നാട്ടിൽ നിന്ന്​ യു.എ.യിലേക്ക്​ വിമാനം വേണം:കെ.എം.സി.സി നേതാക്കൾ സി.ജിയെ കണ്ടു

ദുബൈ: നാട്ടിൽ നിന്ന്​ യു.എ.ഇയിലേക്കു തിരിച്ചുവരാൻ ആഗ്രഹിക്കുന്നവർക്കു യാത്രാസൗകര്യം ഒരുക്കുക, യു.എ.യിൽ നിന്ന്​ നീറ്റ് പരീക്ഷ എഴുതുന്ന വിദ്യാർത്ഥികൾക്ക്​ ഇവിടെ സെൻററുകൾ അനുവദിക്കുക തുടങ്ങിയ ആവശ്യങ്ങളുന്നയിച്ചു യു.എ.ഇ കെ.എം.സി.സിയുടെ നേതാക്കൾ ദുബൈ ഇന്ത്യൻ കോൺസുൽ ജനറൽ വിപുലുമായി കൂടിക്കാഴ്ച്ച നടത്തി.

യു.എ.ഇ കെ.എം.സി‌.സി ഉപദേശക സമിതി ചെയർമാൻ എ.പി ഷംസുദ്ദീൻ ബിൻ മുഹിയിദ്ദീൻ, പ്രസിഡൻറ്​ പുത്തൂർ റഹ്മാൻ, ജനറൽ സെക്രട്ടറി നിസാർ തളങ്കര, പി.കെ അൻവർ നഹ എന്നിവരാണ് കൂടിക്കാഴ്ച്ച നടത്തിയത്.

കോവിഡ് പ്രതിസന്ധിയിൽ യു.എ.യിൽ അകപ്പെട്ടവരെ നാട്ടിലെത്തിക്കുന്ന ദൗത്യം തുടരുന്ന സാഹചര്യത്തിൽ ഇനി വേണ്ടത്​ നാട്ടിലകപ്പെട്ട പ്രവാസികളെ യു.എ.ഇയിൽ എത്തിക്കാനുള്ള യാത്രാസൗകര്യമാണ്.

ഇതിനായി വന്ദേഭാരത് മിഷനു സമാനമായ ചാർറ്റഡ് വിമാനങ്ങൾ ഇന്ത്യാഗവൺമെൻറ്​ ആരംഭിക്കുകയോ അതിനുള്ള അനുമതി സാമൂഹിക കൂട്ടായ്മകൾക്കു നൽകുകയോ വേണം. നാട്ടിൽ നിന്ന്​ തിരികെ വരാനായി അവസരം കാത്തുകഴിയുന്ന അനേകായിരം ജീവനക്കാരും സംരംഭകരും കച്ചവടക്കാരും ഉണ്ട്.

യു.എ.ഇയിൽ നിന്ന്​ നീറ്റ് പരീക്ഷക്കു തയ്യാറെടുക്കുന്ന വിദ്യാർത്ഥികൾ അനുഭവിക്കുന്ന അനിശ്ചിതത്വത്തെ കുറിച്ചും നേതാക്കൾ ശ്രദ്ധക്ഷണിച്ചു. നീറ്റ് പരീക്ഷ എഴുതാൻ യു.എ.ഇയിൽ സെൻറർ അനുവദിക്കുകയോ പരീക്ഷാർത്ഥികൾക്കു നാട്ടിലെത്തി പരീക്ഷക്കിരിക്കാൻ അവസരമൊരുക്കുകയോ വേണം.

വിദേശത്ത് നിന്ന്​ ഏഴായിരത്തിൽ പരം വിദ്യാർത്ഥികൾ പ്ലസ്​റ്റു പരീക്ഷ എഴുതുന്നു. അവരിൽ ആയിരത്തോളം പേർ നീറ്റ് പരീക്ഷക്കു തയ്യാറെടുത്തവരാണ്. കോൺസുൽ ജനറൽ നിവേദനങ്ങൾ അനുഭാവപൂർവ്വം പരിഗണിച്ചതായും പ്രശ്നങ്ങളിൽ ഔദ്യോഗികമായ പരിഹാരമുണ്ടാകുമെന്നു പ്രതീക്ഷിക്കുന്നതായും നാഷണൽ കമ്മിറ്റി പ്രസിഡൻറ്​ പുത്തൂർ റഹ്മാൻ അറിയിച്ചു.