യു.എ.ഇയിലെ സ്വദേശിവത്​കരണം ചെറുകിട സ്ഥാപനങ്ങളിൽ നടപ്പാക്കില്ല -മന്ത്രി

ദുബൈ: 50ൽ കൂടുതൽ ജീവനക്കാരുള്ള സഥാപനങ്ങളിൽ ഇമാറാത്തി ജീവനക്കാരെ നിയമിക്കണമെന്ന നിബന്ധന ചെറുകിട സ്ഥാപനങ്ങളിലേക്ക്​ വ്യാപിപ്പിക്കാൻ പദ്ധതിയില്ലെന്ന്​ യു.എ.ഇ മാനവ വിഭവശേഷി, എമി​ററ്റൈസേഷൻ മന്ത്രി അബ്​ദുൽ റഹ്​മാൻ അൽ അവാർ. പതിനായിരക്കണക്കിന്​ ഇമാറാത്തികൾ ഇതിനകം ജോലിയിൽ പ്രവേശിച്ചതായും അദ്ദേഹം വ്യക്​തമാക്കി.

നിലവിൽ സർക്കാർ സ്വീകിരച്ച ഇമാറാത്തിവത്​കരണ നയം മാറ്റാൻ ഉദ്ദേശമില്ല. 50ൽ കൂടുതൽ വിദഗ്ധ ജീവനക്കാരുള്ള സ്ഥാപനമാണ്​ രണ്ട്​ ശതമാനം ഇമാറാത്തികളെ നിയമിക്കേണ്ടത്​. 1000 ജീവനക്കാരുള്ള സ്ഥാപനത്തിൽ 100 വിദഗ്ധ ജോലിക്കാർ മാത്രമാണുള്ളതെങ്കിൽ രണ്ട്​ ഇമാറാത്തികളെ നിയമിച്ചാൽ മതി.

അതേസമയം, 100 ജീവനക്കാരുള്ള സ്ഥാപനത്തിൽ 100 പേരും വിദഗ്ധ ജോലിക്കാരാണെങ്കിൽ ഇവിടെയും രണ്ട്​ ഇമാറാത്തികളെ നിയമിക്കണം. ഈ വർഷം അവസാന​ത്തോടെ ഇത്​ നാല്​ ശതമാനമാക്കി മാറ്റണമെന്നും അദ്ദേഹം പറഞ്ഞു.

ഫ്രീ സോണിൽ പ്രവർത്തിക്കുന്ന സ്ഥാപനങ്ങളിൽ ഇമാറാത്തിവത്​കരണം നടപ്പാക്കിയിട്ടില്ലെങ്കിലും നിരവധി സ്ഥാപനങ്ങൾ ഇത്​ സ്വയം ഏറ്റെടുത്തിട്ടുണ്ടെന്ന്​ ഇമാറാത്തി ടാലന്‍റ്​ കോംപറ്റീറ്റീവ്​നെസ്​ കൗൺസിൽ സെക്രട്ടറി ജനറൽ ഗന്നം അൽ മസ്​റൂയി പറഞ്ഞു​. 1600 ഇമാറാത്തികൾ ഫ്രീ സോൺ സ്ഥാപനങ്ങളിൽ ജോലി ചെയ്യുന്നുണ്ട്​. കൂടുതൽ ഫ്രീ സോൺ സ്ഥാപനങ്ങൾ സ്വയം മുന്നോട്ടുവരണം. ഇവർക്ക്​ ‘നാഫിസ്​’ പദ്ധതി അനുസരിച്ചുള്ള ആനുകൂല്യം ലഭിക്കും.

സ്ഥാപനങ്ങളുടെ സാമ്പത്തിക ബാധ്യത കുറക്കാൻ ‘നാഫിസ്​’ പദ്ധതി ഉപകരിക്കും. സ്വകാര്യ മേഖലയിൽ ജോലി ചെയ്യുന്ന 32,556 ഇമാറാത്തികൾക്ക് ഡിസംബർ വരെ ‘നാഫിസ്​’ പദ്ധതിയുടെ ആനുകൂല്യം ലഭിച്ചു.​ സ്വകാര്യമേഖലയിൽ ഇമാറാത്തികളുടെ കഴിവുകൾ വർധിപ്പിക്കുന്നതിനും പരിശീലനം നൽകുന്നതിനും വർഷത്തിൽ 1.25 ശതകോടി ദിർഹം നീക്കിവെക്കുന്നുണ്ട്​.

ഇമാറാത്തിവത്​കരണത്തെ പിന്തുണക്കുന്നതിന്​ വിവിധ സ്ഥാപനങ്ങൾക്കായി 1500ഓളം ശിൽപശാലകളും യോഗങ്ങളും നടത്തി. കഴിഞ്ഞയാഴ്ചത്തെ കണക്കനുസരിച്ച്​ 50,000 ഇമാറാത്തികൾ സ്വകാര്യ മേഖലയിൽ ജോലി ചെയ്യുന്നുണ്ടെന്നും മസ്​റൂയി കൂട്ടിചേർത്തു.