്ക്​ ഒരു പാട്​ ദൂരം നടക്കണം, അല്ലെങ്കിൽ ടാക്​സി പിടിക്കണം എന്ന ബുദ്ധിമുട്ടിന്​ പരിഹാരമാവുന്നു. പൊതുഗതാഗത സംവിധാനം കൂടുതൽ ശക്​തിപ്പെടുത്തുന്നതിനായി റോഡ്​ ഗതാഗത അതോറിറ്റി നടപ്പാക്കുന്ന ബസ്​ ഒാൺ ഡിമാൻഡ്​ സേവനമാണ്​ സ്വന്തമായി വാഹനമില്ലാത്ത ഒട്ടനവധി യാത്രക്കാർക്ക്​ അനുഗ്രഹമായി മാറാനൊരുങ്ങുന്നത്​. വറഖയിലേക്കും ബർഷയിലേക്കും പരീക്ഷണാടിസ്​ഥാനത്തിൽ മൂന്നു മാസത്തേക്ക്​ ആരംഭിക്കുന്ന സേവനം വിജയകരമായാൽ കൂടുതൽ മേഖലകളിലേക്ക്​ വ്യാപിപ്പിക്കും. യാത്രക്കാരുടെ സൗകര്യത്തിന് അനുസരിച്ച് MVMANT എന്ന മൊബൈല്‍ ആപ്ലിക്കേഷന്‍ വഴി ബസിലെ സീറ്റുകള്‍ പണമടച്ച് ബുക്ക് ചെയ്യാം. ബസ് കാത്തുനില്‍ക്കേണ്ട സ്ഥലവും സമയവും ആപ്ലിക്കേഷന്‍ അറിയിക്കും. ഈ ബസുകളുടെ റൂട്ടും സമയവും കൂടുതല്‍ യാത്രക്കാരുടെ ആവശ്യവും സൗകര്യവുമനുസരിച്ചായിരിക്കും. 18 സീറ്റുള്ള ചെറുബസുകളാണ് ഇതിനായി ഉപയോഗിക്കുക. താമസ സ്ഥലത്തുനിന്ന് മെട്രോ സ്റ്റേഷന്‍, ബസ് സ്റ്റേഷന്‍ എന്നിവിടങ്ങളിലേക്ക് എത്തുന്നതിനും തിരിച്ച് വീടുകളിലേക്ക് എത്തുന്നതിനുമാണ് ഇത്തരം ബസ് സര്‍വീസുകള്‍ ഉപകരിക്കുകയെന്ന് ആർ.ടി.എ സി.ഇ.ഒ അഹ്​മദ്​ ബഹ്​റൂസിയാൻ വ്യക്​തമാക്കി. മൂന്നുമാസത്തെ പരീക്ഷണയോട്ടത്തെ വിലയിരുത്തിയാകും ബസ് ഒാൺ ഡിമാന്‍ഡ് സര്‍വീസ് പരിഷ്കരിക്കുക. മൂന്നുമാസത്തെ പരീക്ഷണയോട്ടത്തില്‍ ബസ് പൂര്‍ണമായും സൗജന്യമായിരിക്കും. യാത്രാക്കാരിൽ നിന്ന്​ അഭിപ്രായങ്ങൾ സ്വരൂപിച്ച ശേഷമാണ്​ ഉദ്യമത്തിന്​ തുടക്കമിട്ടത്​. ഇനി പരീക്ഷണയോട്ട കാലയളവിലും മെട്രോ സ്​റ്റേഷനുകളിൽ ചോദ്യാവലികൾ മുഖേന വിവരങ്ങൾ തേടും.